AKP ភ្នំពេញ ថ្ងៃទី២១ ខែកក្កដា ឆ្នាំ២០២៥ -- ប្រធានាធិបតីសេណេហ្គាល់លោក បាសស៊ីរូ ឌីអូម៉ាយ៉េ ហ្វាយ៉េ (Bassirou Diomaye Faye) កាលពីថ្ងៃសៅរ៍បានទៅទស្សនាទីតាំងយោធាជាច្រើនដែលទើបប្រគល់ដោយប្រទេសបារាំងនាពេលថ្មីៗនេះ ជាអ្វីដែលប្រធានាធិបតីសេណេហ្គាល់បានពិពណ៌នាថាជា «ជំហានដ៏សំខាន់» ក្នុងការកំណត់រចនាសម្ព័ន្ធឡើងវិញនៃកិច្ចសហប្រតិបត្តិការយោធាទ្វេភាគី។

យោងតាមសេចក្តីថ្លែងការណ៍ផ្លូវការបានឱ្យដឹងថា លោក ហ្វាយ៉េបានត្រួតពិនិត្យទីតាំង មូលដ្ឋានទ័ព Ouakam មូលដ្ឋានទ័ព Bel Air និងមូលដ្ឋានទ័ពជើងទឹក ដែលឥឡូវនេះស្ថិតនៅក្រោមអធិបតេយ្យភាពប្រទេសសេណេហ្គាល់។ ដំណើរទស្សនកិច្ចនេះមានគោលបំណងវាយតម្លៃស្ថានភាពនៃហេដ្ឋារចនាសម្ព័ន្ធទាក់ទងនឹងកន្លែងស្នាក់នៅ ភស្តុភារនិងប្រតិបត្តិការ ព្រមទាំងវាយតម្លៃសក្តានុពលរបស់ពួកគេសម្រាប់ការប្រើប្រាស់នាពេលអនាគត។

ប្រធានាធិបតីបាននិយាយថា «ការប្រគល់គ្រឿងបរិក្ខារទាំងនេះដែលជាលទ្ធផលនៃការសន្ទនាទ្វេភាគីផ្អែកលើការគោរពគ្នាទៅវិញទៅមក បើកយុគសម័យថ្មីនៃកិច្ចសហប្រតិបត្តិការយុទ្ធសាស្ត្រផ្តោតលើការបណ្តុះបណ្តាល អន្តរប្រតិបត្តិការ និងការពង្រឹងសមត្ថភាពជាតិ» ដោយលោកបានបន្ថែមថា ទង្វើនេះឆ្លុះបញ្ចាំងពីភាពស្ងប់ស្ងាត់របស់ប្រទេសសេណេហ្គាល់ ប៉ុន្តែលោកបានអះអាងយ៉ាងម៉ឺងម៉ាត់អំពីអធិបតេយ្យភាពពេញលេញលើការដំឡើងយោធាជាយុទ្ធសាស្ត្រ។

កាលពីថ្ងៃព្រហស្បតិ៍ ប្រទេសបារាំងបានផ្ទេរជាផ្លូវការនូវការដំឡើងតំបន់យោធាចំនួន ២ទីតាំងចុងក្រោយរបស់ខ្លួននៅក្នុងប្រទេសសេណេហ្គាល់ទៅឱ្យអាជ្ញាធរសេណេហ្គាល់ ដែលជាការកត់សម្គាល់អំពីការបញ្ចប់វត្តមានយោធាអចិន្ត្រៃយ៍របស់ខ្លួននៅក្នុងប្រទេសអាហ្វ្រិកខាងលិច។ ការ​ដំឡើង​នោះ​រួម​មាន ​មូលដ្ឋាន​យោធា Camp Geille ជា​មូលដ្ឋាន​យោធា​បារាំង​ធំ​ជាង​គេ​នៅក្នុងប្រទេស​សេណេហ្គាល់ និង​កង​ទ័ព​អាកាស​បារាំង​នៅ​អាកាសយានដ្ឋាន​អន្តរជាតិដាការ៕

ដោយ៖ មូល មិនា (ប្រភព៖ ស៊ីនហួ)