AKP ភ្នំពេញ ថ្ងៃទី១៧ ខែកក្កដា ឆ្នាំ២០២៥ -- នាយករដ្ឋមន្ត្រីថៃដែលត្រូវបានព្យួរតួនាទី លោកស្រី ផែថុងថាន ស៊ីណាវ៉ាត់ (Paetongtarn Shinawatra) បានស្នើឱ្យតុលាការធម្មនុញ្ញថៃផ្តល់ពេលវេលាបន្ថែមទៀតដើម្បីដាក់សេចក្តីថ្លែងការណ៍ការពារក្តីក្នុងសំណុំរឿងក្រមសីលធម៌ដែលអាចឈានទៅដល់ការបណ្តេញចេញពីតំណែង។ នេះបើយោងតាមការឱ្យដឹងពីអគ្គលេខាធិការការិយាល័យនាយករដ្ឋមន្ត្រីថៃ លោក ព្រហ្មមីន ឡឺតស៊ូរីដេត (Prommin Lertsuridej)។

លោក ព្រហ្មមីន បាននិយាយ​ថា រយៈពេល ​១៥​ថ្ងៃ​សម្រាប់​ការ​ធ្វើ​សេចក្តី​ថ្លែងការណ៍​ត្រូវ​ផុត​នៅ​ថ្ងៃ​ទី​១៧ ខែ​កក្កដា ឆ្នាំ២០២៥ នេះ។ តុលាការ​មិន​ទាន់​បាន​ឆ្លើយ​តប​នឹង​សំណើ​នេះ ឬ​បញ្ជាក់​ថា​នឹង​ផ្តល់​ពេល​វេលា​ប៉ុន្មាន​ទៀតនៅឡើយ​ទេ។

នៅពេលមុននេះ កាលពីថ្ងៃទី០១ ខែកក្កដា តុលាការធម្មនុញ្ញថៃបានព្យួរតួនាទីជានាយករដ្ឋមន្រ្តីពីលោកស្រី ផែថុងថាន បន្ទាប់ពីសមាជិកព្រឹទ្ធសភាមួយក្រុមមានគ្នា ៣៦រូប បានដាក់ញត្តិចោទប្រកាន់លោកស្រីពីបទរំលោភលើក្រមសីលធម៌ជុំវិញការលើកឡើងរបស់លោកស្រីនៅក្នុងការសន្ទនាតាមទូរស័ព្ទជាមួយអតីតនាយករដ្ឋមន្ត្រីកម្ពុជាសម្តេចអគ្គមហាសេនាបតីតេជោ ហ៊ុន សែន។

សំណុំរឿងរបស់តុលាការនេះ គឺជាការគំរាមកំហែងដ៏ធំបំផុតចំពោះអាជីពនយោបាយជាលើកដំបូងរបស់លោកស្រី ផែថុងថាន និងរដ្ឋាភិបាលដែលមានអាយុតិចជាងឆ្នាំរបស់លោកស្រី។

លោកស្រីបានឡើងកាន់អំណាចកាលពីខែសីហាឆ្នាំមុន បន្ទាប់ពីអតីតនាយករដ្ឋមន្រ្តីថៃ លោក ស្រេតថា ថាវីស៊ីន ត្រូវបានបណ្តេញចេញពីតំណែងនៅក្នុងករណីទាក់ទងនឹងក្រមសីលធម៌ស្រដៀងគ្នានេះ ជុំវិញការតែងតាំងរដ្ឋមន្ត្រីគណរដ្ឋមន្រ្តីដែលមានប្រវត្តិប្រព្រឹត្តបទឧក្រិដ្ឋ។

លោកស្រី ផែថុងថាន ត្រូវប្រឈមមុខនឹងការដកសិទ្ធិ និងការដកតំណែង ប្រសិនបើតុលាការរកឃើញថាលោកស្រីមានកំហុស។

នាយក​រដ្ឋមន្ត្រី​ដែល​ត្រូវ​បាន​ព្យួរតួនាទីរូបនេះ ​ក៏​ប្រឈមមុខ​នឹង​ការ​ស៊ើបអង្កេត​ដាច់​ដោយ​ឡែកមួយទៀត​ពី​គណៈកម្មាធិការ​ជាតិ​ប្រឆាំង​អំពើ​ពុករលួយ​ជុំវិញ​ការ​ចោទ​ប្រកាន់​ដូច​គ្នានេះផងដែរ។

កាសែតបាងកកប៉ុស្តិ៍បានរាយការណ៍ថា ប្រសិនបើក្រុមប្រឹក្សាកំណត់ថាមានភស្តុតាងគ្រប់គ្រាន់ វាអាចនឹងឈានទៅដល់ការចោទប្រកាន់លោកស្រី ផែថុងថាន ជាផ្លូវការ ហើយបញ្ជូនសំណុំរឿងនេះទៅតុលាការកំពូលដើម្បីវិនិច្ឆ័យ៕

ដោយ៖ យា ចិន្ដាខន្ដី (ប្រភព៖ VNA)