AKP ភ្នំពេញ ថ្ងៃទី២៤ ខែកក្កដា ឆ្នាំ២០២៥ -- ទីភ្នាក់ងារសារព័ត៌មានInterfax-Ukraine បានរាយការណ៍កាលពីថ្ងៃពុធថា ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelensky) បានចុះហត្ថលេខាលើឯកសារមួយដើម្បីបង្កើតគណៈប្រតិភូដែលមានសមាជិកចំនួន ១៤រូបសម្រាប់កិច្ចពិភាក្សានាពេលខាងមុខជាមួយប្រទេសរុស្ស៊ី។

យោងតាមឯកសារដែលបានចេញផ្សាយនៅលើគេហទំព័រប្រធានាធិបតី បានឱ្យដឹងថា លោក រូស្ដេម យូមេរ៉ូវ (Rustem Umerov)លេខាធិការនៃក្រុមប្រឹក្សាសន្តិសុខ និងការពារជាតិអ៊ុយក្រែន នឹងដឹកនាំគណៈប្រតិភូអ៊ុយក្រែន។

ក្រុមចរចារួមមានទីប្រឹក្សាប្រធានការិយាល័យប្រធានាធិបតី លោក អូលេកសានដឺ បេវហ្ស៍ (Oleksandr Bevz) អគ្គសេនាធិការរងនៃកងកម្លាំងជើងទឹកអ៊ុយក្រែន លោក អូលេកសានដឺ ឌីយ៉ាកូវ (Oleksandr Dyakov)និងអនុរដ្ឋមន្ត្រីការបរទេសទីមួយ លោក សឺជី គីស្ទីតយ៉ា (Sergiy Kyslytsya) ។

គណៈប្រតិភូក៏មានតំណាងមកពីទីភ្នាក់ងារសន្តិសុខ និងចារកម្មអ៊ុយក្រែន កងកម្លាំងប្រដាប់អាវុធ និងសភាផងដែរ។

កិច្ចពិភាក្សា​គ្រោង​នឹង​ធ្វើ​ឡើង​នៅ​ទីក្រុង​អ៊ីស្តង់ប៊ុល​ ប្រទេសតួកគី​ នៅ​ថ្ងៃ​ពុធ។ ការ​ចរចា​លើក​មុន​រវាង​គណៈប្រតិភូ​អ៊ុយក្រែន និង​រុស្ស៊ី​បាន​ធ្វើ​ឡើង​នៅ​ថ្ងៃ​ទី​២ ខែ​មិថុនា៕

ដោយ៖ មូល មិនា (ប្រភព៖ ភីបផលដេលី)