AKP ភ្នំពេញ ថ្ងៃទី២៦ ខែកក្កដា ឆ្នាំ២០២៥ -- កាន់តែគឃ្លើន នៅព្រឹកថ្ងៃនេះ ទាហានថៃបានបើកការវាយប្រហារចូលដល់ទឹកដីស្រុកវាលវែង ខេត្តពោធិ៍សាត់។ នេះបើតាមការថ្លែងរបស់ អ្នកនាំពាក្យក្រសួងការពារជាតិ។

ក្នុងសន្និសីទសារព័ត៌មាននៅទីស្ដីការគណៈរដ្ឋមន្ត្រី  នាព្រឹកថ្ងៃទី២៦ ខែកក្កដា ឆ្នាំ២០២៥នេះ លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានថ្លែងថា ការឈ្លានពានរបស់ថៃបានពង្រីករាលដាលដល់ទីតាំងនៃខេត្តផ្សេងរបស់កម្ពុជា។

លោកជំទាវឧត្តមសេនីយ៍ឯក ម៉ាលី សុជាតា បានថ្លែងឱ្យដឹងថា«ចាប់ផ្ដើមតាំងពីវេលាម៉ោង៥និង២នាទីថ្ងៃទី២៦ខែកក្កដា ឆ្នាំ២០២៥ ភាគីថៃបានបើកការវាយប្រហារដោយកាំភ្លើងធំចំនួន៥គ្រាប់មកលើទីតាំងជាច្រើន នៅក្នុងភូមិសាស្ត្រឃុំថ្មដា ស្រុកវាលវែង ខេត្តពោធិ៍សាត់ នៅក្នុងនោះផងដែរ តាមការទទួលបានព័ត៌មានពីទីតាំងនៃយោធភាគទី៤  ថៃបានចាប់ផ្ដើមធ្វើការវាយប្រហារផងដែរនៅបីកន្លែងនៅក្នុងទីតាំង តាថាវ ជាំតែ និងវាលឥន្រ្ទី នៅក្នុងវេលាម៉ោង៥ព្រឹកដូចគ្នានៅថ្ងៃទី២៦នេះ»។

ជាមួយគ្នានេះ អ្នកនាំពាក្យក្រសួងការពារជាតិ បានព្រមានថា ព្រះរាជាណាចក្រកម្ពុជាសាជាថ្មីសូមធ្វើការថ្កោលទោសយ៉ាងដាច់អងហង្ការចំពោះអំពើឈ្លានពានរបស់ភាគីថៃ និងការបង្កហេតុ និងការត្រៀមទុកជាមុនរបស់ភាគីថៃ ព្រះរាជាណាចក្រកម្ពុជាសូមបញ្ជាក់ជាថ្មីអំពីការប្ដេជ្ញាចិត្តចំពោះការការពារចំពោះសុខសន្តិភាព។

ទោះជាយ៉ាងណា សូមរក្សាសិទ្ធិនៅក្នុងការការពារអធិបតេយ្យភាពរបស់ខ្លួនក្នុងនាមជាជនរងគ្រោះអំពីការរំលោភបំពានរបស់ភាគីថៃ។ កម្ពុជាសូមគូសបញ្ជាក់សាជាថ្មី កម្ពុជាឈរលើគោលការណ៍វាយប្រហារតែលើគោលដៅយោធារបស់ភាគីថៃ មិនមានគោលដៅវាយប្រហារលើជនស៊ីវិលណាមួយឡើយ៕

ដោយ៖ គង់ សិរីរ័ត្ន