AKP ភ្នំពេញ ថ្ងៃទី៣១ ខែកក្កដា ឆ្នាំ២០២៥-- ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីសុខាភិបាល រួមជាមួយថ្នាក់ដឹកនាំ បន្តដំណើរឆ្ពោះទៅខេត្តបាត់ដំបង សួរសុខបងប្អូនប្រជាពលរដ្ឋ កំពុងសម្រាកព្យាបាល នៅមន្ទីរពេទ្យបង្អែកខេត្តបាត់ដំបង នារសៀលថ្ងៃទី៣០ ខែកក្កដា ឆ្នាំ២០២៥ និងពិនិត្យគាំទ្រភាពជាអ្នកដឹកនាំ គ្រប់គ្រងបុគ្គលិកសុខាភិបាល។

ក្នុងការចុះពិនិត្យនេះដែរ ឯកឧត្តមសាស្រ្តាចារ្យរដ្ឋមន្រ្តីបានណែនាំបន្ថែមដល់មន្រ្តីសុខាភិបាល ត្រូវផ្តោតសំខាន់លើផ្នែកសង្រ្គោះបន្ទាន់ (Emergency Care) ផ្នែកសង្រ្គោះកម្រិតធ្ងន់ (ICU) និងជំនាញវះកាត់ឱ្យកាន់តែល្អប្រសើរជាប់ជាប្រចាំ៖ ១-មន្ទីរពេទ្យត្រូវបង្កើនការបណ្តុះបណ្តាលបន្តគ្រូពេទ្យជំនាញបន្ថែមទៀត ដែលនេះជាគន្លឹះអាយុជីវិតអាជីពជាពេទ្យ។ ២-ការបណ្តុះបណ្តាលអាចធ្វើបាននៅគ្រប់មន្ទីរពេទ្យថ្នាក់ជាតិ ជាពិសេសមន្ទីរពេទ្យកាល់ម៉ែតដែលជាមន្ទីរពេទ្យសម្ព័ន្ធមេត្រី ក្នុងការជួយគាំទ្រដល់មន្ទីរពេទ្យខេត្តបាត់ដំបងផងដែរ។ ៣- ចំពោះមន្រ្តីសុខាភិបាលត្រូវចែករំលែកគ្នា ចំពោះអ្នកដែលមានចំណេះជំនាញខ្ពស់ ទៅអ្នកដែលមានកម្រិតទាបជាង។ ៤-ត្រូវធ្វើការប្រមូលផ្តុំគ្នា ពិភាក្សាគ្នា ក្នុងការស្វែងរកដោះស្រាយដែលស្មាគស្មាញ ឱ្យបានទាន់ពេលវេលា និងមានប្រសិទ្ធភាពខ្ពស់ (RCP urgente 24h/7d, Grande RCP)។

បន្ថែមពីនេះ ឯកឧត្តមសាស្រ្តាចារ្យរដ្ឋមន្រ្តីបានសម្ដែងការកោតសរសើរ និងថ្លែងអំណរគុណដល់ ថ្នាក់ដឹកនាំ មន្រ្តីរាជការ បុគ្គលិកសុខាភិបាលនៃមន្ទីរពេទ្យខេត្តបាត់ដំបង ក្នុងការបម្រើសេវាសុខាភិបាល ជូនប្រជាពលរដ្ឋ ដោយទឹកចិត្ត និងឆន្ទៈខ្ពស់។ ឯកឧត្តមសាស្រ្តាចារ្យបានពាំនាំប្រគល់ជូនអំណោយមួយចំនួនដល់មន្រ្តីសុខាភិបាលខេត្តបាត់ដំបង ដើម្បីជាលើកទឹកចិត្តដល់មន្រ្តីសុខាភិបាល ដែលខិតខំក្នុងបំពេញការងារយ៉ាងសកម្ម មោះមុត ជាមួយស្មារតីទទួលខុសត្រូវ។

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)