AKP ភ្នំពេញ ថ្ងៃទី១៨ ខែកក្កដា ឆ្នាំ២០២៥ -- ប្រធានាធិបតីកូរ៉េខាងត្បូង លោក លី ជេយុង (Lee Jae Myung) បានសន្យាថានឹងបង្កើតក្រុមការងារស៊ើបអង្កេតរួមគ្នាមួយ ដែលរួមមានទាំងព្រះរាជអាជ្ញា និងប៉ូលិស ដើម្បីស្វែងរកការពិតពេញលេញនៅពីក្រោយហេតុការណ៍គ្រោះមហន្តរាយជាន់គ្នាក្នុងហ្វូងមនុស្សនៅតំបន់អ៊ីថេវ៉ុនកាលពីឆ្នាំ២០២២ ដែលបានឆក់យកជីវិតមនុស្សចំនួន ១៥៩នាក់ រួមទាំងជនបរទេស ២៦នាក់ផងដែរ។

ការិយាល័យប្រធានាធិបតីបានប្រកាសកាលពីថ្ងៃព្រហស្បតិ៍ថា លោក លី ក៏បានសន្យាផងដែរថានឹងអញ្ជើញក្រុមគ្រួសារជនរងគ្រោះជាជនបរទេសទាំងនោះឱ្យចូលរួមក្នុងពិធីខួបរំលឹកលើកទីបីដែលនឹងមកដល់ក្នុងខែតុលាខាងមុខនេះ។

សេចក្តីប្រកាសនេះបានធ្វើឡើងនៅមួយថ្ងៃបន្ទាប់ពីលោក លី បានជួបជាមួយក្រុមគ្រួសារជនរងគ្រោះដែលបានស្លាប់ដោយសារសោកនាដកម្មជាតិសំខាន់ៗចំនួនបួនកាលពីពេលថ្មីៗនេះ គឺគ្រោះមហន្តរាយលិចសាឡាងសេវ៉ូលឆ្នាំ២០១៤ ការរត់ជាន់គ្នាក្នុងហ្វូងមនុស្សនៅតំបន់អ៊ីថេវ៉ុនឆ្នាំ២០២២ គ្រោះទឹកជំនន់លិចតំបន់អូសុងឆ្នាំ២០២៣ និងការធ្លាក់យន្តហោះក្រុមហ៊ុនជេជូអ៊ែរឆ្នាំ២០២៤ ដោយលោកបានគូសបញ្ជាក់ពីការអំពាវនាវជាសាធារណៈសម្រាប់ការទទួលខុសត្រូវ និងការដោះស្រាយ។

បានប្រមូលផ្តុំសមាជិកគ្រួសារជនរងគ្រោះប្រមាណ ២០០នាក់ នោះ បានក្លាយជាវេទិកាសម្រាប់ការសន្ទនាដោយផ្ទាល់រវាងគ្រួសារជនរងគ្រោះ និងរដ្ឋ។

លោក កាង យូជុង (Kang Yu-jung) អ្នកនាំពាក្យប្រធានាធិបតីបាននិយាយក្នុងសន្និសីទសារព័ត៌មានមួយកាលពីថ្ងៃព្រហស្បតិ៍ថា «ឆ្លើយតបទៅនឹងសំណើពីក្រុមគ្រួសារជនរងគ្រោះសម្រាប់ការទទួលស្គាល់ជាពិសេសនៃជនរងគ្រោះជាជនបរទេស លោកប្រធានាធិបតីបានណែនាំថា ការចូលរួមរបស់ក្រុមគ្រួសាររបស់ពួកគេត្រូវបានពិចារណាយ៉ាងម៉ត់ចត់សម្រាប់ពិធីរំលឹកខួបលើកទីបីនៃគ្រោះមហន្តរាយរត់ជាន់គ្នាក្នុងហ្វូងមនុស្សនៅតំបន់អ៊ីថេវ៉ុន»។

ជនរងគ្រោះបរទេសទាំងនោះរួមមានពលរដ្ឋចំនួន ២៦នាក់ មកពី ១៤ប្រទេស ដូចជាសហរដ្ឋអាមេរិក ជប៉ុន បារាំង អូស្ត្រាលី ន័រវេស អូទ្រីស ចិន រុស្ស៊ី វៀតណាម ថៃ ស្រីលង្កា កាហ្សាក់ស្ថាន អ៊ូសបេគីស្ថាន និងអ៊ីរ៉ង់ ហើយជន​រង​គ្រោះ​បរទេស​ភាគ​ច្រើន​មាន​អាយុខ្ទង់ ​២០​ឆ្នាំ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)