AKP  ភ្នំពេញ ថ្ងៃទី២៧ ខែកក្កដា ឆ្នាំ២០២៥ -- អ្នកនាំពាក្យរដ្ឋាភិបាលបានលើកឡើងថា គំនិតផ្តួចផ្តើមស្តីពីបទឈប់បាញ់ របស់ឯកឧត្ដមប្រធានាធិបតីសហរដ្ឋអាមេរិក ដូណាល់ ត្រាំ សម្រាប់ជម្លោះកម្ពុជា-ថៃ ជាសញ្ញាវិជ្ជមាន ហើយសម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា សង្ឃឹមថា ថៃនឹងមិនផ្លាស់ប្តូរជំហរដែលបានព្រមព្រៀងគ្នានេះដូចពេល នាយករដ្ឋមន្រ្តីម៉ាឡេស៊ី សម្របសម្រួល ហើយអនុវត្តន៍ឱ្យបានឆាប់។

ថ្លែងក្នុងសន្និសីទសារព័ត៌មានស្ដីពីបច្ចុប្បន្នភាពស្ថានការណ៍នៃការឈ្លានពានរបស់ភាគីថៃមកលើដែនអធិបតេយ្យភាពកម្ពុជា នៅទីស្ដីការគណៈរដ្ឋមន្ត្រី នាព្រឹកថ្ងៃទី២៧ ខែកក្កដា ឆ្នាំ២០២៥ ឯកឧត្តម ប៉ែន បូណា រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានអង្គភាពអ្នកនាំពាក្យរាជរដ្ឋាភិបាលបានបញ្ជាក់ថា នៅក្នុងកិច្ចសន្ទនារវាងសម្តេចបបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងឯកឧត្ដម ដូណាល់ ត្រាំ ប្រធានាធិបតីសហរដ្ឋអាមេរិក កាលពីយប់ថ្ងៃទី២៧ ខែកក្កដា ឆ្នាំ២០២៥ គឺលោកមិនចងឃើញមានការប្រយុទ្ធគ្នាដែលនាំឱ្យមានមនុស្សស្លាប់ច្រើន និងរបួសទាំងសង្ខាងដោយគិតទាំងកងទ័ព និងប្រជាជនស៊ីវិលនោះទេ។ ដូច្នេះ ហើយបានជាប្រធានាធិបតីសហរដ្ឋអាមេរិក បានបញ្ជាក់ថា លោកតែងតែខិតខំសម្របសម្រួលដើម្បីបញ្ចប់ដោយជោគជ័យនៃការប្រយុទ្ធគ្នានៅតាមបណ្តាប្រទេសជាច្រើននៅក្នុងពិភពលោក។ 

ពាក់ព័ន្ធនឹងការឈ្លានពានពីសំណាក់កងទ័ពថៃ មកលើដែនអធិបេតេយ្យភាពកម្ពុជា ត្រូវបានអ្នកនាំពាក្យរាជរដ្ឋាភិបាលកម្ពុជាបាន ស្រង់សម្តីលោកប្រធានាធិបតីសហរដ្ឋអាមេរិកមកបញ្ជាក់ថា លោកចង់ឃើញការឈប់បាញ់គ្នាភ្លាមៗ ហើយនឹងចង់ឃើញសន្តិភាពកើតមានរវាងប្រទេសកម្ពុជា និងថៃ។ ឯកឧត្ដមអ្នកនាំពាក្យបានបន្ដថា ជាការឆ្លើយតបសម្តេចមហាបវរធិបតី ហ៊ុន ម៉ាណែត គឺបានបញ្ជាក់ពីជំហរយ៉ាងច្បាស់ជា មួយប្រធានាធិបតីសហរដ្ឋអាមេរិក ដូណាល់ ត្រាំ (Donald Trump) ថា កម្ពុជាឯកភាពជាមួយសំណើឱ្យមានការឈប់បាញ់ភ្លាមៗ និងដោយឥតលក្ខខណ្ឌរវាងកងទ័ពប្រទេសទាំងពីរ។ ជាក់ស្ដែងជំហរនេះសម្តេចធិបតីក៏ធ្លាប់បានបញ្ជាក់ជាមួយឯកឧត្ដម Anwar Ibrahim នាយករដ្ឋមន្ត្រីម៉ាឡេស៊ី និងជាប្រធានប្ដូរវេនអាស៊ានកាលពីថ្ងៃទី២៤ ខែកក្កដា កន្លងទៅនេះ។ 

ឯកឧត្តម ប៉ែន បូណា បានបញ្ជាក់បន្ថែមថា ជំហររបស់សម្តេចបវរធិបតី ហ៊ុន ម៉ាណែត ជាប្រមុខនៃរាជរដ្ឋាភិបា លកម្ពុជា គឺចង់បានសន្តិភាព និងមិនចង់ឱ្យមានការផ្ទុះអាវុធជាមួយប្រទេសណាមួយនោះទេ ហើយកក្តាសុខសន្តិភាព គឺជាជំហរយ៉ាងដាច់ខាតរបស់រាជរដ្ឋាភិបាលកម្ពុជា តែងតែងចង់បាន។ ឯកឧត្តមអ្នកនាំពាក្យរាជរដ្ឋាភិបាលកម្ពុជាក៏បានគូសបញ្ជាក់បន្ថែមថា៖ «សម្តេចបវរធិបតី ហ៊ុន ម៉ាណែត ក៏បានជូនដំណឹងទៀតថា ជាដំណឹងមួយដែលល្អ បន្ទាប់ពីមានកិច្ចសន្ទនារវាងសម្តេច និងឯកឧត្តមប្រធានាធិបតី ដូណាល់ ត្រាំ ឯកឧត្តម ប្រធានាធិបតី អាម៉េរិក ក៏ទូរស័ព្ទទាក់ទងជាមួយឯកឧត្តម Phumtham Wechayachai នាយករដ្ឋមន្ត្រីស្តីទីថៃ ដើម្បីដាក់សំណើដូចគ្នា ហើយឯកឧត្តម ដូណាល់ ត្រាំ បានជូនដំណឹងមកសម្តេចបវរធិបតី វិញថា ភាគីថៃ បានឯកភាពជាមួយសំណើរបស់ឯកឧត្តមប្រធានាធិបតី ស្តីពីការឈប់បាញ់គ្នាភ្លាមផងដែរ។ នេះគឺជាដំណឹងដ៏ល្អសម្រាប់កងទ័ព និងប្រជាជននៃប្រទេសទាំងពីរ ហើយសម្តេចសង្ឃឹមថាភាគីថៃ នឹងមិនកែប្រែជំហរមួយនេះដូច ដែលខ្លួនបានធ្វើ កាលពីថ្ងៃទី២៤ ខែកក្កដា ដែលបានព្រមព្រៀងសន្យារជាមួយ Anwar Ibrahim នោះទេ»។

ជាមួយគ្នានេះដែរ បើតាម ឯកឧត្ដម ប៉ែន បូណា អ្នកនាំពាក្យរាជរដ្ឋាភិបាល សម្តេចបវរធិបតី ហ៊ុន ម៉ាណែត បានប្រគល់ភារកិច្ចជូនលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ ឱ្យបន្តកិច្ចការងារនេះដោយពិភាក្សាជាមួយឯកឧត្ដម Marco Rubio រដ្ឋមន្ត្រីការបរទេសសហរដ្ឋអាមេរិកដើម្បីសម្របសម្រួលជាមួយភាគីថៃ ក្នុងគោលដៅឈានទៅអនុវត្តន៍គោលការណ៍ដែលបានព្រមព្រៀងគ្នាឱ្យបានឆាប់រហ័ស ដែលអាចបញ្ចប់ការស្លាប់និងរបួសរបស់កងទ័ពនិងប្រជាពលរដ្ឋទាំងសងខាង។ ទន្ទឹមនេះ សម្តេចធិបតីក៏សូមអរគុណប្រធានាធិបតី Donald Trump ដែលបានផ្តួចផ្ដើមគំនិត និងសម្របសម្រួលដើម្បីស្វែងរកការឈប់បាញ់ភ្លាម និងសន្តិភាពរវាងកម្ពុជានិងថៃនាពេលនេះ។ លទ្ធផលដ៏ល្អនេះពិតជានឹងជួយការពារអាយុជីវិតរបស់កងទ័ព និងដូចប្រជាពលរដ្ឋស៊ីវិលជាច្រើននាក់ទាំងខ្មែរ ទាំងថៃ ដែលអាចបាត់បង់ដោយសារការប្រយុទ្ធគ្នា ឬក៏រងរបួស និងជួយឱ្យជនភៀសខ្លួនរាប់សែននាក់អាចបានត្រឡប់ទៅរស់នៅ ក្នុងភូមិឋានរបស់ ខ្លួនវិញ ដើម្បីបន្តដំណើរការជីវិតជាប្រចាំថ្ងៃរបស់ពួកគាត់ដោយសេចក្តីសុខនិងសន្តិភាព។

សូមជម្រាបជូនថា ទោះបីមានការសម្របសម្រូលពីប្រធានាធិបតីសហអាមេរិកយ៉ាងណាក្តី រហូតមកដល់ម៉ោងជិត៧ នាព្រឹកថ្ងៃទី២៧ ខែកក្កដានេះ សមរភូមិប្រយុទ្ធមិនទាន់ស្ងប់ស្ងាត់នោះទេ ពោលនៅបន្តវាយគ្នា ដដែល។ ដោយឡែកនៅសមរភូមិប្រាសាទតាមាន់ និងជប់គរគី ទាហានឈ្លានពានថៃ បានចាប់ផ្តើមបាញ់ចូលដីកម្ពុជា នៅវេលាម៉ោងជាង ៤ទៀបភ្លឺ ថ្ងៃទី២៧ ខែកក្កដា ឆ្នាំ២០២៥ ហើយរហូតមកដល់ម៉ោងជិត៧ ថ្ងៃដដែលនេះ ការប្រយុទ្ធគ្នាមិនទាន់ចប់នៅឡើយទេ៕

ដោយ៖ ប៊ុនរិទ្ធ