AKP ភ្នំពេញ ថ្ងៃទី១៦ ខែកក្កដា ឆ្នាំ២០២៥ -- យោងតាមរបាយការណ៍របស់ប្រព័ន្ធផ្សព្វផ្សាយរុស្ស៊ីបានឱ្យដឹងថា គណៈប្រតិភូមកពីក្រសួងគ្រាអាសន្នរុស្ស៊ីបានមកដល់ទីក្រុងព្យុងយ៉ាងដើម្បីពិភាក្សាអំពីកិច្ចសហប្រតិបត្តិការសក្តានុពលក្នុងវិស័យវិទ្យាសាស្ត្រ និងបច្ចេកវិទ្យា។

យោងតាមរបាយការណ៍សារព័ត៌មាន Tass កាលពីថ្ងៃអង្គារ បានឱ្យដឹងថា គណៈប្រតិភូដឹកនាំដោយអនុប្រធានក្រសួង លោក រ៉ូម៉ាន គូរីនីន (Roman Kurynin) បានធ្វើដំណើរមកដល់ប្រទេសកូរ៉េខាងជើង តាមការអញ្ជើញរបស់គណៈកម្មាធិការគ្រោះមហន្តរាយរដ្ឋរបស់ប្រទេសកូរ៉េខាងជើង។

ក្រសួងក៏បានកត់សម្គាល់ផងដែរថា គណៈប្រតិភូនឹងទៅទស្សនាកន្លែងបង្ការ និងឆ្លើយតបគ្រោះមហន្តរាយនៅក្នុងប្រទេសកូរ៉េខាងជើងក្នុងអំឡុងពេលធ្វើដំណើរ និងធ្វើការពិភាក្សាលើកិច្ចសហប្រតិបត្តិការលើវិស័យវិទ្យាសាស្ត្រ និងបច្ចេកវិទ្យា ក៏ដូចជាក្នុងការបណ្តុះបណ្តាលអ្នកជំនាញពន្លត់អគ្គីភ័យ និងជួយសង្គ្រោះផងដែរ។

សារព័ត៌មាន Tass បានដកស្រង់សម្តីលោក គូរីនីន ថា «យើងរីករាយដែលសហការីកូរ៉េចាប់អារម្មណ៍លើការងាររួមគ្នាក្នុងវិស័យវិទ្យាសាស្ត្រ និងបច្ចេកវិទ្យា ក្រសួងបានប្រមូលអ្នកជំនាញយ៉ាងច្រើន ហើយយើងត្រៀមខ្លួនរួចជាស្រេចដើម្បីចែករំលែកបទពិសោធន៍វា»។

សារព័ត៌មាន Tass បាននិយាយថា ទីភ្នាក់ងាររដ្ឋទាំងពីរនៃប្រទេសរុស្ស៊ី និងកូរ៉េខាងជើងបានចុះហត្ថលេខាលើអនុស្សរណៈនៃការយោគយល់គ្នាស្តីពីការដោះស្រាយគ្រោះមហន្តរាយធម្មជាតិកាលពីឆ្នាំមុន ដែលនឹងនៅតែជាធរមានរហូតដល់ឆ្នាំ២០២៦។

ដំណើរ​ទស្សនកិច្ច​នេះ គឺជា​ដំណើរ​ចុងក្រោយ​គេ​បង្អស់​ក្នុង​ការ​ផ្លាស់ប្តូរ​ជាបន្តបន្ទាប់​រវាងប្រទេស​កូរ៉េខាងជើង និង​រុស្ស៊ី ដែល​បាន​បង្កើន​កិច្ចសហប្រតិបត្តិការ​លើ​វិស័យ​ផ្សេងៗ​បន្ទាប់​ពី​ការ​ចុះ​ហត្ថលេខា​លើ​សន្ធិសញ្ញា​ការពារ​ទៅវិញទៅមក​កាលពី​ខែមិថុនា​ឆ្នាំមុន។ នេះ​បាន​រួម​បញ្ចូល​ការ​ដាក់​ពង្រាយ​ទាហាន​កូរ៉េ​ខាង​ជើង​ដើម្បី​គាំទ្រ​រុស្ស៊ី​ក្នុង​សង្គ្រាម​ប្រឆាំង​អ៊ុយក្រែន៕

ដោយ៖ មូល មិនា (ប្រភព៖ យ៉ុនហាប់)