AKP ភ្នំពេញ ថ្ងៃទី២៥ ខែមិថុនា ឆ្នាំ២០២៥

ឯកឧត្ដម ង្វៀន មិញវូ (Nguyen Minh Vu) ឯកអគ្គរដ្ឋទូតនៃសាធារណរដ្ឋសង្គមនិយមវៀតណាមប្រចាំនៅ  កម្ពុជាបានលើកឡើងថា ក្នុងរយៈពេល ៥ ខែ ដើមឆ្នាំ ២០២៥នេះ ទំហំពាណិជ្ជកម្មទ្វេភាគីរវាងវៀតណាម និងកម្ពុជាសម្រេចបានប្រមាណ ៥,៥ ពាន់លានដុល្លារអាម៉េរិក កើនឡើងប្រមាណ ១៩% បើប្រៀបធៀបនឹងរយៈពេលដូចគ្នាកាលពីឆ្នាំមុន។ 

ថ្លែងប្រាប់ទីភ្នាក់ងារសារព័ត៌មានកម្ពុជា (AKP) ក្នុងឱកាសខួបលើកទី ៥៨ នៃការបង្កើតទំនាក់ទំនងការទូតរវាងវៀតណាម និងកម្ពុជា ឯកឧត្ដម ង្វៀន មិញវូ បានគូសបញ្ជាក់ថា ក្នុងអំឡុងពេលដែលកិច្ចព្រមព្រៀងពាណិជ្ជកម្មកម្ពុជា-វៀតណាមត្រូវបានចុះហត្ថលេខាកាលពីឆ្នាំ ១៩៩៨ ទំហំពាណិជ្ជកម្មរវាងប្រទេសទាំងពីរសម្រេចបានត្រឹមតែ ១១៧ លានដុល្លារអាម៉េរិកប៉ុណ្ណោះ។ លុះដល់ឆ្នាំ ២០២៤ ទំហំពាណិជ្ជកម្មទ្វេភាគីឈានដល់ ១០,១ ពាន់លានដុល្លារអាម៉េរិក។ ឯកឧត្ដមឯកអគ្គរដ្ឋទូតបានថ្លែងបញ្ជាក់ថា ក្នុងរយៈពេល ៥ ខែដើមឆ្នាំ ២០២៥ នេះ ទំហំពាណិជ្ជកម្មទ្វេភាគីរវាងភាគីទាំងពីរសម្រេចបានប្រមាណ ៥,៥ ពាន់លានដុល្លារអាម៉េរិក ក្នុងនោះ កម្ពុជាបាននាំចេញទៅវៀតណាមចំនួន ៣,២៤ ពាន់លានដុល្លារអាម៉េរិក កើនឡើង ៣១.៣% បើប្រៀបធៀបនឹងរយៈពេលដូចគ្នាកាលពីឆ្នាំមុន ដោយកត់សម្គាល់អតិរេកពាណិជ្ជកម្មជិត ១ ពាន់លានដុល្លារ ហើយក៏រំពឹងថានៅឆ្នាំនេះទំហំពាណិជ្ជកម្មទ្វេភាគីនឹងលើសពី ១២ ពាន់លានដុល្លារអាម៉េរិក។ ឯកឧត្ដមបានបន្ដថា ក្នុងពេលបច្ចុប្បន្ននេះ ប្រទេសវៀតណាមជាដៃគូពាណិជ្ជកម្មអន្តរជាតិធំជាងគេលំដាប់ទីបីរបស់កម្ពុជា បន្ទាប់ពីប្រទេសចិន និងសហរដ្ឋអាមេរិក ក៏ប៉ុន្តែវៀតណាមជាទីផ្សារនាំចេញធំទីពីររបស់កម្ពុជាគឺបន្ទាប់ពីសហរដ្ឋអាមេរិក។ ឯកឧត្ដមឯកអគ្គរដ្ឋទូតបានសង្កត់ធ្ងន់ថា៖ «វៀតណាមក៏ជាទីផ្សារនាំមុខគេដែលនាំចូលផលិតផលកសិកម្មសំខាន់ៗ របស់កម្ពុជាដូចជា អង្ករ គ្រាប់ស្វាយចន្ទី ដំឡូងមី កៅស៊ូ។ល។ ប្រទេសទាំងពីរបានចុះហត្ថលេខាលើកិច្ចព្រមព្រៀងមួយចំនួនដើម្បីជំរុញពាណិជ្ជកម្ម រួមមានកិច្ចព្រមព្រៀងពាណិជ្ជកម្មតាមព្រំដែន កិច្ចព្រមព្រៀងជំរុញនិងកាំពារការវិនិយោគ កិច្ចព្រមព្រៀងជំរុញពាណិជ្ជកម្មទ្វេភាគីប្រចាំឆ្នាំ MOU ស្តីពីកិច្ចសហប្រតិបត្តិការហេដ្ឋារចនាសម្ព័ន្ធពាណិជ្ជកម្មតាមព្រំដែន»។ 

បើតាមឯកឧត្ដម ង្វៀន មិញវូ ជាមួយនឹងទំហំសេដ្ឋកិច្ចរបស់ប្រទេសទាំងពីរកាន់តែរីកធំឡើងពីមួយថ្ងៃទៅមួយថ្ងៃ រួមជាមួយតម្រូវការដោះដូរទំនិញ និងសេវាកម្មរវាងប្រទេសទាំងពីរកាន់តែកើនឡើងជាលំដាប់ ហើយបំពេញបន្ថែមឱ្យគ្នានោះ ព្រមជាមួយនឹងទំនាក់ទំនងមិត្តភាពល្អ និងសហគមន៍ធុរកិច្ចដ៏ស្វាហាប់នៃប្រទេសទាំងពីរ។ ឯកឧត្ដមជឿជាក់ថា ប្រទេសទាំងពីរនឹងសម្រេចបាននូវគោលដៅបង្កើនទំហំពាណិជ្ជកម្មទ្វេភាគីដល់ ២០ ពាន់លានដុល្លារអាម៉េរិកក្នុងរយៈពេលប៉ុន្មានឆ្នាំខាងមុខ។

ឯកឧត្ដម ឯកអគ្គរដ្ឋទូតវៀតណាមប្រចាំនៅកម្ពុជាបានបញ្ជាក់ឱ្យដឹងទៀតថា កិច្ចសហប្រតិបត្តិការក្នុងវិស័យសេដ្ឋកិច្ច ពាណិជ្ជកម្ម និងវិនិយោគតែងតែជាវិស័យសំខាន់ររវាងប្រទេសទាំងពីរ ជាពិសេសគឺថ្នាក់ដឹកនាំជាន់ខ្ពស់នៃប្រទេសទាំងពីរបានកំណត់ថា នេះជាវិស័យគោលដៅសំខាន់នៃកិច្ចសហប្រតិបត្តិការក្នុងដំណាក់កាលចាប់ពីពេលនេះដល់ឆ្នាំ ២០៣០។ ចាប់តាំងពីពេលចុះហត្ថលេខាលើកិច្ចព្រមព្រៀងកិច្ចសហប្រតិបត្តិការសេដ្ឋកិច្ចនិងពាណិជ្ជកម្មកម្ពុជា-វៀតណាម (ឆ្នាំ ១៩៩៨) រហូតមកទល់ពេលនេះ ទំនាក់ទំនងពាណិជ្ជកម្មនិងវិនិយោគរវាងប្រទេសទាំងពីរបានដើរតួនាទីយ៉ាងសំខាន់ ចូលរួមចំណែកជំរុញការអភិវឌ្ឍន៍សេដ្ឋកិច្ចសង្គមនៃប្រទេសរៀងៗខ្លួន ព្រមទាំង បង្កើតលក្ខខណ្ឌអំណោយផលសម្រាប់ការបង្កើននិងពង្រីកកិច្ចសហប្រតិបត្តិការគ្រប់ជ្រុងជ្រោយរវាងភាគីទាំងពីរ។

ឯកឧត្ដមបានបន្ថែមថា ទំនាក់ទំនងអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និរន្តរភាពយូរអង្វែងរវាងវៀតណាម និងកម្ពុជា ត្រូវបានពូនជ្រុំដោយថ្នាក់ដឹកនាំនិងប្រជាជននៃប្រទេសទាំងពីរគ្រប់ជំនាន់ ហើយត្រូវបានពង្រឹងនិងអភិវឌ្ឍន៍ពីមួយថ្ងៃទៅមួយថ្ងៃ៕

ដោយ៖ រិទ្ធី