AKP កំពង់ធំ ថ្ងៃទី០៨ ខែសីហា ឆ្នាំ២០២៥-- ឯកឧត្តមបណ្ឌិត  ថោង ខុន ទេសរដ្ឋមន្ត្រី អនុប្រធានទី១ ក្រុមការងារគណបក្សចុះមូលដ្ឋានខេត្តកំពង់ធំ និងជាប្រធានក្រុមការងារគណបក្សចុះមូលដ្ឋានស្រុកតាំងគោក តំណាងឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ និងជាប្រធានក្រុមការងារគណបក្សចុះមូលដ្ឋានខេត្តកំពង់ធំ និងឯកឧត្តម នួន ផារ័ត្ន អភិបាលខេត្តកំពង់ធំ កាលពីថ្ងៃទី០៧ ខែសីហា ឆ្នាំ២០២៥ បាននាំយកថវិកា និងសាររំលែកទុក្ខរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនភរិយា និងក្រុមគ្រួសារនៃសពលោកវរសេនីយ៍ត្រី ប៊ូ ផូ ជាយោធិននៃកងពលតូចអន្តរាគមន៍លេខ៨ កងពលធំអន្តរាគមន៍លេខ៣ កងទ័ពជើងគោក ដែលបានពលីជីវិតនៅក្នុងសមរភូមិដើម្បីការពារដែនអធិបតេយ្យភាពជាតិ និងបូរណភាពទឹកដីពីសត្រូវឈ្លានពាន។

ក្នុងឱកាសនោះ ឯកឧត្តមបណ្ឌិត ថោង ខុន បានពាំនាំនូវការរំលែកមរណទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត ជូនចំពោះភរិយា និងក្រុមគ្រួសារនៃសពលោកវរសេនីយ៍ត្រី ប៊ូ ផូ ព្រមទាំងបានប្រគល់ជូននូវសាររំលែកមរណទុក្ខ និងថវិកាឧបត្ថម្ភរបស់សម្តេចមហាបវរធិបតី ហ៊ុន ម៉ាណែត ចំនួន ៨០លានរៀល, ឯកឧត្តម វង្សី វិស្សុត ៥លានរៀល, ឯកឧត្តមអភិបាលខេត្ត ៥លានរៀល, លោកអ្នកឧកញ៉ា ទ្រី ភាព ៥លានរៀល, និងថវិការបស់ក្រុមការងារគណបក្សចុះមូលដ្ឋានស្រុកតាំងគោក ៦៨៩០០០០រៀល ដើម្បីជាកិច្ចតបស្នងចំពោះការធ្វើពលិកម្ម សាច់ស្រស់ ឈាមស្រស់ ប្រកបដោយភាពមោះមុតអង់អាចក្លាហានរបស់លោក ប៊ូ ផូ នៅក្នុងបុព្វហេតុការពារអធិបតេយ្យ និងបូរណភាពទឹកដី។

ឯកឧត្តមបណ្ឌិត ថោង ខុន និងឯកឧត្តមអភិបាលខេត្តកំពង់ធំ និងស្ថាប័នមីក្រូហិញវត្ថុ (ធនាគារប្រាសាក់ និងអង្គការទ្រព្យខ្ញុំ) ក៏បានរួមគ្នាដោះស្រាយនូវគោលនយោបាយរបស់រាជរដ្ឋាភិបាលជូនដល់ភរិយានៃសព ដោយបានលុបចោលបំណុលជំពាក់ធនាគារ និងស្ថាប័នមីក្រូហិរញ្ញវត្ថុរបស់គាត់ ជួយសម្រួលដល់ការសិក្សារបស់កូនៗ និងផ្តល់ក្របខ័ណ្ឌយោធា០១កន្លែងសម្រាប់កូន ឬសាច់ញាតិរបស់គាត់តាមស្ថានភាពជាក់ស្តែង។

តាងនាមរាជរដ្ឋាភិបាលឯកឧត្តមបណ្ឌិតទេសរដ្ឋមន្ត្រី ថោង ខុន ក៏បានថ្លែងអំណរគុណចំពោះស្ថាប័នទាំងពីរ ដែលបានជួយសម្រួលបន្ទុកដល់គ្រួសារនៃសព និងសូមថ្លែងអំណរគុណចំពោះសប្បុរសជន និងញាតិមិត្តជិតឆ្ងាយនៃសព ដែលបានចូលបច្ច័យបុណ្យសពវរសេនីយ៍ត្រី ប៊ូ ផូ ផងដែរ៕

ដោយ ស៊ុម វណ្ណា