AKP ភ្នំពេញ ថ្ងៃទី៣១ ខែកក្កដា ឆ្នាំ២០២៥-- ឯកឧត្តម ជា ថោយ រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងារចុះសួរសុខទុក្ខវីរកងទ័ពជួរមុខដែលរងរបួស កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ដែលជាការលើកទឹកចិត្តដល់វីរកងទ័ពរួបរួមសាមគ្គីគ្នាជាធ្លុងមួយ គឹសមរភូមិមុខ ផ្សារភ្ជាប់ជាមួយសមរភូមិក្រោយ កាលពីរសៀលថ្ងៃទី៣០ ខែកក្កដា ឆ្នាំ២០២៥។

ឯកឧត្តមរដ្ឋលេខាធិការបានសម្ដែងនូវការដឹងគុណជាអនេកប្បការដល់វីរកងទ័ពទាំងអស់ ដែលហ៊ានបូជា សាច់ស្រស់ ឈាមស្រស់ ហ៊ានលះបង់ទាំងគ្រួសារ តស៊ូជាមួយសត្រូវ ដើម្បីការពារបូរណភាពទឹកដី ការពារប្រជារាស្ត្រ  គឹ ជាតិ សាសនា និង ព្រះមហាក្សត្រ  និងបានជូនពរដល់បងៗកងទ័ពទាំងអស់ដែលកំពុងសម្រាកព្យាបាលរបួសសូមឱ្យបានឆាប់ជាសះស្បើយ និងមានសុខភាពល្អឡើងវិញ។

ឯកឧត្តមរដ្ឋលេខាធិការបាននាំយកថវិការបស់ឯកឧត្តមរដ្ឋមន្រ្តី ប៉េង ពោធិ៍នា ជូនដល់យោធិនដែលកំពុងសម្រាកព្យាបាលចំនួន៦នាក់ ដោយក្នុងម្នាក់ៗទទួលបានថវិកាចំនួន១លានរៀល និងឧបត្ថម្ភថវិកាដល់លោកគ្រូពេទ្យ អ្នកគ្រូពេទ្យ សរុបចំនួន៣លាន២សែនរៀល៕

ដោយ៖ ពេជ្រ សំអឿន