AKP កំពង់ធំ ថ្ងៃទី០៨ ខែសីហា ឆ្នាំ២០២៥-- លោក ឃន ចាន់ថៃ អភិបាលនៃគណៈអភិបាលស្រុកបារាយណ៍ និងសហការី កាលពីថ្ងៃទី០៧ ខែសីហា ឆ្នាំ២០២៥ បានចុះត្រួតពិនិត្យការប្រមូលផលស្រូវស្រង៉ែស្រាល និងស្រូវសែនក្រអូបរបស់បងប្អូនប្រជាកសិករចំនួន០៥គ្រួសារ ដែលបានធ្វើស្រែចំនួន៩២ហិកតានៅឃុំបារាយណ៍ ស្រុកបារាយណ៍ ខេត្តកំពង់ធំ។

លោកអភិបាលស្រុកបារាយណ៍បានកោតសរសើរចំពោះការខិតខំប្រឹងប្រែងរបស់ប្រជាកសិករទាំង០៥គ្រួសារ និងបានផ្សារភ្ជាប់ជាមួយវិស័យឯកជនត្រៀមប្រមូលទិញស្រូវសែនក្រអូប និងស្រង៉ែស្រាល ដែលមានតម្រូវការទីផ្សារឱ្យមានតម្លៃខ្ពស់ ហើយប្រជាកសិករគ្រោងនឹងចាប់ផ្ដើមរដូវដាំដុះឱ្យបានច្រើននៅក្នុងមូលដ្ឋានរបស់ពួកគាត់ជាមួយនឹងការគាំទ្រទុនផលិតកម្ម បច្ចេកទេស និងទីផ្សាររួចជាស្រេចតាមរយៈយន្តការសហគមន៍កសិកម្មទំនើប ដើម្បីឱ្យសហគមន៍សហការជាមួយមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ព្រមទាំងអាជ្ញាធរខេត្ត ពិនិត្យលទ្ធភាពស្នើសុំគ្រប់គ្រងស្ថានីយបូមទឹករដ្ឋ សំដៅមានទឹកស្រោចស្រពគ្រប់គ្រាន់ កាត់បន្ថយថ្លៃដើមផលិតកម្ម និងជំរុញឱ្យមានការសិក្សាលើការថែទាំ និងជួលជុលឱ្យការប្រើប្រាស់បានយូរអង្វែង។

លោក ឃន ចាន់ថៃ បានលើកទឹកចិត្តកសាងទំនុកចិត្តជាមួយគ្នាក្នុងសហគមន៍ និងវិស័យឯកជន ស្មោះត្រង់ជាមួយគ្នា បន្តស្មារតីសាមគ្គីភាព តម្លាភាព និងតម្កល់ផលប្រយោជន៍រួមជាធំ ហេីយរដ្ឋបាលស្រុកបារាយណ៍នៅតែបន្តគាំទ្រឱ្យធំធាត់ និងមាននិរន្តរភាព៕

ដោយ ស៊ុម វណ្ណា