AKP  ភ្នំពេញ ថ្ងៃទី២៣ ខែសីហា  ឆ្នាំ២០២៥--

ឯកឧត្តម វង្សី វិស្សុត   ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និង ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្ទោង  និងក្រុមការងារ នាព្រឹកថ្ងៃសៅរ៍ ទី២៣ ខែសីហា ឆ្នាំ២០២៥នេះ បានអញ្ជើញចុះទៅពិនិត្យកសិដ្ឋានវារីវប្បកម្ម ក្នុងមូលដ្ឋានស្រុកស្ទោង ខេត្តកំពង់ធំ។

ក្នុងឱកាសនោះ ក្រុមការងារ អញ្ជើញជួបសំណេះសំណាល និងចុះពិនិត្យជាក់ស្តែងនៅតាមកសិដ្ឋានវារីវប្បកម្ម ក្នុងស្រុកស្ទោងចំនួន ៤ទីតាំងគឺ៖
 ទី១)កសិដ្ឋានចិញ្ចឹមត្រីលក្ខណៈគ្រួសារក្នុងភូមិចំណាក់ ឃុំចំណាក្រោម 
ទី២)កសិដ្ឋានចិញ្ចឹមត្រីរ៉ស់ ត្រីពោ និងត្រីប្រា ក្នុងភូមិអូររំចេក ឃុំសំព្រោជ 
ទី៣)ទីតាំងសិប្បកម្មកែច្នៃត្រីងៀត ក្នុងភូមិឈើទាល ឃុំកំពង់ចិនត្បូង និងទី៤)ទីតាំងសិប្បកម្មប្រមូលទិញត្រី និងបង្កកត្រីធម្មជាតិ ក្នុងភូមិត្នោត ឃុំកំពង់ចិនជើង។

សូមជម្រាបថា បេសកកម្មចុះពិនិត្យកសិដ្ឋានវារីវប្បកម្មនាពេលនេះ គឺដើម្បីពិនិត្យលើទិដ្ឋភាពជាក់ស្ដែងនៃដំណើរការនៃខ្សែចង្វាក់ផលិតកម្ម ហេដ្ឋារចនាសម្ព័ន្ធ បច្ចេកទេសនៃការចិញ្ចឹម ពូជត្រី ចំណីត្រី ចរន្តទឹក អគ្គិសនី សមត្ថភាពផលិត ទីផ្សារ និងការដឹកជញ្ជូន ក៏ដូចជាដើម្បីស្វែងយល់បន្ថែមពីបញ្ហាប្រឈម និងការលំបាកនានារបស់ម្ចាស់កសិដ្ឋាន និងម្ចាស់សិប្បកម្មផ្ទាល់ដែលបានជួបប្រទះ ហើយស្វែងរកដំណោះស្រាយ ជួយគាំទ្រ ជំរុញ និងលើកទឹកចិត្ត សំដៅលើកកម្ពស់ផលិតកម្មក្នុងស្រុក និងចូលរួមបង្កើតការងារ ប្រាក់ចំណូល និងលើកកម្ពស់ជីវភាពរស់នៅរបស់បងប្អូនប្រជាពលរដ្ឋក្នុងមូលដ្ឋាន៕

ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)