AKP បន្ទាយមានជ័យ ថ្ងៃទី០២ ខែកក្កដា ឆ្នាំ២០២៥ -- ឯកឧត្តម នាយឧត្តមសេនីយ៍ គឹម ប៊ុនថាន រដ្ឋមន្ត្រីប្រតិភូអមនាយករដ្ឋមន្ត្រី នៅព្រឹកថ្ងៃទី០២ ខែកក្កដា ឆ្នាំ២០២៥ បានអញ្ជើញចុះត្រួតពិនិត្យស្ថានភាពជាក់ស្ដែងទូទៅនៅច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ ប្រកបដោយការយកចិត្តទុកដាក់ខ្ពស់។ ដំណើរទស្សនកិច្ចនេះមានការអមដំណើរដោយ លោកឧត្ដមសេនីយ៍ទោ ពេជ្រ វណ្ណា ប្រធានការិយាល័យទំនាក់ទំនងព្រំដែនកម្ពុជា-ថៃ រួមជាមួយសហការីមួយចំនួនទៀត ព្រមទាំងកងកម្លាំងចម្រុះ និងអាជ្ញាធរពាក់ព័ន្ធ ដែលបានចូលរួមយ៉ាងសកម្ម។

វត្តមានរបស់ឯកឧត្តម នាយឧត្តមសេនីយ៍ គឹម ប៊ុនថាន នៅច្រកទ្វារព្រំដែនដ៏សំខាន់នេះ គឺដើម្បីវាយតម្លៃដោយផ្ទាល់នូវដំណើរការនានា ក៏ដូចជាបញ្ហាប្រឈមដែលអាចកើតមានឡើង ក្នុងគោលបំណងពង្រឹងប្រសិទ្ធភាពការងារ និងធានាបាននូវសន្តិសុខ សុវត្ថិភាព ក៏ដូចជាកិច្ចសម្របសម្រួលនៅតាមព្រំដែន។

ឯកឧត្តមបានថ្លែងថា «ច្រកទ្វារព្រំដែនប៉ោយប៉ែតគឺជាសរសៃឈាមសេដ្ឋកិច្ចដ៏សំខាន់មួយរបស់កម្ពុជា។ យើងត្រូវតែធានាថារាល់សកម្មភាពទាំងអស់នៅទីនេះ ប្រព្រឹត្តទៅដោយរលូន ប្រសិទ្ធភាព និងស្របតាមច្បាប់ជាធរមាន។ ការចុះមកផ្ទាល់នៅថ្ងៃនេះ គឺដើម្បីពិនិត្យមើលពីកិច្ចការទាំងឡាយដែលកំពុងដំណើរការ ក៏ដូចជាស្វែងយល់ពីបញ្ហាប្រឈមនានា ដើម្បីយើងអាចរកដំណោះស្រាយរួមគ្នាឱ្យកាន់តែប្រសើរឡើង។»

ឯកឧត្តមបន្តទៀតថា «យើងសូមកោតសរសើរដល់កងកម្លាំងចម្រុះ និងអាជ្ញាធរពាក់ព័ន្ធទាំងអស់ ដែលបានខិតខំប្រឹងប្រែងយ៉ាងខ្លាំងក្នុងការថែរក្សាសន្តិសុខ សណ្ដាប់ធ្នាប់ និងការសម្របសម្រួលការងារប្រចាំថ្ងៃនៅទីនេះ។ ការងាររបស់បងប្អូនទាំងអស់ពិតជាសំខាន់ណាស់ ក្នុងការធានាបាននូវស្ថិរភាព និងភាពរលូននៃការធ្វើចរាចរណ៍ឆ្លងកាត់ព្រំដែន ក៏ដូចជាការប្រយុទ្ធប្រឆាំងបទល្មើសឆ្លងដែននានា។»

ឯកឧត្តម នាយឧត្តមសេនីយ៍ ក៏បានជំរុញឱ្យមានការបន្តកិច្ចសហប្រតិបត្តិការល្អ រវាងអាជ្ញាធរកម្ពុជា និងថៃ ដើម្បីពង្រឹងទំនាក់ទំនងទ្វេភាគី ក៏ដូចជាដោះស្រាយបញ្ហាប្រឈមរួមគ្នានានា ក្នុងគោលបំណងបង្កើតបរិយាកាសព្រំដែនមួយប្រកបដោយសន្តិភាព វិបុលភាព និងសុវត្ថិភាព។

ដំណើរទស្សនកិច្ចរបស់ឯកឧត្តម នាយឧត្តមសេនីយ៍ គឹម ប៊ុនថាន នៅច្រកទ្វារព្រំដែនអន្តរជាតិប៉ោយប៉ែត ត្រូវបានគេរំពឹងថា នឹងរួមចំណែកយ៉ាងសំខាន់ក្នុងការជំរុញការងារកិច្ចការព្រំដែនឱ្យកាន់តែមានប្រសិទ្ធភាព ពង្រឹងសន្តិសុខ និងសម្រួលដល់ការធ្វើដំណើរឆ្លងកាត់ព្រំដែន ក៏ដូចជាសកម្មភាពពាណិជ្ជកម្មឱ្យកាន់តែមានភាពរលូន និងរីកចម្រើន៕

ដោយ ឈុន សារ៉ាត