AKP ភ្នំពេញ ថ្ងៃទី២៥ ខែកក្កដា ឆ្នាំ២០២៥ -- ក្រសួងការបរទេសកូរ៉េខាងត្បូងបាននិយាយថា រដ្ឋមន្ត្រីការបរទេស លោក ចូ យ៉ុន (Cho Hyun) កាលពីថ្ងៃព្រហស្បតិ៍បានធ្វើការសន្ទនាតាមទូរស័ព្ទជាលើកដំបូងជាមួយសមភាគីជប៉ុនគឺ លោក តាកេស៊ី អ៊ីវ៉ាយ៉ា (Takeshi Iwaya) ដោយពិភាក្សាអំពីបញ្ហាក្នុងតំបន់ និងទំនាក់ទំនងទ្វេភាគី។

ក្នុងអំឡុងពេលសន្ទនា លោក ចូ បានសង្កត់ធ្ងន់លើសារៈសំខាន់នៃទំនាក់ទំនងរវាងទីក្រុងសេអ៊ូល-តូក្យូ ដោយលោកបាននិយាយថា ភាគីជប៉ុនគឺជាអ័ក្សសំខាន់នៃទំនាក់ទំនងការទូតជាក់ស្តែងរបស់រដ្ឋាភិបាលកូរ៉េខាងត្បូង រួមជាមួយនឹងកិច្ចសហប្រតិបត្តិការត្រីភាគីជាមួយទីក្រុងវ៉ាស៊ីនតោន។

លោក ចូ ដែលចូលកាន់តំណែងកាលពីថ្ងៃចន្ទ បានស្នើឱ្យប្រទេសទាំងពីរធ្វើការដើម្បីកសាងទំនាក់ទំនងដ៏រឹងមាំ និងតម្រង់ទិសនាពេលអនាគត ដោយផ្អែកលើការជឿទុកចិត្តគ្នា និងការយោគយល់គ្នាទៅវិញទៅមក។

យោងតាមក្រសួងបានឱ្យដឹងថា រដ្ឋមន្ត្រីការបរទេសជប៉ុនបានអបអរសាទរចំពោះលោក ចូ ដែលត្រូវបានតែងតាំង និងបង្ហាញពីបំណងចង់បន្ត និងពង្រឹងកិច្ចសហប្រតិបត្តិការជិតស្និទ្ធរបស់ពួកគេ។

ក្រសួងបានបន្ថែមថា រដ្ឋមន្ត្រីទាំងពីរបានឯកភាពលើតម្រូវការក្នុងការបង្កើនការយល់ដឹងគ្នាទៅវិញទៅមក និងធ្វើការយ៉ាងជិតស្និទ្ធជាមួយគ្នាលើវិស័យផ្សេងៗ ជាពិសេសក្នុងបញ្ហាប្រឈមសកលដ៏ស្មុគស្មាញ៕

ដោយ៖ មូល មិនា (ប្រភព៖ យ៉ុនហាប់)