AKP ភ្នំពេញ ថ្ងៃទី១៦ ខែកក្កដា ឆ្នាំ២០២៥ -- គណៈកម្មាធិការកណ្តាលសម្រាប់ការគ្រប់គ្រងការប្រើប្រាស់គ្រឿងញៀន (CCDAC) បានរាយការណ៍កាលពីល្ងាចថ្ងៃអង្គារថា ប៉ូលីសមីយ៉ាន់ម៉ាបានរឹបអូសថ្នាំរំញោចចំនួន ៩,២៥លានគ្រាប់ និងសារធាតុហេរ៉ូអ៊ីន ២២គីឡូក្រាមនៅក្នុងតំបន់ Sagaing និងតំបន់ Mandalay នៃប្រទេសមីយ៉ាន់ម៉ា។

គណៈកម្មាធិការ CCDAC បានឱ្យដឹងថា ក្រោមការចុះបង្រ្កាប ប៉ូលីសប្រឆាំងគ្រឿងញៀន បានស្ទាក់ចាប់រថយន្ត ២គ្រឿង នៅក្នុងតំបន់Sagaing កាលពីថ្ងៃទី៧ ខែកក្កដា និងរឹបអូសបានថ្នាំរំញោចចំនួន៥,២៥លានគ្រាប់ និងសារធាតុហេរ៉ូអ៊ីន ២២គីឡូក្រាម។ ជនសង្ស័យ​ចំនួន ​៣​នាក់​ត្រូវ​បាន​ចាប់ខ្លួន​ពី​រថយន្ត​ទាំង ​២​គ្រឿងនោះ។

ក្រោយ​ពី​ចាប់​ខ្លួន​ជន​សង្ស័យ​បានម្នាក់​ ប៉ូលិស​បាន​ចាប់​ខ្លួន​ជន​សង្ស័យ​ម្នាក់​ទៀត​ដែល​រៀបចំ​ដឹក​ជញ្ជូន​ថ្នាំរំញោច​នៅ​ផ្ទះ​សំណាក់​មួយកន្លែង​ក្នុងទី​ក្រុង Kyaukse តំបន់ Mandalay កាល​ពី​ថ្ងៃ​ទី៨ ខែ​កក្កដា។ ជន​សង្ស័យ​ ២​នាក់​បន្ថែម​ទៀត​ទាក់​ទង​នឹង​ករណី​នេះ​ក៏​ត្រូវ​បាន​ចាប់​ខ្លួន​ផង​ដែរ​នៅ​ក្នុង     ​ទីក្រុង Chanmyathazi នៃ​តំបន់ Mandalay រួម​ជាមួយ​ថ្នាំ​រំញោច​ចំនួន៤លាន​គ្រាប់។

ការស៊ើបអង្កេតបានបង្ហាញថា ថ្នាំញៀនត្រូវបានដឹកជញ្ជូនពីទីក្រុងម៉ុងហៃ រដ្ឋសាន ទៅកាន់ទីក្រុងកាឡៃ ក្នុងតំបន់ Sagaing ។ របាយការណ៍បានបន្ថែមថា ជនសង្ស័យត្រូវបានចោទប្រកាន់ក្រោមច្បាប់របស់ប្រទេស ហើយការស៊ើបអង្កេតបន្ថែមកំពុងដំណើរការ៕

ដោយ៖ មូល មិនា (ប្រភព៖ ស៊ីនហួ)