AKP ភ្នំពេញ ថ្ងៃទី០៦ ខែឧសភា ឆ្នាំ២០២៦---

ឯកអគ្គរាជទូតកម្ពុជាប្រចាំនៅសាធា រណរដ្ឋកូរ៉េបានស្នើចំនួន៣ទៅមជ្ឈម ណ្ឌលគាំពារពលករបរទេសតំបន់ថាំងជីន ក្នុងខេត្តឈុងឆុងណាំដូ ប្រទេសកូរ៉េ។

នៅថ្ងៃ ទី៦ ខែឧសភា ឆ្នាំ ២០២៦ ឯក ឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការី បានអញ្ជើញទៅមជ្ឈមណ្ឌលគាំពារពលករបរទេសតំបន់ថាំងជីន ក្នុងខេត្តឈុងឆុងណាំដូ ប្រទេសកូរ៉េ ដើម្បីជួបសំណេះសំណាល និងពិនិត្យមើលការរស់នៅរបស់បងប្អូនពលករខ្មែរដែលកំពុងស្នាក់នៅក្នុងផ្ទះស្នាក់របស់មជ្ឈ មណ្ឌល។ 

លោក Park Geun Sik ប្រធានសមាគមន៍យុវជនក្រុងថាំងជីន បានមានប្រសាសន៍ថា ការអញ្ជើញមករបស់ឯកឧត្តមឯកអគ្គរាជទូតថ្ងៃនេះ គឺជាឱកាសដ៏ល្អមួយសម្រាប់មជ្ឈមណ្ឌលដើម្បីចែករំលែកបទពិសោធន៍ និងផ្លាស់ប្តូរយោបល់អំពីកិច្ចសហការក្នុងការការពារសុខសុវត្ថិភាពរបស់បងប្អូនពលករក្នុងតំបន់ថាំងជីន។

ឯកឧត្តមឯកអគ្គរាជទូត បានថ្លែងអំណរ គុណចំពោះប្រធានមជ្ឈមណ្ឌលដែលបានរៀបចំកម្មវិធីថ្ងៃនេះ និងបានថ្លែងអំណរគុណចំពោះអាជ្ញាធរពាក់ព័ន្ធដែលកន្លងមកបានប្រឹងប្រែង និងយកចិត្តទុកដាក់ក្នុងការថែរក្សាសុខសុវត្ថិភាពជូនបងប្អូនពលករក្នុងតំបន់។ 

ឆ្លៀតក្នុងឱកាសនេះ ឯកឧត្តមក៏បានស្នើមជ្ឈមណ្ឌលឱ្យសហការជាមួយស្ថានទូតលើគម្រោងសកម្មភាពចំនួន ៣ រួមមាន ១. ការរៀបចំផ្តល់សេវាសាធារណៈក្នុងតំបន់ ២. ការពិនិត្យសុខភាពឥតគិតថ្លៃជូនបងប្អូនខ្មែរដែលរស់នៅជុំវិញតំបន់ថាំងជីន និង ៣. សហការរៀបចំព្រឹត្តការណ៍វប្បធម៌កម្ពុជា-កូរ៉េ។ 

ឯកឧត្តមក៏បានបន្តថា នៅថ្ងៃខាងមុខ ឯកឧត្តសង្ឃឹមថានឹងអាចជួបពិភាក្សាជាមួយអាជ្ញាធរខេត្ត-ក្រុងដើម្បីរឹតចំ ណងកិច្ចសហប្រតិបត្តិការឱ្យបានកាន់តែជិតស្និតក្នុងការចែករំលែកពត៌មាន និងដោះស្រាយបញ្ហាជូនបងប្អូនពលករឱ្យកាន់តែមានប្រសិទ្ធិភាព និងទាន់ពេលវេលា៕ 

ដោយ៖ ប៊ុនរិទ្ធ