AKP ភ្នំពេញ ថ្ងៃទី០១ ខែកក្កដា ឆ្នាំ២០២៥ -- លោកស្រីវេជ្ជបណ្ឌិតឯកទេស ហេង សុខចំរើន អនុប្រធានមជ្ឈមណ្ឌលជាតិផ្តល់ឈាមបានថ្លែងថា នៅកម្ពុជារៀងរាល់៥នាទីម្តងយើងត្រូវការឈាម១ប្លោកដើម្បីសង្គ្រោះជីវិតមនុស្សម្នាក់ ហើយការបរិច្ចាគឈាមរបស់សប្បុរសជនគឺមានសារៈសំខាន់ខ្លាំងណាស់សម្រាប់ការជួយសង្គ្រោះជីវិត។ លោកស្រីវេជ្ជបណ្ឌិតឯកទេសបានបញ្ជាក់ថា ការបរិច្ចាគឈាមនេះវាមិនត្រឹមតែមិនប៉ះពាល់ទៅលើសុខភាពរបស់យើងប៉ុណ្ណោះទេ តែផ្ទុយទៅវិញវាថែមទាំងបានផ្តល់អត្ថប្រយោជន៍ដល់បងប្អូនទៅវិញទេនៅក្នុងពេលដែលបងប្អូនចូលរួមបរិច្ចាគឈាម ដូចជា ការទទួលបានការពិនិត្យរកមេរោគឆ្លងដែលមាននៅក្នុងឈាម ជំងឺរលាកថ្លើមប្រភេទ B ជំងឺរលាកថ្លើមប្រភេទ C និងមេរោគអេដស៍។ល។ ចំពោះលទ្ធផលរបស់សប្បុរសជនខាងមជ្ឈមណ្ឌលជាតិផ្តល់ឈាមបានរក្សាការសម្ងាត់ជូន។ ការលើកឡើងរបស់អនុប្រធានមជ្ឈមណ្ឌលជាតិផ្តល់ឈាមយ៉ាងដូច្នេះក្នុងកម្មវិធីបរិច្ចាគឈាមដោយស្ម័គ្រចិត្តក្រោមប្រធានបទ៖ «មន្ត្រីក្រសួងព័ត៌មានរួមគ្នាបរិច្ចាគឈាម ដើម្បីសង្គ្រោះជីវិតមនុស្ស» រៀបចំឡើងដោយសហភាពសហព័ន្ធយុវជនកម្ពុជា នៃវិស័យព័ត៌មាន នៅទីស្តីការក្រសួងព័ត៌មាន នាព្រឹកថ្ងៃទី០១ ខែកក្កដា ឆ្នាំ២០២៥ ។

លោកស្រីវេជ្ជបណ្ឌិតឯកទេស ហេង សុខចំរើន បានគូសបញ្ជាក់ថា ការបរិច្ចាគឈាមបានធ្វើឱ្យយើងអាចកាត់បន្ថយហានិភ័យនៃការរីកលូតលាស់នៃជម្ងឺមហារីក ការផ្តល់ឈាមនឹងធ្វើឱ្យមានការកាត់បន្ថយការឡើងសម្ពាធឈាម ហើយនៅពេលដែលយើងមានបរិច្ចាគឈាមម្តងៗយើងនឹងទទួលបាននូវអារម្មណ៍រីករាយ ស្រស់ស្រាយថែមទៀតផង។ លោកស្រីវេជ្ជបណ្ឌិតក៏បានអំពាវនាវដល់ពលរដ្ឋកម្ពុជា ជាពិសេសយុវជនសូមឱ្យចូលរួមក្នុងការបរិច្ចាគឈាមដើម្បីកិច្ចការមនុស្សធម៌ ព្រោះថាយើងមានអ្នកជំងឺកំពុងត្រូវការនូវការចាក់បញ្ចូលឈាមជារៀងរាល់ថ្ងៃ ពោលគឺនៅរៀងរាល់៥នាទីម្តងយើងមានតម្រូវការឈាម១ប្លោកយ៉ាងតិច។

ក្នុងឱកាសនោះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានគូសបញ្ជាក់អំពីសារៈសំខាន់នៃការចូលរួមក្នុងការបរិច្ចាគឈាមរបស់សប្បុរសជន ដើម្បីត្រៀមបម្រុងក្នុងកិច្ចការជួយសង្គ្រោះអាយុជីវិតអ្នកជំងឺដែលមានតម្រូវការនូវការដាក់បញ្ចូលឈាមជាចាំបាច់ ដូចជា ជនរងគ្រោះដោយសារគ្រោះថ្នាក់ចរាចរណ៍ ដែលពួកគេបានបាត់បង់ឈាមច្រើន និងអាចមានគ្រោះថ្នាក់ដល់អាយុជីវិតបានក្នុងករណីដែលគ្មានការចាក់បញ្ចូលឈាមដើម្បីជំនួសឈាមដែលបានបាត់បង់ និងអ្នកជំងឺដែលត្រូវការនូវការវះកាត់ជាដើម គឺសុទ្ធតែត្រូវការនូវការចាក់បញ្ចូលឈាមជាចាំបាច់។ ឯកឧត្តមរដ្ឋមន្ត្រីបានសម្តែងនូវការពេញចិត្តចំពោះមន្ត្រីក្រសួងព័ត៌មាន ដែលបានចូលរួមក្នុងកិច្ចមនុស្សធម៌ តាមរយៈការបរិច្ចាគឈាម ជូនដល់មជ្ឈមណ្ឌលជាតិផ្តល់ឈាមនាពេលនេះ ហើយសម្រាប់មន្ត្រីក្រសួងព័ត៌មានគួរតែធ្វើការបរិច្ចាគឈាមជូនមជ្ឈមណ្ឌលជាតិផ្តល់ឈាមឱ្យបានពីរ ឬបីដងនៅក្នុង១ឆ្នាំ ដើម្បីកាត់បន្ថយនូវតម្រូវការឈាមជាចាំបាច់របស់មជ្ឈមណ្ឌលជាតិផ្តល់ឈាម។ 

ឯកឧត្តមរដ្ឋមន្ត្រីបានបន្ថែមថា ការផ្តល់ឈាមគឺទទួលបានបុណ្យខ្ពស់ណាស់ ព្រោះឈាមរបស់យើងគឺជាជីវិត ការចូលរួមបរិច្ចាគឈាមគឺជាកិច្ចការមនុស្សធម៌មួយ ខណៈតម្រូវការឈាមប្រចាំថ្ងៃនៅកម្ពុជាមានចំនួនច្រើនដូចការបញ្ជាក់របស់លោក ស្រីវេជ្ជបណ្ឌិតឯកទេស ហេង សុខចំរើន អនុប្រធានមជ្ឈមណ្ឌលជាតិផ្តល់ឈាមដែលថា ក្នុងរយៈពេល ៥នាទីម្តងយើងត្រូវការឈាម១ប្លោក ដែលតម្រូវការក្នុងការប្រើប្រាស់ឈាមច្រើនជាងគេគឺករណីនៃគ្រោះថ្នាក់ចរាចរណ៍ អ្នកជំងឺដែលត្រូវការការវះកាត់ និងអ្នកជំងឺមួយចំនួនទៀតក៏ត្រូវការនូវការចាក់បញ្ចូលឈាមដើម្បីបំពេញនូវចំនួនឈាមនៅក្នុងខ្លួនដែលបានបាត់បង់។ ឯកឧត្ដមរដ្ឋមន្រ្ដីបានឱ្យដឹងទៀតថា ដែលទាំងនេះគឺសុទ្ធតែជាតម្រូវការដែលទាមទារឱ្យមានការចូលរួមបរិច្ចាគឈាមពីសប្បុរសជនជាចាំបាច់៕

ដោយ៖ ចាន់ សុភឿន , រូបភាព៖ ខឹម វណ្ណារ៉ា