AKP ភ្នំពេញ ថ្ងៃទី២៥ ខែមិថុនា ឆ្នាំ២០២៥--

លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា នៅទីស្តីការក្រសួង ព្រឹកថ្ងៃទី២៥ ខែមិថុនា ឆ្នាំ២០២៥បានចុះអនុស្សរណៈនៃការយោគយល់គ្នារវាងក្រសួងអប់រំ យុវជន និងកីឡា និងមូលនិធិជំនួយសប្បុរសធម៌ Ng Teng Fong តាមរយៈក្រុមហ៊ុន វ៉ាយ អេច អេស (ខេមបូឌា) ហ៊្វូដ & បេវើរីច ភីធីអី អិលធីឌី លើគម្រោងយុទ្ធនាការលើកកម្ពស់សុវត្ថិភាពចំណីអាហារនៅតាមគ្រឹះស្ថានសិក្សា ដែលគម្រោងនេះរៀបចំឡើងក្នុងគោលបំណងចូលរួមចំណែកលើកកម្ពស់ការយល់ដឹងស្តីពីការទទួលទានភេសជ្ជៈដែលមានកម្រិតជាតិស្ករតិចដល់សិស្សានុសិស្ស នៅសាលាបឋមសិក្សា និងអនុវិទ្យាល័យ ជាពិសេសបណ្តុះទម្លាប់ក្នុងការទទួលទានភេសជ្ជៈដែលកម្រិតជាតិស្ករតិច។

ក្នុងឱកាសនេះ លោកជំទាវបណ្ឌិតរដ្ឋលេខាធិការប្រចាំការបានវាយតម្លៃខ្ពស់ចំពោះភាគីពាក់ព័ន្ធទាំងអស់ដែលបានសហការ និងសម្រេចបាននូវអនុស្សរណៈយោគយល់គ្នានេះ ចូលរួមចំណែកក្នុងការលើកកម្ពស់សុខភាពសាធារណៈដែលជាមូលធនមនុស្សក្នុងការអភិវឌ្ឍប្រទេសកម្ពុជា ដោយក្រុមហ៊ុន Yeo's នឹងផ្តល់ជូនភេសជ្ជៈ Yeo's ដែលត្រូវបានអនុញ្ញាត និងទទួលស្គាល់ដោយក្រសួងពាណិជ្ជកម្មដល់សិស្សានុសិស្សនៅក្នុងសាលាបឋមសិក្សា និងអនុវិទ្យាល័យចំនួន២០០កន្លែងនៅទូទាំងប្រទេសកម្ពុជា ដោយលោកជំទាវបានគូសបញ្ជាក់ថា ការលើកកម្ពស់សុវត្ថិភាពចំណីអាហារនៅតាមគ្រឹះស្ថានសិក្សាគឺជាកិច្ចការចាំបាច់មួយ ដើម្បីធានាបានថាសិស្សានុសិស្សកម្ពុជាមានសុខភាពល្អ រឹងមាំ និងមានសមត្ថភាពពេញលេញក្នុងការសិក្សារៀនសូត្រ ជាពិសេសបំពេញការងារប្រកបដោយប្រសិទ្ធភាព។

តាងនាមក្រសួងអប់រំ យុវជន និងកីឡា លោកជំទាវបណ្ឌិត គឹម សេដ្ឋានី បានថ្លែងអំណរគុណយ៉ាងជ្រាលជ្រៅដល់ក្រុមហ៊ុន Yeo's និងមូលនិធិជំនួយសប្បុរសធម៌ Ng Teng Fong ចំពោះការគាំទ្រដ៏មានសារៈសំខាន់នេះ និងសង្ឃឹមថាកិច្ចសហប្រតិបត្តិការនេះនឹងទទួលបានជោគជ័យ ជាពិសេសអាចបន្តពង្រីកទៅកាន់គ្រឹះស្ថានសិក្សាកាន់តែច្រើនថែមទៀត ដើម្បីធានាបាននូវសុខភាព និងការអប់រំកាន់តែល្អប្រសើរសម្រាប់សិស្សានុសិស្សកម្ពុជានាពេលអនាគត៕

ដោយ៖ ចាន់ សុភឿន (ប្រភព៖ ក្រសួងអប់រំ)