AKP ភ្នំពេញ ថ្ងៃទី១ ខែកក្កដា ឆ្នាំ២០២៥ -- សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជាបានលើកឡើងថា ទោះបីជាមានបញ្ហាព្រំដែន ជាមួយប្រទេសថៃ ដែលត្រូវអូសបន្លាយរយៈពេលវែងយ៉ាងណាក៏ដោយ សម្រាប់កម្ពុជានៅតែធានា បាននូវសន្តិសុខស្បៀង ជូនដល់ប្រជាពលរដ្ឋដដែល។  ការលើកឡើងរបស់សម្ដេចធិបតីនាយករដ្ឋមន្រ្ដីបែបនេះ ក្នុងឱកាសអញ្ជើញជាអធិបតី «ទិវាមច្ឆជាតិ ១ កក្កដា ២០២៥» នាព្រឹកថ្ងៃទី០១ ខែកក្កដា ឆ្នាំ២០២៥ នៅបឹងទន្លេបាទី ស្ថិតក្នុងភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ។

សម្តេចធិបតី ហ៊ុន ម៉ាណែត បានថ្លែងថា កត្តាមួយសំខាន់ នៃការធានាបាន និងបង្កលក្ខណៈសន្តិសុខស្បៀង គឺសន្តិភាព និងគោលនយោបាយច្បាស់លាស់ ខណៈដែលរាជរដ្ឋាភិបាលច្រើនអាណត្តិ តាំងពីអាណត្តិមុន មកដល់អាណត្តិនេះ បន្តអនុគ្រោះទៅដល់វិស័យឯកជន ធ្វើការងារក្នុងវិស័យកសិកម្ម ដែលរាជរដ្ឋាភិបាលបានជួយជាច្រើន រួមទាំងការកសាងប្រព័ន្ធធារាសាស្ត្រជាដើម ។  សម្តេចធិបតីបានថ្លែងបញ្ជាក់ថា៖ «ទីផ្សារបើកបន្ថែម ការជួយនូវលំនឹងមួយចំនួន ការធានាផលិតផលមួយចំនួន ពិតណាស់ទីផ្សារបរទេសឡើងចុះ យើងខិតខំភ្ជាប់ បង្កើតទីផ្សារបន្ថែមទៀត កុំពឹងលើទីផ្សារតែមួយ។ បងប្អូនបើយើងពឹងលើទីផ្សារតែមួយយើងងាប់ អីចឹងបានប្រទេសខ្លះគេចង់មើលងាយ គេថាយើងពឹងលើទីផ្សារគេ គេបិទសាក បិទងាប់ខ្លួនឯង ដោយសារកម្ពុជាបែបនេះ យើងមិនអួត»។  សម្តេចធិបតីនាយករដ្ឋមន្រ្ដីបានបញ្ជាក់ផងដែរថា ការគិតគូររបស់រាជរដ្ឋាភិបាល មិនត្រឹមតែវិស័យកសិកម្ម ដែលជាលក្ខណៈដាំដុះតែដំណាំទេ ការធ្វើនេសាទ ការដាំជាលក្ខណៈយុទ្ធសាស្ត្រ ដូចជាដំណាំកៅស៊ូកែច្នៃផ្សេងៗ ដំណាំរួមផ្សំ ការចិញ្ចឹមសត្វក៏រាជរដ្ឋាភិបាលយកចិត្តទុកដាក់ដែរ ធ្វើយ៉ាងណាធានានូវសន្តិសុខស្បៀងផ្ទៃក្នុងរបស់កម្ពុជា ។  

ជាមួយគ្នានេះ សម្ដេចធិបតីនាយករដ្ឋមន្រ្ដីបានបន្ថែមថា ពិតណាស់ កម្ពុជា មិនបិទនៅក្នុងការធ្វើពាណិជ្ជកម្ម ជាមួយប្រទេសផ្សេងៗ រួមទាំងប្រទេសជិតខាង ទាំងកសិកម្ម និងវិស័យផ្សេងៗ ប៉ុន្តែកម្ពុជាត្រូវពង្រឹងសមត្ថភាព ក្នុងការធានាផ្ទៃក្នុងរបស់ខ្លួន៕

ដោយ៖ ប៊ុនរិទ្ធ