AKP កំពង់ស្ពឺ ថ្ងៃទី២៥ ខែមិថុនា ឆ្នាំ២០២៥--

ប្រភពរដ្ឋបាលខេត្តកំពង់ស្ពឺបានឱ្យដឹងថា នាព្រឹកថ្ងៃពុធ ទី២៥ ខែមិថុនា ឆ្នាំ២០២៥ ដោយមានការអញ្ជើញពីក្រុមហ៊ុន Huizhou JiaMei Garment Ltd របស់ប្រទេសចិន ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានអញ្ជើញដឹកនាំគណៈប្រតិភូខេត្តទៅទស្សនកិច្ចនៅក្រុមហ៊ុន J.K.H Health Co., Ltd.  ដែលជាដៃគួររបស់ក្រុមហ៊ុន Huizhou JiaMei Garment Ltd នៅទីក្រុងឆាងអាន ខេត្តក្វាងទុង នៃសាធារណរដ្ឋប្រជាមានិតចិន។

 
សូមជម្រាបថា ក្រុមហ៊ុន J.K.H Health Co., Ltd. ជាក្រុមហ៊ុនដែលផលិតឧបករណ៍បច្ចេកវិទ្យា វិទ្យាសាស្ត្រសុខភាព ដែលមានផលិតផលជាង១៦០ប្រភេទ និងមានបុត្រសម្ព័នរបស់ក្រុមហ៊ុននៅច្រើនប្រទេស ក្នុងនោះក៏មានបុត្រសម្ព័ន្ធរបស់ក្រុមហ៊ុន មាន១ទីតាំងគឺនៅក្នុងខេត្តកំពង់ស្ពឺនៃព្រះរាជាណាចក្រកម្ពុជាផងដែរ។

ក្នុងដំណើរទស្សនកិច្ចនោះ ឯកឧត្តមបណ្ឌិត ជាម ច័ន្ទសោភ័ណ និងគណៈប្រតិភូខេត្ត ក៏បានជួបសម្តែងការគួរសម និងទស្សនាផ្ទាល់ទីតាំងក្រុមហ៊ុន ជាមួយថ្នាក់ដឹកនាំ និងបុគ្គលិករបស់ក្រុមហ៊ុន និងបានថ្លែងអំណរគុណដល់ថ្នាក់ដឹកនាំ និងបុគ្គលក្រុមហ៊ុន ដែលបានទទួលរឭស្វាគមន៍យ៉ាងកក់ក្តៅដល់គណៈប្រតិភូខេត្តកំពង់ស្ពឺ។

ប្រភពដដែលបានបញ្ជាក់ថា ឯកឧត្តមបណ្ឌិតអភិបាលខេត្តក៏បានមានប្រសាសន៍ពីសក្តានុពល និងឱកាសសម្រាប់ការវិនិយោគនៅក្នុងខេត្តកំពង់ស្ពឺ ក្នុងនោះ ឯកឧត្តមបានមានប្រសាសន៍ថានឹងជួយសម្របសម្រួលដល់ក្រុមហ៊ុនដែលមានបំណងចង់វិនិយោគទុននៅក្នុងខេត្តកំពង់ស្ពឺផងដែរ។ ដោយមានការយកចិត្តទុកដាក់ពីប្រមុខដឹកនាំរាជរដ្ឋាភិបាលកម្ពុជាលើការងារវិនិយោគ បានអនុញ្ញាតឱ្យគម្រោងវិនិយោគមានទុនក្រោម លានដុល្លារអាមេរិក អាចទទួលបានការអនុម័តត្រឹមអនុគណៈកម្មាធិការវិនិយោគរាជធានី-ខេត្ត៕

ដោយ លឹម សាន្ត