AKP ភ្នំពេញ ថ្ងៃទី០៤ ខែកក្កដា ឆ្នាំ២០២៥

លោកស្រី Bridgette Walker ភារធារីស្ថានទូតអាម៉េរិកប្រចាំនៅកម្ពុជាបានលើឡើងថា បើយើងសម្លឹងទៅអនាគតនៃភាពជាដៃគូរវាងសហរដ្ឋអាមេរិក និងកម្ពុជា យើងនឹងឃើញទំនាក់ទំនងមួយដែលកំពុងមានការផ្លាស់ប្ដូរ និងមានភាពចាស់ទុំ ខណៈពេលដែលទំនាក់ទំនងរបស់យើងវិវត្ដន៍ទៅមុខ និងឃើញថានៅមានចំណុចដែលយើងត្រូវបន្ដយកចិត្ដទុកដាក់ ដោយផ្អែកលើអាទិភាពរួមគ្នា និងការផ្ដល់ផលប្រយោជន៍ដល់គ្នាទៅវិញទៅមក ទាំងនៅក្នុងតំបន់ និងនៅក្នុងកម្រិតសកលលោក។ ការលើកឡើងរបស់លោកស្រីភារធារីស្ថានទូតអាម៉េរិកបែបនេះ ក្នុងពិធីអបអរសាទរខួបលើកទី ២៤៩ នៃទិវាឯករាជ្យជាតិរបស់សហរដ្ឋអាមេរិក នាយប់ថ្ងៃទី ០៣ កក្កដា ឆ្នាំ ២០២៥ នៅសណ្ឋាគារ Sofitel Phnom Penh Phokeethra ។

លោកស្រី Bridgette Walker បានបញ្ជាក់ឱ្យដឹងថា ក្នុងពេលដែលយើងប្រារព្ធពិធីអបអរសាទរខួបលើកទី២៤៩ នៃទិវាឯករាជ្យជាតិរបស់សហរដ្ឋអាមេរិក  នៅកម្ពុជាឯណេះវិញ យើងក៏អបអរសាទរខួបលើកទី៧៥ នៃទំនាក់ទំនងការទូតរវាងប្រទេសយើងទាំងពីរផងដែរ ហើយលោកអ្នក នឹងបានឃើញ ស្ដាប់ឮ និងយល់អំពីភាពជ្រាលជ្រៅនៃទំនាក់ទំនងរវាងសហរដ្ឋអាមេរិក និងប្រទេសកម្ពុជាដែលបានចាប់ផ្ដើមតាំងពីឆ្នាំ១៩៥០ ហើយបន្ដមកដល់សព្វថ្ងៃនេះ។ លោកស្រីភារធារីបានឱ្យដឹងទៀតថា ទាំងសហរដ្ឋអាមេរិក និងកម្ពុជាសុទ្ធតែទទួលបានផលប្រយោជន៍ពីទំនាក់ទំនងដែលលើកកម្ពស់ និងពង្រឹងនូវចំណងទាក់ទងរវាងប្រជាជន និងប្រជាជនតាមរយៈវិស័យទេសចរណ៍ ការអប់រំ កីឡា និងការតភ្ជាប់ផ្នែកធុរកិច្ចដែលជំរុញដល់ការផ្លាស់ប្ដូរវប្បធម៌ និងជំនាញផ្សេងៗ ព្រមទាំងស្មារតីសហគ្រិនភាព ជាពិសេសក្នុងចំណោមយុវជន។ លោកស្រីភារធារីបានបញ្ជាក់បន្ថែមទៀត៖ «ខួបលើកទី៧៥ នៃទំនាក់ទំនងការទូតនេះ គឺជាសក្ខីភាពជាក់ស្ដែងនៃមិត្ដភាពដ៏រឹងមាំរវាងសហរដ្ឋអាមេរិក និងប្រទេសកម្ពុជា។ យើងសូមបញ្ជាក់ជាថ្មីនូវការប្ដេជ្ញាចិត្ដរួមគ្នារបស់យើងក្នុងការបន្ដធ្វើការជាមួយគ្នា ដើម្បីកសាងអនាគតមួយដែលមានភាពរុងរឿង សន្ដិភាព និងការរីកចម្រើនរួមគ្នា»។

បើតាមលោកស្រីភារធារីស្ថានទូតអាម៉េរិកប្រចាំនៅកម្ពុជា ទិវាឯករាជ្យរបស់សហរដ្ឋអាមេរិកគឺជាពេលវេលាមួយដែលសម្រាប់ជនជាតិអាម៉េរិកជួបជុំជាមួយគ្រួសារ និងមិត្ដភក្ដិក្នុងស្មារតីនៃការដឹងគុណចំពោះអ្វីដែលបុព្វបុរសយើងបានកសាងឡើង ហើយបន្ដខិតខំប្រឹងប្រែងដោយខ្លួនឯងជាបន្ដបន្ទាប់ទៅទៀត ដើម្បីទទួលបាននូវសមិទ្ធផលនានា ដែលជាការបង្ហាញពីភាពជាអ្នកដឹកនាំ និងនវានុវត្ដន៍អាម៉េរិក។ លោកស្រីបានបន្ដថា សហរដ្ឋអាមេរិក គួរទទួលស្គាល់ផងដែរនូវតួនាទីនៃវិស័យការទូតក្នុងការធ្វើឱ្យរីកចម្រើនដល់គំនិតនានារបស់អាម៉េរិក ហើយយើងបានប្រាស្រ័យទាក់ទងជាមួយប្រទេស និងប្រជាជនជាច្រើននៅទូទាំងពិភពលោក មិនត្រឹមតែដើម្បីការពារផលប្រយោជន៍របស់យើងតែប៉ុណ្ណោះទេ តែក៏ដើម្បីរក្សាគុណតម្លៃរបស់យើងផងដែរ។ លោកស្រី Bridgette Walker បានសង្កត់ធ្ងន់ថា៖ «យើងតែងតែជ្រើសរើសដៃគូដោយផ្អែកលើភាពស្មើគ្នា នៃឱកាស និងកាលានុវត្ដភាពដោយផ្អែកលើតម្លាភាព និងភាពត្រឹមត្រូវ យុត្ដិធម៌»។

ក្នុងឱកាសនោះ ឯកឧត្ដម ឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជាបានមានប្រសាសន៍ថា ឆ្នាំនេះគឺជាឆ្នាំដ៏សំខាន់ដែលយើងរួមគ្នាអបអរសាទរខួបលើកទី ៧៥ នៃចំណងទំនាក់ទំនងការទូតរវាងប្រទេសកម្ពុជា និងសហរដ្ឋអាមេរិក ហើយអស់រយៈពេលជាច្រើនទសវត្សរ៍កន្លងមកនេះ ប្រទេសជាតិយើងទាំងពីរបានកសាងនូវភាពជាដៃគូយ៉ាងរឹងមាំ និងកាន់តែស្អិតរមួត ដោយផ្អែកលើគោលការណ៍នៃការគោរពគ្នាទៅវិញទៅមក និងសហប្រតិបត្តិការ។ ឯកឧត្ដម ឧបនាយករដ្ឋមន្ត្រីបានថ្លែងបញ្ជាក់ថា ទំនាក់ទំនងរបស់កម្ពុជាជាមួយសហរដ្ឋអាមេរិកបានបន្ដរីកលូតលាស់ និងពង្រឹងវិសាលភាពលើបណ្ដាវិស័យដូចជា វិស័យពាណិជ្ជកម្ម និងវិនិយោគ កិច្ចសហប្រតិបតិ្ដការលើវិស័យការពារជាតិ វិស័យអប់រំ ការអភិរក្សវប្បធម៌ និងទំនាក់ទំនងរវាងប្រជាជននៃប្រទេសយើងទាំងពីរ។

ឯកឧត្ដម ឧបនាយករដ្ឋមន្ត្រីបានរម្លឹកផងដែរថា កាលពីដើមឆ្នាំនេះ  យើងបានប្រារព្ធខួបលើកទី ៧៥ នៃចំណងទាក់ទងការទូតនៅក្នុងពិធីស្រមោលសរមួយដែលត្រូវបានរៀបចំនៅសារមន្ទីរជាតិ និងបានរំលេចអំពីការបញ្ជូនត្រឡប់មកកម្ពុជាវិញនូវចម្លាក់ខ្មែរដែលមិនអាចកាត់ថ្លៃបានជាច្រើន។ យើងក៏បាន និងកំពុងកាសាងអនាគតរួមគ្នាផងដែរ ដោយនៅចុងឆ្នាំនេះ  កម្ពុជា និងសម្ពោធដាក់ឱ្យប្រើប្រាស់អាកាសយានដ្ឋានអន្ដរជាតិធំជាងគេមួយនៅក្នុងតំបន់អាស៊ីអាគ្នេយ៍ ដែលអភិវឌ្ឍន៍ដោយក្រុមហ៊ុនកម្ពុជា និងទទួលបានការគាំទ្រមួយផ្នែកដោយអ្នកជំនាញរបស់សហរដ្ឋអាមេរិក។

ឯកឧត្ដម ឧបនាយករដ្ឋមន្ត្រី ស៊ុន ចាន់ថុល បានលើកឡើងថា កម្ពុជាទន្ទឹងរង់ចាំក្នុងការបន្ដកសាងភាពជាដៃគូដោយផ្អែកលើសន្ទុះនាពេលនេះ តាមរយៈការផ្លាស់ប្ដូរទស្សនកិច្ចកម្រិតខ្ពស់ដូចជា ទស្សនកិច្ចរបស់ឯកឧត្ដមរដ្ឋមន្រ្ដីក្រសួងការបរទេសសហរដ្ឋអាមេរិក និងដំណើរទស្សនកិច្ចរបស់គណៈប្រតិភូសមាជិកសភាសហរដ្ឋអាមេរិក នាខែសីហាខាងមុខ បន្ទាប់ពីដំណើរទស្សនកិច្ចប្រកបដោយជោគជ័យ កាលពីដើមឆ្នាំនេះរបស់ឯកឧត្ដមសមាជិកសភារបស់សហរដ្ឋអាមេរិក។ ឯកឧត្ដម ឧបនាយករដ្ឋមន្ត្រីបានបន្ដថា ស្របពេលដែលកម្ពុជា ទទួលតួនាទីជាអ្នកសម្របសម្រួលទំនាក់ទំនងដៃគូសន្ទនាអាស៊ាន-អាម៉េរិករហូតដល់ឆ្នាំ២០២៧ កម្ពុជាមើលឃើញឱកាសប្រកបដោយថាមពល ក្នុងការបង្កើនកិច្ចសហប្រតិបត្ដិការឱ្យកាន់តែស៊ីជម្រៅ ដែលមិនចំពោះតែភាពជាដៃគូទ្វេភាគីនៃប្រទេសយើងទាំងពីរប៉ុណ្ណោះទេ ប៉ុន្ដែរហូតទៅដល់ភាពជាដៃគូយុទ្ធសាស្រ្ដគ្រប់ជ្រុងជ្រោយអាស៊ាន-សហរដ្ឋអាមេរិក។

ឯកឧត្ដម ឧបនាយករដ្ឋមន្ត្រីក៏បានអះអាងថា៖ «កម្ពុជា នៅតែជាដៃគូដ៏ស្មោះស្ម័គ្រ និងជាទីទុកចិត្ដរបស់សហរដ្ឋអាមេរិក ហើយជឿជាក់យ៉ាងមុតមាំថា មិត្ដភាពរបស់កម្ពុជា និងសហរដ្ឋអាមេរិក នឹងបន្ដរីកចម្រើនប្រកបដោយភាពរឹងមាំជាមួយទិសដៅ និងសារសំខាន់ជាយុទ្ធសាស្រ្ដ»។

សូមជម្រាបជូនថា ពិធីនេះ ក៏បានរម្លឹកផងដែរដល់ខួបលើកទី ៧៥ នៃការបង្កើតទំនាក់ទំនងការទូត សហរដ្ឋអាមេរិក និងប្រទេសកម្ពុជា ដែលបានចាប់ផ្តើមតាំងពីឆ្នាំ ១៩៥០ មក។ ទន្ទឹមនេះ ក៏មានក្រុមតន្ត្រីទ័ពអាកាសសហរដ្ឋអាមេរិក ដែលមានឈ្មោះថា «Pacific Brass» បានសម្តែងបទជាច្រើន របស់ប្រទេសទាំងពីរ ដែលតំណាងឱ្យទំនាក់ទំនងដែលមានរាប់ទសវត្សរ៍​មក។ ក្រុមតន្រ្តី Pacific Brass និងក្រុមតន្ត្រីកងឯកភាព កងកិត្តិយសត្រែទ័ព នៃកងយោធពលខេមរភូមិន្ទ បានធ្វើការសម្តែងរួមគ្នាជូនភ្ញៀវកិត្តិយស ដើម្បីជាការអបអរនូវចំណងមិត្តភាពដ៏យូរអង្វែងនៃប្រជាជនអាម៉េរិក និងប្រជាជនកម្ពុជា៕

ដោយ៖ រិទ្ធី