AKP ភ្នំពេញ ថ្ងៃទី០៣ ខែកក្កដា ឆ្នាំ២០២៥--

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាបានលើកឡើងថា ការកំណត់បង្គោលព្រំដែនរវាងកម្ពុជា និងវៀតណាម មានភាពងាយស្រួលដោយភាគីទាំងពីរគោរពតាមនិយាមអន្តរជាតិ។ ការលើកឡើងរបស់សម្ដេចតេជោបែបនេះ ក្នុងពិធីជួបសំណេះសំណាលជាមួយសិស្ស និស្សិត លោកគ្រូ អ្នកគ្រូ នៅមជ្ឈមណ្ឌលអប់រំ និងបណ្ដុះបណ្ដាល ជា ស៊ីម កំចាយមារ ខេត្តព្រៃវែង នាព្រឹកថ្ងៃទី០៣ ខែកក្កដា ឆ្នាំ២០២៥។

សម្តេចតេជោ ហ៊ុន សែន បានថ្លែងបញ្ជាក់ថា កាលពីម្សិលមិញសម្ដេចបានទៅដល់ច្រកព្រំដែនម៉ឺនជ័យ  បើ ទោះបីជាមិនទាន់បានសម្ពោធជាផ្លូវការ ដោយសារមានបញ្ហានេះ បញ្ហានោះ តែវាមិនមានបញ្ហា អ្វីទេ តែត្រៀមសម្ពោធក៏កូវីដកើតឡើង ហើយឥឡូវនេះសង្ឃឹមថា នាយករដ្ឋមន្ត្រី ហ៊ុន ម៉ាណែត និងនាយករដ្ឋមន្ត្រីវៀតណាម នឹងសម្ពោធច្រកព្រំដែននេះជាផ្លូវការ។ សម្តេចតេជោបានគូសបញ្ជាក់ថា៖ «នៅពេលខ្ញុំចុះទៅមើលក៏ធ្វើបង្គោលព្រំដែនមួយបានបោះនៅក្នុងទឹក ប៉ុន្តែអ្វីដែលខ្ញុំគួរនិយាយឱ្យបានច្បាស់ថាការចរចារវាងព្រំដែនជាមួយ វៀត ណាម មានរឿងដែលល្អបំផុតមួយ  គឺត្រង់ថាភាគីទាំងពីរបានស្រុះស្រួលមួយបានទម្លាក់ខ្សែព្រំដែនដែលនៅជាប់មាត់ព្រែកទៅក្នុងតំបន់ទឹកជ្រៅដែលចំណុចនេះមិនមែនជាចំណុចសាមញ្ញនោះទេ» ។

សម្តេចតេជោបានបញ្ជាក់ឱ្យដឹងថា បារាំងបានគូសផែនទីនៅមាត់ព្រែកខាងវៀតណាម ដូច្នេះ បើវៀតណាមចង់ចុះព្រែកទាល់តែសុំមកកម្ពុជាបើឆ្លងមកត្រូវរំលោភដែនដីកម្ពុជា ។ សម្ដេចតេជោបន្ដថា ដំណោះស្រាយល្អបំផុតគឺធ្វើតាមនិយាមអន្តរជាតិដោយយកជ្រលងទឹកជ្រៅជាងគេធ្វើព្រំដែន ហើយការកំណត់ព្រំដែនរវាងកម្ពុជា និងវៀតណាម ធ្វើឱ្យប្រទេសទាំងពីរទទួលបានអត្ថប្រយោជន៍ទាំងសងខាង។ 

ជាមួយគ្នានេះ សម្តេចតេជោ ហ៊ុន សែន បានបញ្ជាក់បន្ថែមថា៖ « អីចឹងទេដំណោះស្រាយបញ្ហាព្រំដែន អនុវត្តន៍គោលការណ៍កំណត់ព្រំដែន ទៅក្នុងចំណុចទឹកជ្រៅនេះជាដំណោះស្រាយ ឈ្នះ ឈ្នះ ដែលយើងចង់ឃើញ ហើយយើងបានធ្វើជាមួយវៀតណាម ហើយក៏បានធ្វើជាមួយឡាវដែរ។ ព្រោះថាធ្វើយ៉ាងណាធានាថាប្រជាជនទាំង សងខាង មានទឹកប្រើប្រាស់អាចនេសាទបានយកប្រើប្រាស់ ហើយជាព្រំដែនសន្តិភាព  មិត្តភាព សហប្រតិបត្តិការ និងការអភិវឌ្ឍន៍»។ សម្តេចតេជោបានឱ្យដឹងផងដែរថា ការបើកច្រកអន្តរជាតិម៉ឺនជ័យមានគោលដៅសំខាន់គឺជំរុញការតភ្ជាប់សេដ្ឋកិច្ច ការផ្លាស់ប្តូរទំនិញទៅវិញទៅមកជាមួយកម្ពុជា និងវៀតណាម៕

ដោយ៖ ប៊ុនរិទ្ធ