AKP ភ្នំពេញ ថ្ងៃទី១៦ ខែកក្កដា ឆ្នាំ២០២៥ -- នាយករដ្ឋមន្ត្រីឆេក លោក ភែត ហ្វីអាឡា (Petr Fiala) បាននិយាយថា ផែនការរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ក្នុងការយកពន្ធ៣០% ទៅលើទំនិញរបស់សហភាពអឺរ៉ុប នឹងមិនផ្តល់ផលប្រយោជន៍ដល់នរណាម្នាក់ឡើយ។

«ការដាក់បញ្ចូលពន្ធ ៣០% ដោយសហរដ្ឋអាមេរិកទៅលើទំនិញពីសហភាពអឺរ៉ុប នឹងមិនផ្តល់ផលប្រយោជន៍ដល់សហភាពអឺរ៉ុប ឬសាធារណរដ្ឋឆេកនោះទេ។ ក្នុងនាមជាអ្នកគាំទ្រពាណិជ្ជកម្មសេរី និងតំបន់គ្មានពន្ធ ខ្ញុំជឿថា កិច្ចការនេះនឹងមិនផ្តល់ផលប្រយោជន៍ដល់សហរដ្ឋអាមេរិកទេ«។

លោកបាននិយាយបន្ថែមថា អឺរ៉ុបគួរតែត្រៀមខ្លួនសម្រាប់លទ្ធផលដ៏ខកចិត្តនៃកិច្ចចរចាជាមួយទីក្រុងវ៉ាស៊ីនតោន ប៉ុន្តែនៅពេលជាមួយគ្នានេះត្រូវបន្តខិតខំដើម្បីឈានដល់កិច្ចព្រមព្រៀងដែលអាចទទួលយកបានជាមួយសហរដ្ឋអាមេរិក។ លោក ហ្វីអាឡា បានកត់សម្គាល់ថាផលប៉ះពាល់នៃពន្ធថ្មីទៅលើសេដ្ឋកិច្ចឆេកអាចមានប្រហែលមួយភាគដប់នៃ ១% នៃផលិតផលក្នុងស្រុកសរុប (GDP) អាស្រ័យលើទម្រង់ជាក់លាក់នៃពន្ធ។

នៅថ្ងៃដដែលn: ស្នងការអឺរ៉ុបទទួលបន្ទុកពាណិជ្ជកម្ម និងសន្តិសុខសេដ្ឋកិច្ច លោក ម៉ារ៉ូស សេហ្វកូវីក (Maros Sefcovic) បាននិយាយថា ពន្ធ៣០% ដែលអាចធ្វើទៅបាននោះ គឺមិនអាចទទួលយកបានជាដាច់ខាត។

លោក សេហ្វកូវីក បានប្រាប់អ្នកសារព័ត៌មាននៅទីក្រុងប្រ៊ុចសែលថា«នេះគឺជាកម្រិតដែលវាត្រូវបានហាមឃាត់ជាដាច់ខាតចំពោះពាណិជ្ជកម្មណាមួយ ដូច្នេះក្នុងករណីនេះ យើងច្បាស់ជានឹងចរចាឱ្យបានខ្លាំងក្លាតាមតម្រូវការ ហើយជាការពិតណាស់ យើងនឹងព្យាយាមផ្តល់លទ្ធផលនៅចុងខែសីហាខាងមុខនេះ»។

កាលពីថ្ងៃទី១២ ខែកក្កដា ឆ្នាំ២០២៥ ប្រធានាធិបតីសហរដ្ឋអាមេរិក​ លោក ដូណាល់ ត្រាំ បានប្រកាសថា លោកនឹងដាក់ពន្ធ ៣០% ទៅលើទំនិញនាំចូលពីអឺរ៉ុបចាប់ពីថ្ងៃទី០១ ខែសីហា ឆ្នាំ២០២៥ ខណៈដែលពន្ធលើវិស័យមុនៗនឹងនៅតែជាធរមាន។

ប្រធានគណៈកម្មការអឺរ៉ុប លោកស្រី អ៊ូស៊ុលឡា វ៉ុន ដឹ ឡេយេន (Ursula von der Leyen) បាននិយាយកាលពីចុងសប្តាហ៍មុនថា សហភាពអឺរ៉ុបនឹងបន្តកិច្ចចរចាជាមួយទីក្រុងវ៉ាស៊ីនតោន ប៉ុន្តែបានព្រមានថា ខ្លួនបានត្រៀមខ្លួនរួចជាស្រេចដើម្បីដាក់ចេញនូវវិធានការតបត៕

ដោយ៖ យា ចិន្ដាខន្ដី (ប្រភព៖ ស្ពុតនីក)