AKP ភ្នំពេញ ថ្ងៃទី១៧ ខែកក្កដា ឆ្នាំ២០២៥ -- ក្រសួងការបរទេសរបស់ទីក្រុងសេអ៊ូលបាននិយាយកាលពីថ្ងៃពុធថា អនុរដ្ឋមន្ត្រីការបរទេសកូរ៉េខាងត្បូង សហរដ្ឋអាមេរិក និងជប៉ុននឹងធ្វើកិច្ចចរចាត្រីភាគីនៅសប្តាហ៍នេះដើម្បីពិភាក្សាអំពីវិធីនៃការពង្រឹងកិច្ចសហប្រតិបត្តិការលើបញ្ហាប្រទេសកូរ៉េខាងជើង និងសន្តិសុខសេដ្ឋកិច្ច។

យោងតាមក្រសួងការបរទេសបានឱ្យដឹងថា អនុរដ្ឋមន្ត្រីការបរទេសទី១លោក ផាក យូនចូ (Park Yoon-joo) អនុរដ្ឋមន្ត្រីការបរទេសអាមេរិកលោក គ្រីស្ដូហ្វឺ ឡានដូវ (Christopher Landau) និងអនុរដ្ឋមន្ត្រីការបរទេសជប៉ុន លោក តាកេហ៊ីរ៉ូ ហ្វូណាកូស៊ី (Takehiro Funakoshi)គ្រោងនឹងជួបប្រជុំគ្នានៅប្រទេសជប៉ុននាថ្ងៃសុក្រ។

កិច្ចពិភាក្សានាពេលខាងមុខកើតឡើងប្រហែល ៩ខែបន្ទាប់ពីកិច្ចប្រជុំចុងក្រោយរបស់ពួកគេដែលបានធ្វើឡើងនៅទីក្រុងសេអ៊ូលក្នុងខែតុលា។នេះក៏ជាលើកទីមួយផងដែរ ចាប់តាំងពីការចូលកាន់តំណែងរបស់ប្រធានាធិបតីកូរ៉េខាងត្បូង លោក លី ជេយ៉ុង (Lee Jae Myung) និងរដ្ឋបាលថ្មីរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។

ក្រសួងបាននិយាយនៅក្នុងសេចក្តីប្រកាសព័ត៌មានមួយថា «ភាគីទាំងបីគ្រោងនឹងធ្វើការពិភាក្សាយ៉ាងទូលំទូលាយ និងស៊ីជម្រៅលើប្រធានបទជាច្រើន រួមទាំងស្ថានភាពនៅឧបទ្វីបកូរ៉េ សក្ដានុពលក្នុងតំបន់ សន្តិសុខសេដ្ឋកិច្ច បច្ចេកវិទ្យា ថាមពល និងវិធីដើម្បីបង្កើនកិច្ចសហប្រតិបត្តិការត្រីភាគី»។

នៅក្នុងកំណត់ត្រាប្រព័ន្ធផ្សព្វផ្សាយមួយ ក្រសួងការបរទេសក៏បាននិយាយថា លោក ឡានដូវ នឹងចូលរួមកិច្ចប្រជុំត្រីភាគីនៅទីក្រុងតូក្យូ ហើយមានកិច្ចពិភាក្សាទ្វេភាគីដាច់ដោយឡែកជាមួយសមភាគីកូរ៉េខាងត្បូង និងជប៉ុន ខណៈដែលលោកនឹងធ្វើដំណើរទៅកាន់ប្រទេសជប៉ុនជាផ្នែកមួយនៃគណៈប្រតិភូប្រធានាធិបតីដើម្បីចូលរួមទិវាជាតិរបស់សហរដ្ឋអាមេរិកនៅឯពិព័រណ៍ពិភពលោកនៅចុងសប្តាហ៍នេះ។

នេះបានគូសបញ្ជាក់ថា ដំណើរទស្សនកិច្ចលើកដំបូងរបស់លោកអនុរដ្ឋមន្ត្រីទៅកាន់ទ្វីបអាស៊ីផ្តោតលើ «ការរក្សាការប្តេជ្ញាចិត្តរបស់សហរដ្ឋអាមេរិកក្នុងការជំរុញតំបន់ឥណ្ឌូប៉ាស៊ីហ្វិកដោយសេរី បើកចំហ និងសុវត្ថិភាព ក៏ដូចជាការពង្រឹងភាពជាដៃគូត្រីភាគី» រវាងប្រទេសកូរ៉េខាងត្បូងសហរដ្ឋអាមេរិក និងជប៉ុន៕

ដោយ៖ មូល មិនា (ប្រភព៖ យ៉ុនហាប់)