AKP កំពង់ស្ពឺ ថ្ងៃទី០១ ខែកក្កដា ឆ្នាំ២០២៥ -- លោក ហន ពិសិដ្ឋ អភិបាលនៃគណៈអភិបាលស្រុកគងពិសី នាព្រឹកថ្ងៃអង្គារ ទី០១ ខែកក្កដា ឆ្នាំ២០២៥ បានអញ្ជើញចុះសួរសុខទុក្ខ និងនាំយកអំណោយមនុស្សធម៌ចែកជូនបងប្អូនពលករខ្វះខាតដែលទើបត្រឡប់មកពីប្រទេសថៃ ដោយពិនិត្យឃើញស្ថានភាពលំបាក និងខ្វះខាតរបស់បងប្អូនប្រជាពលរដ្ឋក្នុងមូលដ្ឋានស្រុកគងពិសី ដែលទើបត្រឡប់មកពីប្រទេសថៃ និងតបតាមការណែនាំរបស់ថ្នាក់ដឹកនាំគ្រប់លំដាប់ថ្នាក់។

លោក ហន ពិសិដ្ឋ អភិបាលនៃគណៈអភិបាលស្រុកគងពិសី រួមជាមួយលោកស្រី សៀក សុកល អភិបាលរងស្រុក និងក្រុមការងាររដ្ឋបាលស្រុក បាននាំយកសម្ភារ និងថវិកា ចែកជូនបងប្អូនប្រជាពលរដ្ឋចំនួន០៦គ្រួសារ ស្ថិតនៅភូមិព្រៃទើ ឃុំព្រៃញាតិ ដែលមានការខ្វះខាតក្នុងពេលត្រឡប់មកពីប្រទេសថៃ រួមមាន៖ អង្ករចំនួន២៥គីឡូក្រាម មីចំនួន០១កេស ទឹកស៊ីអ៊ីវចំនួន០១យួរ ទឹកត្រីចំនួន០១យួរ ភួយចំនួន០១ មុងចំនួន០១ និងថវិកាចំនួន៥០,០០០រៀល។

លោក ហន ពិសិដ្ធ បានលើកទឹកចិត្តឱ្យបងប្អូនដែលវិលត្រឡប់មកស្រុកំណើតវិញទាំងអស់បន្តមានក្តីសង្ឃឹម និងជឿជាក់លើរដ្ឋបាលមូលដ្ឋានដែលតែងតែយកចិត្តទុកដាក់ និងជួយដោះស្រាយរាល់បញ្ហាប្រឈមរបស់ប្រជាពលរដ្ឋ។ រដ្ឋបាលមូលដ្ឋានស្រុកនឹងខិតខំប្រឹងប្រែងស្វែងរកនូវឱកាសការងារ ក៏ដូចជាធានានូវលក្ខខណ្ឌការងារសមរម្យសម្រាប់បងប្អូនពលករទាំងអស់ដែលវិលត្រឡប់មកស្រុកកំណើតក៍ដូចជាមាតុភូមិវិញ៕

ដោយ លឹម សាន្ត