AKP ភ្នំពេញ ថ្ងៃទី២៦ ខែសីហា ឆ្នាំ២០២៥-- លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានអនុញ្ញាតឱ្យលោក បាក់ តូក្យូ ប្រធានមូលនិធិហ្វ្រេដហូឡូកម្ពុជា និងសហការី កាលពីរសៀលថ្ងៃចន្ទ ទី២៥ ខែសីហា ឆ្នាំ២០២៥ ចូលជួបសម្តែងការគួរសម និងចុះកិច្ចព្រមព្រៀងជាមួយគ្នាដើម្បីបន្តការអនុវត្តគម្រោង «សុខភាពភ្នែកដើម្បីទទួលបានសេវាគ្របដណ្តប់ដ៏ទូលំទូលាយ និងប្រកបដោយបរិយាបន្ននៅកម្ពុជា» នៅទីស្តីការក្រសួងកិច្ចការនារី។ 

លោក បាក់ តូក្យូ បានជម្រាបជូនលោកជំទាវកិត្តិបណ្ឌិតរដ្ឋមន្ត្រីអំពីបច្ចុប្បន្នភាពនៃកិច្ចសហការរវាងក្រសួងកិច្ចការនារី និងមូលនិធិហ្វ្រេដហូឡូ លើការអនុវត្តគម្រោងសុខភាពភ្នែក ក្រោមគម្រោង «សុខភាពភ្នែកប្រកបដោយនិរន្តរភាព និងសមធម៌ (SEE-IPEC)» ដែលបានអនុវត្តរួមគ្នាកន្លងមកប្រកបដោយភាពជោគជ័យនៅក្នុងខេត្តចំនួន៦គឺ៖ ខេត្តព្រះសីហនុ កំពង់ស្ពឺ កំពង់ឆ្នាំង កំពង់ធំ ត្បូងឃ្មុំ និងខេត្តកណ្តាល។

សកម្មភាពដែលបានអនុវត្តលើគម្រោងនេះរួមមាន៖ ផ្តល់វគ្គបណ្តុះបណ្តាលដល់ប្រជាពលរដ្ឋនៅក្រុមគោលដៅអំពីវិធីសាស្ត្រថែទាំភ្នែក ផ្តល់ជូនការពិនិត្យភ្នែក ថ្នាំបន្តក់ភ្នែក និងវ៉ែនតា ព្រមទាំងលើកទឹកចិត្តពួកគាត់ទៅទទួលបានសេវាវះបកភ្នែកដោយដោយឥតគិតថ្លៃ ប្រកបដោយគុណភាព សមធម៌ និងបរិយាបន្ន។ ផ្អែកលើសមិទ្ធផលទាំងនេះ មូលនិធិហ្វ្រេដហូឡូ និងក្រសួងកិច្ចការនារី នឹងបន្តកិច្ចសហការលើកការអនុវត្តគម្រោងថ្មី «សុខភាពភ្នែកដើម្បីទទួលបានសេវាគ្របដណ្តប់ដ៏ទូលំទូលាយ និងប្រកបដោយបរិយាបន្ននៅកម្ពុជា» ដោយពង្រីកខេត្តគោលដៅបន្ថែមទៀតដើម្បីឱ្យគម្រោងនេះបានទៅដល់ក្រុមគោលដៅនៅទូទាំងប្រទេស។

លោកជំទាវកិត្តិបណ្ឌិតរដ្ឋមន្រ្តីបានថ្លែងអំណរគុណ និងអបអរសាទរចំពោះសមិទ្ធកម្មដែលសម្រេចបានពីការអនុវត្តគម្រោងនេះ ដោយកិច្ចសហការនេះគឺពិតជាបានរួមចំណែកយ៉ាងសំខាន់ក្នុងការលើកកម្ពស់សុខភាពសាធារណៈពាក់ព័ន្ធ និងលើកកម្ពស់សមភាពយេនឌ័រ ដែលផ្តោតលើកការយកចិត្តទុកដាក់លើបញ្ហាសុខភាពភ្នែកដល់ប្រជាពលរដ្ឋនៅក្រុមគោលដៅ។ លោកជំទាវកិត្តិបណ្ឌិតបានស្នើឱ្យមូលនិធិហ្វេ្រដហូឡូ ពង្រីកតំបន់គោលដៅសម្រាប់ការអនុវត្តគម្រោងនេះបន្ថែមទៀតដល់ ប្រជាពលរដ្ឋនៅតាមតំបន់ដាច់ស្រយាលជាពិសេសស្រ្តី ក្មេងស្រី និងជនងាយរងគ្រោះ ចាប់ផ្តើមទទួលបានសេវាសុខភាពភ្នែក អនុវត្តវិធីការពារឱ្យបានត្រឹមត្រូវទៅតាមវេជ្ជសាស្ត្រ និងព្យាបាលភ្នែកឱ្យបានទាន់ពេលវេលា។

លោកជំទាវកិត្តិបណ្ឌិតបានថ្លែងអំណរគុណដល់មូលនិធិហ្វ្រេដហូឡូ ដែលបានសហការគាំទ្រដល់ក្រសួងកិច្ចការនារី ហើយលោកជំទាវបានស្នើឱ្យបន្តសកម្មភាពផ្សេងៗបន្ថែមដូចជា កម្មវិធីអប់រំផ្សព្វផ្សាយតាមបណ្តាញសង្គម និងការចុះទៅផ្សព្វផ្សាយផ្ទាល់នៅសហគមន៍ ដើម្បីចូលរួមកាត់បន្ថយអត្រាពិការភ្នែកមកនៅត្រឹម ០.៣% នៅឆ្នាំ២០៣០៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)