AKP កំពង់ចាម ថ្ងៃទី១៨ ខែកក្កដា ឆ្នាំ២០២៥--

លោក ខ្លូត ចិន្តា អភិបាលរងខេត្តកំពង់ចាម  បានធ្វើការណែនាំ និងជំរុញដល់រដ្ឋបាលឃុំ សង្កាត់ទាំងរបស់ខេត្ត ត្រូវខិតខំលើកកម្ពស់ និងកែលម្អគ្រប់សកម្មភាពការផ្តល់សេវាសាធារណៈ និងការអភិវឌ្ឍមូលដ្ឋាន ឱ្យកាន់តែមានប្រសិទ្ធភាព សម្រាប់ប្រជាពលរដ្ឋ ជាពិសេសសម្រាប់ជនងាយរងគ្រោះ ដូចជាស្ត្រី កុមារ មនុស្សចាស់ ជនក្រីក្រ ជនមានពិការភាព នៅមូលដ្ឋានរបស់ខ្លួន  និងត្រូវខិតខំរួមគ្នាចូលរួមអនុវត្តនូវគោលនយោបាយ" ភូមិ ឃុំ សង្កាត់មានសុវត្ថិភាព”  ព្រោះវាជាមូលដ្ឋានគ្រឹះនៃការធានានិងពង្រឹងសន្តិសុខសណ្តាប់ធ្នាប់សាធារណៈ និងសង្គម ក្នុងមូលដ្ឋានបានល្អ ដែលជាកត្តាចំបងនៃការរស់នៅរបស់ប្រជាពលរដ្ឋប្រកបដោយភាពសុខសាន្ត សុខសប្បាយក្នុងចិត្ត។

លោកអភិបាលរងខេត្តបានថ្លែងដូចនេះក្នុងពិធីបើកវគ្គបណ្តុះបណ្តាលស្តីពីការផ្តល់ជ័យលាភីនៃការអនុវត្តគោលនយោបាយ“ភូមិ ឃុំសង្កាត់មានសុវត្ថិភាព” និងសេវាសង្គម សម្រាប់រដ្ឋបាលឃុំ សង្កាត់ឆ្នាំ២០២៥ ដែលបានធ្វើឡើងនៅសាលាខេត្តកំពង់ចាម នាព្រឹកថ្ងៃទី១៨ ខែកក្កដាឆ្នាំ២០២៥ ដោយមានការចូលរួមពីអាជ្ញាធរពាក់ព័ន្ធជាច្រើននាក់ផងដែរ។

លោក ខ្លូត ចិន្តា បានបញ្ជាក់ថា ដើម្បីឆ្លើយតបការអនុវត្ត គោលនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា ឱ្យកាន់តែមានប្រសិទ្ធភាព ស័ក្តិសិទ្ធិភាព និងសម្រេចបានជោគជ័យ រដ្ឋបាលឃុំ សង្កាត់ ត្រូវខិតខំលើកកម្ពស់ និងកែលម្អគ្រប់សកម្មភាព ក្នុងការផ្តល់សេវាសាធារណៈ និងការអភិវឌ្ឍមូលដ្ឋាន ឱ្យកាន់តែមានប្រសិទ្ធភាព សម្រាប់ប្រជាពលរដ្ឋ ជាពិសេសសម្រាប់ជនងាយរងគ្រោះ ដូចជាស្ត្រី កុមារ មនុស្សចាស់ ជនក្រីក្រ ជនមានពិការភាព នៅមូលដ្ឋានរបស់ខ្លួន និងគោលនយោបាយ" ភូមិ ឃុំ សង្កាត់មានសុវត្ថិភាព” សំដៅកសាង និងពង្រឹងសន្តិសុខ សណ្តាប់ធ្នាប់សង្គម លើកកម្ពស់អនាម័យ បរិស្ថាន សុខុមាលភាពប្រជាពលរដ្ឋ និងកាត់បន្ថយគ្រោះថ្នាក់ បណ្តាលមកពីគ្រោះ មហន្តរាយ និងជំងឺឆ្លងរាតត្បាត នៅគ្រប់កាលៈទេសៈ ព្រមទាំងលើកទឹកចិត្តឱ្យមានការដោះស្រាយវិវាទក្រៅប្រព័ន្ធតុលាការនៅមូលដ្ឋាន ដើម្បីបង្កភាពអនុគ្រោះដល់ដំណើរការអភិវឌ្ឍសេដ្ឋកិច្ច សង្គមកិច្ចនៅមូលដ្ឋាន និងឈានទៅបង្កើនល្បឿននៃការកាត់បន្ថយភាពក្រីក្រ របស់ប្រជាពលរដ្ឋយើង៕

ដោយ ឆាយ ម៉ុត