AKPកំពង់ធំ ថ្ងៃ​ទី២៦ ខែកក្កដា ឆ្នាំ២០២៥ -- លោក អ៊ុន បុត្ត អភិបាលរងខេត្តកំពង់ធំនិងលោកស្រី លោក ទី ថាវី អភិបាលរងស្រុកសណ្ដាន់និងក្រុមការងារថ្នាក់ស្រុក ឃុំបាននាំយកទៀនព្រះវស្សា បច្ច័យមួយចំនួននិងទេយ្យទានប្រគេន​ដល់ព្រះសង្ឃ​ដែល​គង់​ចាំ​ព្រះ​វស្សា​ចំនួន៤វត្តនិងអាស្រម១រួមមាន÷ វត្តបឹងក្រូច វត្តជាំស្វាយ វត្តកំប៉ើយ វត្តរ៉ងក្នាយនិងអាស្រមជ័យនូ ស្ថិតនៅឃុំមានរិទ្ឋ ស្រុកសណ្ដាន់ ខេត្តកំពង់ធំ។

ក្នុងឱកាសនោះលោកអ៊ុន បុត្ត បានពាំនាំនៅការផ្ដាំផ្ញើសាកសួរសុខទុក្ខពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាលសម្ដេចតែងតែមានការព្រួយបារម្ភពីសុខទុក្ខនិងជីវភាពរស់នៅរបស់បងប្អូនប្រជាពលរដ្ឋនិងព្រះសង្ឃព្រមទាំង ពុទ្ធបរិស័ទទាំងអស់និងសូមប្រគេនពរជូនដល់ព្រះតេជគណព្រះសង្ឃគ្រប់ព្រះអង្គ និងជូនពរដល់លោកយាយ លោកតា បងប្អូនប្រជាពលរដ្ឋទាំងអស់ សូមទទួលបាននូវសេចកីសុខ សេចក្តីចម្រើន សុខភាពល្អនិងអាយុយឺនយូរ ដើម្បីចូលរួមចំណែកក្នុងការកសាងវិស័យ​ព្រះ​ពុទ្ធ​សាសនា​ ដែល​ជា​សាសនា​របស់​រដ្ឋ​ និងអភិវឌ្ឍប្រទេសជាតិយើងឱ្យមានការរីកចម្រើនរុងរឿងបន្ថែមទៀត។

លោកអ៊ុន បុត្តបានលើកឡើងថាការប្រគេនទៀនព្រះវស្សា និងទេយ្យទាន ទេយ្យវត្ថុ ប្រគេនជូនវត្តចំនួន៥នៅក្នុងភូមិសាស្ត្រ ឃុំមានរិទ្ឋ ស្រុកសណ្តាន់ ដើម្បីប្រគេនព្រះសង្ឃ និងភិក្ខុសង្ឃគង់ចាំព្រះវស្សាចំនួន៣ខែនៅតាមវត្តអារាមនានាដែលនារដូវកាលនេះ ព្រះសង្ឃត្រូវចៀសវាងការធ្វើដំណើរទៅឆ្ងាយក្នុងរដូវវស្សា។នេះក៏ជាឱកាសសម្រាប់ព្រះសង្ឃពង្រឹងសមាធិ និងការសិក្សាគម្ពៃព្រះធម៌ ដើម្បីឱ្យជ្រូតជ្រាបកាន់តែច្បាស់ ក្នុងវិស័យព្រះពុទ្ធសាសនាដល់ព្រះសង្ឃ ដែលគង់ចាំព្រះវស្សាតាមវត្តអារាមរៀងៗខ្លួន ។

លោក អ៊ុន បុត្តបានបញ្ជាក់ទៀតថា ពិធីចូលវស្សា គឺជាបុណ្យសាសនាដ៏សំខាន់មួយក្នុងព្រះពុទ្ធសាសនា ដែលត្រូវប្រារព្ធធ្វើឡើងចាប់ពីថ្ងៃ១រោច ខែអាសាឍ រហូតដល់ថ្ងៃ១៥កើតខែភទ្របទ រយៈពេល៣ខែ។ពិធីនេះតំណាងឱ្យការចាប់ផ្តើមវស្សារបស់ព្រះសង្ឃនិងជាឱកាសសម្រាប់ពុទ្ធសាសនិកជនពង្រឹងសីលធម៌ និងសុជីវធម៌របស់ខ្លួន ។ ក្នុងអំឡុងពិធីនេះ ព្រះសង្ឃបានរៀបចំការប្រកាសចូលវស្សារៀបចំព្រះវិហារនិងកន្លែងសមាធិ និងការរក្សាសីល ហើយពិធីនេះក៏ជាឱកាសដល់ពុទ្ធសាសនិកជនធ្វើកុសលកម្ម បំពេញបារមី និងពង្រឹងសទ្ធាដល់ព្រះសង្ឃហើយព្រះសង្ឃក៏ប្រើពេលនេះដើម្បីព្យាយាមបំពេញវិបស្សនាធម៌ និងផ្សព្វផ្សាយព្រះធម៌ ដល់ពុទ្ធបរិស័ទ្ធ ។

សូមបញ្ជាក់ថាសម្រាប់វត្តចំនួន៤វត្តនិងអាស្រម១ ក្នុង១វត្តទទួលបានទានព្រះវស្សា០១គូ មី ៥កេសទឹកត្រី៥យួរ ទឹកស៊ីអ៉ីវ ៥យួរ តែ ៥កញ្ចប់ ទឹកផ្លែឈើ ៥កេស អង្ករ ៥០គីឡូក្រាម ទឹកបរិសុទ្ធ៤កេសនិងថវិកា ៤០ម៉ឺនរៀល។សម្រាប់លោកតាអាចារ្យចំនួន៥នាក់ ក្នុងម្នាក់ទទួលបានថវិកា ៥ម៉ឺនរៀលនិងប្រជាការពារចំនួន៦នាក់ក្នុងម្នាក់ៗ ថវិកា២ម៉ឺនរៀលផងដែរ៕

ដោយ៖ ស៊ុម វណ្ណា