AKP ព្រះសីហនុ ថ្ងៃទី២៧ ខែកក្កដា ឆ្នាំ២០២៥ -- រដ្ឋបាលខេត្តព្រះសីហនុសូមជម្រាបជូនឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រីជាមន្ត្រីរាជការ នៃមន្ទីរ អង្គភាពជុំវិញខេត្ត រដ្ឋបាលក្រុង ស្រុក ឃុំ សង្កាត់ និងពាណិជ្ជករ សហគ្រិន សប្បុរសជន ព្រម ទាំងបងប្អូនប្រជាពលរដ្ឋក្នុងខេត្តព្រះសីហនុ មេត្តាជ្រាបថា ក្នុងបុព្វហេតុមនុស្សធម៌ដើម្បីចូលរួមគាំទ្រ និងលើកទឹកចិត្តដល់វីរកងទ័ពជួរមុខកម្ពុជា ដែលបាននឹងកំពុងប្រយុទ្ធយ៉ាងអង់អាចក្លាហាន ដើម្បីការពារបូរណភាពទឹកដីតតាំងជាមួយសត្រូវឈ្លានពានមកលើដែនអធិបតេយ្យភាពរបស់កម្ពុជា។ ក្នុងន័យនេះរដ្ឋបាលខេត្តព្រះសីហនុ នឹងរៀបចំជាថវិកា ស្បៀងអាហារ គ្រឿងឧបភោគ បរិភោគ សម្ភារប្រើប្រាស់នានា ព្រមទាំងថ្នាំពេទ្យ ដើម្បីយកទៅឧបត្ថម្ភជូនដល់វីរកងទ័ពជួរមុខដែលបាននឹងកំពុងខិតខំតស៊ូការពារតាមបន្ទាត់ព្រំដែនកម្ពុជា-ថៃ ប្រកបដោយភាពក្លាហាន មោះមុត ប្រឆាំងនឹងសត្រូវឈ្លានពានប្រកបដោយស្មារតីស្នេហាជាតិមាតុភូមិ ព្រមទាំងបងប្អូនប្រជាពលរដ្ឋ ដែលត្រូវបានជម្លៀសខ្លួនមកកាន់មណ្ឌលសុវត្ថិភាពនានាក្នុងខេត្តព្រះវិហារ ខេត្តឧត្តរមានជ័យ និងបណ្តាខេត្តជាប់ព្រំដែនកម្ពុជា-ថៃ ដែលរងគ្រោះដោយការឈ្លានពានពីសំណាក់កងទ័ពថៃ។ ដើម្បីបង្ហាញពីមនោសញ្ចេតនាដ៏ជ្រាលជ្រៅ និងទឹកចិត្តសប្បុរសធម៌ ក្នុងការចូលរួមលើកទឹកចិត្តដល់វីរកងទ័ពតាមបន្ទាត់ព្រំដែនជួរមុខ និងបងប្អូនប្រជាពលរដ្ឋដែលទទួលរងនូវផលប៉ះពាល់។

រដ្ឋបាលខេត្តព្រះសីហនុសូមអំពាវនាវឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រីជាមន្ត្រីរាជការនៃមន្ទីរ អង្គភាពជុំវិញខេត្ត រដ្ឋបាលក្រុង ស្រុក ឃុំ សង្កាត់ និងពាណិជ្ជករ សហគ្រិន សប្បុរសជន ព្រម ទាំងបងប្អូនប្រជាពលរដ្ឋក្នុងខេត្តព្រះសីហនុ មេត្តាចូលរួមបរិច្ចាគអំណោយជាថវិកា ស្បៀងអាហារ គ្រឿងឧបភោគ បរិភោគ សម្ភារប្រើប្រាស់ផ្សេងៗ ឬថ្នាំពេទ្យតាមលទ្ធភាព និងសទ្ធាជ្រះថ្លារៀងៗខ្លួនដោយទឹកចិត្តសប្បុរសធម៌ដែលជាវប្បធម៌នៃការចែក រំលែកក្នុងស្មារតីសមរភូមិក្រោយជួយគាំទ្រដល់សមរភូមិមុខ។

ក្រុមការងារនៃរដ្ឋបាលខេត្តព្រះសីហនុរង់ចាំទទួលនូវអំណោយសប្បុរសធម៌របស់ឯកឧត្តម លោកជំទាវ លោកអ្នក ឧកញ៉ា អ្នកឧកញ៉ា ឧកញ៉ា លោក លោកស្រី គ្រប់ពេលវេលា ឬអាចទំនាក់ទំនងផ្ទាល់នៅវេទិកា ៧មករា ស្ថិតនៅសង្កាត់លេខ៣ ក្រុងព្រះសីហនុ ខេត្តព្រះសីហនុ ឬទំនាក់ទំនងតាមរយៈលេខទូរស័ព្ទ ០១១ ៧២៥ ៧៧៧ /០៦៦ ៨៧៧ ៨៧៧/ ០១២ ៩៩៣ ៧៧៦ ឬ គណនីធនាគារ ABA ឈ្មោះ៖ SIHANOUK PROVINCIAL HALL លេខ៖ 070 119 791 (KHR) និងលេខ៖ 070 119 792 (USD) ឬតំណ QR Code ទាំងប្រាក់រៀល និងដុល្លារ៕

ដោយ ងូ សុមុនី