AKP ភ្នំពេញ ថ្ងៃទី២៥ ខែកក្កដា ឆ្នាំ២០២៥ -- ក្រុម​ប្រឹក្សា​ស្រុក​ដែល​ជាប់​ឆ្នោត​ក្នុង​អំឡុង​ការ​បោះ​ឆ្នោត​នៅថ្ងៃ​ទី៥ ខែ​មិថុនា​របស់​ប្រទេស​ប៊ូរុនឌី​បាន​ទៅ​បោះ​ឆ្នោត​កាល​ពី​ថ្ងៃ​ពុធ ដើម្បី​ជ្រើស​រើស​សមាជិក​ព្រឹទ្ធ​សភា​ចំនួន ១០រូប ដែល​មាន​ ២​រូប​មក​ពី​ខេត្ត​នីមួយៗ​ក្នុង​ចំណោម​ខេត្ត​ទាំង​ ៥របស់​ប្រទេស។

យោងតាមរដ្ឋធម្មនុញ្ញ​ប្រទេស​ប៊ូរុនឌី បានឱ្យដឹងថា ខេត្តនីមួយៗមានសមាជិកព្រឹទ្ធសភាម្នាក់មកពីក្រុមជនជាតិភាគតិច Hutu និងម្នាក់មកពីក្រុមជនជាតិភាគតិច Tutsi ។ លើសពីនេះ សមាជិកព្រឹទ្ធសភាចំនួន ៣រូបនឹងត្រូវជ្រើសរើសរួមគ្នាដែលនាំឱ្យចំនួនសមាជិកព្រឹទ្ធសភាសរុបដល់ទៅ ១៣រូបសម្រាប់អាណត្តិ ៥ឆ្នាំខាងមុខ។

នៅក្នុងខេត្តចំនួនបួនគឺ ខេត្តប៊ូជុមប៊ូរ៉ា ខេត្តប៊ូរុនហ្គា ខេត្តប៊ូតាន់យេរ៉េរ៉ា និងខេត្តហ្គីតេហ្គា អ្នកចូលរួមបោះឆ្នោតជ្រើសរើសសមាជិកព្រឹទ្ធសភាគឺមាន ១០០% ខណៈដែលនៅក្នុងខេត្តប៊ូហ៊ូមូហ្សា សមាជិកក្រុមប្រឹក្សាស្រុកចំនួន ១៧៤នាក់ក្នុងចំណោម ១៧៥នាក់បានចូលរួមក្នុងការបោះឆ្នោត។

ការរាប់សន្លឹកឆ្នោតបានធ្វើឡើងបន្ទាប់ពីការបិទប្រតិបត្តិការបោះឆ្នោត ដោយក្រុមប្រឹក្សាជាតិការពារលទ្ធិប្រជាធិបតេយ្យ (CNDD-FDD) ដែលកំពុងកាន់អំណាចទទួលបានអាសនៈទាំង១០អាសនៈក្នុងខេត្តទាំង៥ ដូចដែលបានរាយការណ៍ដោយប្រព័ន្ធផ្សព្វផ្សាយក្នុងស្រុក។

ក្នុងអំឡុងពេលនៃការបោះឆ្នោតនីតិបញ្ញត្តិ និងការបោះឆ្នោតថ្នាក់ស្រុករួមគ្នាដែលបានធ្វើឡើងនៅថ្ងៃទី៥ ខែមិថុនា ក្រុមប្រឹក្សា CNDD-FDD ទទួលបានជ័យជម្នះដ៏លើសលប់ ដោយឈ្នះភាគច្រើននៃអាសនៈចំនួន ១.០៥០អាសនៈនៅក្នុងក្រុមប្រឹក្សាស្រុក។

ប្រទេសប៊ូរុនឌីគ្រោងនឹងរៀបចំការបោះឆ្នោតថ្នាក់ភូមិនៅថ្ងៃទី២៥ ខែសីហា។ ការបោះឆ្នោតប្រធានាធិបតីបន្ទាប់គឺគ្រោងសម្រាប់ឆ្នាំ២០២៧៕

ដោយ៖ មូល មិនា (ប្រភព៖ ស៊ីនហួ)