AKP ភ្នំពេញ ថ្ងៃទី១៨ ខែកក្កដា ឆ្នាំ២០២៥--
   នៅព្រឹកថ្ងៃទី១៨ ខែកក្កដា ឆ្នាំ២០២៥នេះ នៅសាលាខេត្តកំពង់ចាម ក្រុមប្រឹក្សាសកម្មភាពជនពិការខេត្តកំពង់ចាមធ្វើសិក្ខាសាលាស្តីពី បរិយាបន្នពិការភាពក្នុងផែនការនិងថវិកានៅថ្នាក់ក្រោមជាតិ ក្រោមអធិបតីភាព ឯកឧត្តម អ៊ុង សម្បត្តិ អគ្គលេខាធិការ និងជាសមាជិកអចិន្រ្តៃយ៍ក្រុមប្រឹក្សាសកម្មភាពជនពិកាតំណាង ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកស្រី ប៉ាង ដានី អភិបាលរងខេត្ត និងជាប្រធានក្រុមប្រឹក្សាសកម្មភាពជនពិការខេត្តកំពង់ចាម ព្រមទាំងការអញ្ជើញចូលរួមពីលោក លោកស្រី តំណាងប្រធានមន្ទីរអង្គភាព ក្រុងស្រុក និងអ្នកពាក់ព័ន្ធជាច្រើនរូបទៀត។  

លោកស្រី ប៉ាង ដានី អភិបាលរងខេត្ត និងជាប្រធានក្រុមប្រឹក្សាសកម្មភាពជនពិការខេត្តកំពង់ចាម បានលើកថា សិក្ខាសាលានេះ មានគោលបំណង សំខាន់គឺដើម្បីពង្រឹងចំណេះដឹងដល់ក្រុមប្រឹក្សាសកម្មភាពជនពិការថ្នាក់ខេត្ត ទាក់ទងនឹងបរិយាបន្នពិការភាពក្នុងដំណើរការរៀបចំផែនការនិងថវិការបស់រដ្ឋបាលថ្នាក់ក្រោមជាតិ អោយស្របទៅនឹងផែនការយុទ្ធសាស្រ្តជាតិ ស្តីពីពិការភាព ២០២៤ ឆ្នាំ២០២៨ និងធ្វើការផ្សព្វផ្សាយចរាចរអន្តរក្រសួង រវាងក្រសួងសេដ្ឋកិច្ច និងហិរញ្ញវត្ថុ និងក្រសួងមហាផ្ទៃ ស្តីពីការគ្រប់គ្រង ការចាត់ចែង និងកំណត់មុខសញ្ញាចំណាយសេវាថវិកាសង្គម និងអនាម័យបរិស្ថាន និងមូលនិធិ ក្រុង ស្រុក ឃុំសង្កាត់ ។  

 ថ្លែងក្នុងឱកាសនោះ ឯកឧត្តម អ៊ុង សម្បត្តិ អគ្គលេខាធិការ និងជាសមាជិកអចិន្រ្តៃយ៍ក្រុមប្រឹក្សាសកម្មភាពជនពិកា បានមានប្រសាសន៍ថា ក្រុមប្រឹក្សា សកម្មភាពជនពិការ បាននឹងកំពុងរៀបចំបញ្ចប់ក្របខណ្ឌតាមដានត្រួតពិនិត្យនិងវាយតម្លៃ ការអនុវត្ត ផ.យ.ជ.ព.៣របស់ ក្រុមប្រឹក្សាសកម្មភាពជនពិការរាជធានី ខេត្ត ក្នុងការរៀបចំផែនការ សកម្មភាពប្រចាំឆ្នាំដើម្បីឲ្យរដ្ឋបាលថ្នាក់ក្រោមជាតិ អនុវត្តនិងចូលរួមចំណែកសម្រេច នូវគោលដៅ សូចនាករពាក់ព័ន្ធសំខាន់ៗ ក្រោមកិច្ចសហការជាមួយ អង្គការអន្តរជាតិជាដៃគូ។
ឯកឧត្តម បានគូសបញ្ជាក់ថា៖ សិក្ខាសាលានេះដើម្បី ប្រមូលធាតុចូលរួម សម្រាប់ការរៀបចំកម្មវិធីវិនិយោគបីឆ្នាំរំកិល២០២៦-២០២៨  របស់រដ្ឋបាលថ្នាក់ក្រោមជាតិ សម្រាប់រៀបចំផែនការយុទ្ធសាស្ត្រថវិកាខេត្ត ២០២៦-២០២៨ ដែលមន្ទីរជំនាញពាក់ព័ន្ធ រដ្ឋបាលក្រុង ស្រុក ឃុំ សង្កាត់ ក្នុងការ លើកគម្រោងថវិកាប្រចាំឆ្នាំ របស់រដ្ឋបាលខេត្ត៕

ដោយ៖  ឆាយ ម៉ុត