AKP ភ្នំពេញ ថ្ងៃទី២៦ ខែកក្កដា ឆ្នាំ២០២៥ -- នៅក្នុងកិច្ចប្រជុំបិទទ្វារតាមដំណើររបស់ភាគីកម្ពុជាក្នុងការបើកកិច្ចប្រជុំបន្ទាន់នោះ ក្រុមប្រឹក្សាសន្តិសុខអង្គការសហប្រជាជាតិបានលើកយកពីករណីរបស់ភាគីថៃបានធ្វើការក្រឡាស់សំដីពីការសម្របសម្រួលពីនាយករដ្ឋមន្ត្រីម៉ាឡេស៊ី ដែលជាប្រធានអាស៊ានប្តូរវេនស្នើឱ្យមានបទឈប់បាញ់រវាងកម្ពុជា-ថៃ។ នេះបើតាមការថ្លែងបញ្ជាក់ឱ្យដឹងរបស់ឯកឧត្ដម ជុំ សន្ទរី រដ្ឋលេខាធិការ និងអ្នកនាំពាក្យក្រសួងការបរទេស និងសហប្រតិបត្តិការអន្ដរជាតិក្នុងសន្និសីទសារព័ត៌មានពាក់ព័ន្ធស្ថានការណ៍នៃការឈ្លានពានរបស់ភាគីថៃមកលើដែនអធិបតេយ្យភាពកម្ពុជា នាព្រឹកថ្ងៃទី២៦ ខែកក្កដា ឆ្នាំ២០២៥។

ឯកឧត្តម ជុំ សុន្ទរី បានថ្លែងបញ្ជាក់ថា នៅមុនកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ ក្រុមប្រឹក្សាសន្តិសុខបានចេញរបាយការណ៍ចំនួនពីរ គឺទី១. បានទទួលសំណើសុំពីកម្ពុជាឱ្យមានកោះប្រជុំជាបន្ទាន់របស់ក្រុមប្រឹក្សាសន្តិសុខអង្គកាសហប្រជាជាតិ។ ទី២. របាយការណ៍បានលើកឡើងពីការសម្របសម្រួលរបស់នាយករដ្ឋមន្ត្រីម៉ាឡេស៊ី ស្នើឱ្យមានការឈប់បាញ់គ្នារវាងភាគីទាំងពីរ ហើយភាគីកម្ពុជាបានទទួលយក។ ចំណែកភាគីថៃ ក្នុងរបាយការណ៍បានគូសបញ្ជាក់ថា ដំបូងទទួលយកសំណើ ប៉ុន្តែបន្ទាប់មកថៃបានផ្លាស់ប្តូរក្រឡាស់ជំហរមិនទទួលយកវិញ។

ឯកឧត្ដមអ្នកនាំពាក្យក្រសួងការបរទេសកម្ពុជាបានឱ្យដឹងទៀតថា នៅក្នុងកិច្ចប្រជុំតំណាងអចិន្ត្រៃយ៍របស់កម្ពុជាប្រចាំអង្គការសហប្រជាជាតិបានថ្លែងការណ៍ពីការវាយលុកដោយទ្រង់ទ្រាយធំរបស់កងកម្លាំងប្រដាប់អាវុធថៃមកលើកម្ពុជាចាប់ពីថ្ងៃទី២៤ ខែកក្កដា ឆ្នាំ២០២៥ លើទីតាំងមួយចំនួន របស់ប្រទេសកម្ពុជាតាមបណ្តោយព្រំដែន រួមទាំងប្រាសាទព្រះវិហារ  ប្រាសាទតាក្របី  តំបន់មុំបី។ ជាមួយគ្នានេះ ការវាយលុកនេះ ភាគីថៃបានប្រើប្រាស់យន្តហោះប្រយុទ្ធ F-16  រថក្រោះ  គ្រាប់បែកចង្កោម និងសព្វាវុធធុនធ្ងន់ៗផ្សេងៗជាច្រើនទៀត។ ឯកឧត្ដមបានបន្ដថា តំណាងកម្ពុជាក៏បានឡើងពីការខូចខាតទីតាំងលំនៅឋានរបស់ប្រជាជនកម្ពុជាមួយចំនួន និងបេតិកភណ្ឌវប្បធម៌កម្ពុជាមួយចំនួនបន្ទាប់ពីកងកម្លាំងប្រដាប់អាវុធថៃបានធ្វើការវាយលុក។ លើសពីនេះតំណាងអចិន្ត្រៃយ៍កម្ពុជាក៏បានលើកឡើងពីការអំពាវនាវរបស់កម្ពុជាឱ្យមានការឈប់បាញ់គ្នាជាបន្ទាន់ និងគ្មានលក្ខខណ្ឌ  ហើយមានដំណោះស្រាយដោយសន្តិវិធី។

ក្នុងឱកាសនោះ ឯកឧត្តមអ្នកនាំពាក្យក្រសួងការបរទេសកម្ពុជាបានអះអាងផងដែរថា នៅក្នុងកិច្ចប្រជុំសមាជិកក្រុមប្រឹក្សាសន្តិសុខអង្គការសហប្រជាជាតិ ក៏បានអំពាវនាវឱ្យភាគីទាំងពីរមានការអត់ធ្មត់ ឱ្យបានជាអតិបរមា ហើយក៏បានអំពាវនាវឱ្យមានដំណោះស្រាយដោយសន្តិវិធី និងបញ្ចប់ការបាញ់គ្នាដោយប្រដាប់អាវុធ។ ទន្ទឹមនេះ ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជាបានបន្ថែមថា ក្រោយកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ អ្នកនាំពាក្យអគ្គលេខាធិការអង្គសហប្រជាជាតិបានប្រាប់អ្នកសារព័ត៌មាន ដោយបានស្នើឱ្យភាគីទាំងពីរមានភាពអត់ធ្មត់ដោយអតិបរមាជាទីបំផុត៕

ដោយ៖ ប៊ុនរិទ្ធ