AKP ភ្នំពេញ ថ្ងៃទី០៧ ខែសីហា ឆ្នាំ២០២៥-- ឯកឧត្ដម ប៉ែន កុសល្យ ប្រធានគណៈកម្មាធិការសាខាកាកបាទក្រហមខេត្តត្បូងឃ្មុំ នាព្រឹកថ្ងៃពុធ ទី០៥ ខែសីហា ឆ្នាំ២០២៥ បានដឹកនាំក្រុមការងារចុះទៅពិនិត្យអំពីស្ថានភាពប្រជាពលរដ្ឋរងគ្រោះដោយសារជំនន់ទឹកទន្លេមេគង្គចំនួន៨៦៦គ្រួសារ មកពីភូមិព្រែកតូច ឃុំជីរោទិ៍ទី១ ចំនួន៤៤៦គ្រួសារ និងភូមិព្រែកតូច ឃុំទន្លេបិទ ចំនួន៤២០គ្រួសារ ដែលបានផ្លាស់ទីមកស្នាក់នៅលើទីទួលសុវត្ថិភាពឧកញ៉ា អាន ម៉ាឌី និងឧកញ៉ា វ័ន ប៊ុនថៃ ស្ថិតនៅក្នុងភូមិព្រែកតូច ឃុំជីរោទិ៍ទី១ ស្រុកត្បូងឃ្មុំ ខេត្តត្បូងឃ្មុំ។

ឯកឧត្តម ប៉ែន កុសល្យ បានពិនិត្យពីស្ថានភាពនៃការរស់នៅរបស់បងប្អូនប្រជាពលរដ្ឋភៀសខ្លួនខាងលើ និងចាត់ឱ្យក្រុមប្រតិបត្តិសាខា សហការជាមួយមន្ទីរពាក់ព័ន្ធរៀបចំបណ្ដាញសេវាកម្មនៅលើទួលសុវត្ថិភាព ដូចជាតបណ្ដាញទឹកប្រើប្រាស់ អំពូលសូឡាសម្រាប់បំភ្លឺផ្លូវ ប៉ុស្តិ៍សុខភាព ឬប៉ុស្តិ៍សង្រ្គោះសម្រាប់ជួយបម្រើផ្នែកសេវាសុខភាព។

ឯកឧត្តមក៏សូមឱ្យបងប្អូនប្រុងប្រយ័ត្នអំពីសត្វអសិរពិសដែលអាចបង្កផលប៉ះពាល់ក្នុងពេលនេះ និងសូមប្រុងប្រយ័ត្នមើលថែរក្សាកូនតូចៗកុំឱ្យចុះទៅលេងទឹកខ្លាចក្រែងលង់ទឹកស្លាប់បាត់បង់ជិវិតដោយការធ្វេសប្រហែសមួយពេលរបស់បងប្អូន៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)