AKP បន្ទាយមានជ័យ ថ្ងៃទី១៩ ខែសីហា ឆ្នាំ២០២៥-- លោក ឃ្លោក នួយ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញជាអធិបតីភាពក្នុងកិច្ចប្រជុំពិភាក្សាស្តីពីតម្លៃស្រូវ និងការប្រមូលផលស្រូវក្នុងខេត្ត។ កិច្ចប្រជុំនេះប្រព្រឹត្តទៅនៅសាលប្រជុំក្រុមប្រឹក្សាខេត្ត កាលពីរសៀលថ្ងៃចន្ទ ទី១៨ ខែសីហា ឆ្នាំ២០២៥នេះដោយមានការចូលរួមពីប្រធានមន្ទីរពាណិជ្ជកម្មខេត្ត, ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្ត, ប្រធានមន្ទីរកសិកម្ម រុក្ខាប្រមាញ់ និងនេសាទខេត្តអភិបាល អភិបាលរងក្រុង-ស្រុក និងម្ចាស់រោងម៉ាស៊ីនកិនស្រូវខ្នាតធំក្នុងខេត្ត។

ក្នុងកិច្ចប្រជុំនោះ លោក  ឃ្លោក នួយ បានលើកឡើងពីក្តីកង្វល់របស់កសិករដែលកំពុងប្រឈមនឹងការប្រែប្រួលតម្លៃស្រូវនៅដើមរដូវវស្សានេះ និងបានគូសបញ្ជាក់ថា "ក្នុងនាមថ្នាក់ដឹកនាំខេត្ត យើងខ្ញុំមានការយល់ដឹងពីបញ្ហា និងការលំបាករបស់ប្រជាកសិករដែលខិតខំប្រឹងប្រែងធ្វើស្រែ ប៉ុន្តែបែរជាជួបបញ្ហាទីផ្សារ។ ដូច្នេះយើងត្រូវរួមគ្នាដោះស្រាយបញ្ហានេះ"។ លោកបានស្នើដល់ម្ចាស់រោងម៉ាស៊ីនទាំងអស់នៅក្នុងខេត្ត ឱ្យជួយប្រមូលទិញស្រូវរបស់ប្រជាកសិករក្នុងតម្លៃសមរម្យ និងថ្លៃដើមផលិតរបស់កសិករ ដើម្បីធានាបាននូវប្រាក់ចំណេញបន្តិចបន្តួចសម្រាប់ពួកគាត់។

យោងតាមរបាយការណ៍ដែលបង្ហាញក្នុងកិច្ចប្រជុំ តម្លៃស្រូវដឹកដល់រោងម៉ាស៊ីននៅថ្ងៃទី១៨ ខែសីហា ឆ្នាំ២០២៥នេះ ស្រូវស្រង៉ែលេខ១ តម្លៃពី ៨០០៛ ទៅ ៨២០៛ ក្នុងមួយគីឡូក្រាម។ ស្រូវសែនក្រអូបលេខ១ តម្លៃ ១០០០៛ ក្នុងមួយគីឡូក្រាម។

ដោយឡែក ក្រុមហ៊ុនបៃតងរបស់ឧកញ៉ា ភូ ពុយ ក៏បានចុះប្រមូលទិញស្រូវពីកសិករនៅឃុំគោកបល្ល័ង្គ និងឃុំស្រះរាំងក្នុងតម្លៃ ស្រូវស្រង៉ែ ៧៦០៛ ក្នុងមួយគីឡូក្រាម ស្រូវសែនក្រអូប ១០០០៛ ក្នុងមួយគីឡូក្រាម។

កសិករមួយរូបដែលរស់នៅឃុំគោកបល្ល័ង្គបានសម្តែងការព្រួយបារម្ភចំពោះតម្លៃស្រូវស្រង៉ែដែលក្រុមហ៊ុនប្រមូលទិញបានទាបជាងតម្លៃដែលបានរាយការណ៍នៅរោងម៉ាស៊ីន។ លោកបានថ្លែងទាំងអួលដើមកថា "ខ្ញុំសង្ឃឹមថា រោងម៉ាស៊ីន និងក្រុមហ៊ុនផ្សេងទៀត នឹងជួយសម្របសម្រួលតម្លៃឱ្យសមស្របតាមទីផ្សារ ហើយកុំទម្លាក់ថ្លៃពេលដល់រដូវប្រមូលផល។ យើងខ្ញុំចំណាយទុនច្រើនណាស់ក្នុងការដាំដុះ ហើយបើលក់មិនបានថ្លៃទេ យើងក៏អស់សង្ឃឹមដែរ"។

លោក ឃ្លោក នួយ បានបន្ថែមទៀតថា ការយកចិត្តទុកដាក់លើតម្លៃស្រូវ គឺមិនត្រឹមតែជាការជួយដល់កសិករទេ តែវាក៏ជាការរួមចំណែកដល់ស្ថិរភាពសេដ្ឋកិច្ចខេត្តទាំងមូលផងដែរ។លោក បានអំពាវនាវដល់ភាគីពាក់ព័ន្ធទាំងអស់ ត្រូវបន្តកិច្ចសហប្រតិបត្តិការដើម្បីដោះស្រាយបញ្ហាប្រឈមទាំងនេះ និងស្វែងរកដំណោះស្រាយរយៈពេលវែង ដើម្បីធានាថា កសិករនៅខេត្តបន្ទាយមានជ័យអាចបន្តការងារដាំដុះបានដោយភាពរីករាយ និងទទួលបានផលចំណេញសមរម្យតាមកម្លាំងញើសឈាមរបស់ពួកគាត់៕

ដោយ ឈុន សារ៉ាត