AKP ភ្នំពេញ ថ្ងៃទី១៧ ខែមិថុនា ឆ្នាំ២០២៥--
សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជាបានលើកឡើងថា អភិក្រម៣ដែលកម្ពុជាបានធ្វើ បានអនុវត្ដន៍ និងបន្ដអនុវត្ដន៍គឺបច្ចេកទេស ច្បាប់អន្ដរជាតិ និងយោធា តែយោធា   កម្ពុជានឹងមិនធ្វើមុននោះទេ យើងឆ្លើយតបបើសិនជាមានការប៉ុនប៉ងឈ្លានពាន កម្ពុជាតែងតែប្រើប្រាស់គោលការណ៍ និងមិនគាំទ្រការប្រើប្រាស់កងកម្លាំងប្រដាប់អាវុធទៅឈា្លនពាននរណានោះទេ។ ការលើកឡើងរបស់សម្ដេចធិបតីនាយករដ្ឋមន្រ្ដីបែបនេះ ក្នុងពិធីបិទមហាសន្និបាតវិសាមញ្ញកាយរឹទ្ធិជាតិកម្ពុជា នារសៀលថ្ងៃទី១៧ ខែមិថុនា ឆ្នាំ២០២៥ នៅវិទ្យាស្ថានជាតិអប់រំ រាជធានីភ្នំពេញ។

សម្ដេចធិបតី ហ៊ុន ម៉ាណែត បានគូសបញ្ជាក់ថា នៅកន្លែងណាដែលយន្ដការទ្វេភាគីមិនអាចដោះបានដូចជារឿងនៅប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី យើងត្រូវប្រើប្រាស់យន្ដការទី៣ គឺយន្ដការអន្ដរជាតិដូចជាតុលាការយុត្ដិធម៌អន្ដរជាតិ (ICJ) នេះ ដើម្បីដោះស្រាយបញ្ហា។ សម្ដេចធិបតីបានថ្លែងបញ្ជាក់ថា៖ «ប្រសិនជាក្នុងពេលនេះយន្ដការនេះកំពុងតែបន្ដដោះស្រាយមិនទាន់ចប់ ស្រាប់តែមានការប៉ុនប៉ងឈានពានដោយកងកម្លាំងប្រដាប់អាវុធមកលើកម្ពុជា រាជរដ្ឋាភិបាល និងកងទ័ពរបស់យើងនឹងត្រៀមខ្លួនជាស្រេចដើម្បីការពារបូរណភាពទឹកដីរបស់យើង ដែលនេះគឺជាការប្ដេជ្ញាចិត្ដរបស់យើង»។ សម្ដេចធិបតីនាយករដ្ឋមន្រ្ដីបានរម្លឹកឱ្យដឹងដែរថា ហេតុនេះហើយបានជាកម្ពុជាបោះឆ្នោតគាំទ្រដល់អង្គការសហប្រជាជាតិតាំងពីដើមទីមក ប្រឆាំងនឹងរុស្ស៊ីដែលប្រើប្រាស់កម្លាំងចូលអ៊ុយក្រែននោះ និងហេតុអ្វីបានជាកម្ពុជា មិនគាំទ្រដល់រុស្ស៊ី ព្រោះរុស្ស៊ីជាមិត្ដចាស់របស់កម្ពុជានោះ នៅពេលដែលប្រទេសចិន និងវៀតណាមគេបោះឆ្នោតគាំទ្ររុស្ស៊ី។ សម្ដេចធិបតីបានពន្យល់បន្ថែមថា៖ «ដែលនេះជារឿងផ្សេង គឺកម្ពុជាមានហេតុផលរបស់ខ្លួន កម្ពុជាធ្លាប់ស្គាល់រសជាតិនៃការឈា្លនពានហើយនៅឆ្នាំ២០១១ និងឆ្នាំ ២០១៣។ នេះគឺជាគោលជំហររបស់កម្ពុជា ហើយឥឡូវប្រសិនបើមានការឈ្លានពានបែបនេះទៀត យើងត្រៀមខ្លួននៅក្នុងការការពារអធិបតេយ្យភាពជាតិរបស់យើង ហើយកម្លាំងរបស់យើងដាក់នៅទីនោះមិនមែនដាក់តាំងនោះទេ តែយើងមិនឈ្លានពានអ្នកណានោះទេ»។

ជាមួយគ្នានេះដែរ សម្ដេចធិបតី ហ៊ុន ម៉ាណែត បានលើកឡើងពាក់ព័ន្ធនឹងព្រំប្រទល់រវាងកម្ពុជា និងថៃ មានប្រវែងជាង៨០០ គឺឡូម៉ែត្រ ហើយគណៈកម្មការចម្រុះព្រំដែនរវាងប្រទេសទាំងពីរកន្លងទៅបានធ្វើការងារជាច្រើនចាប់តាំងពីឆ្នាំ២០០០មក និងក៏មានការឯកភាពគ្នាលើបង្គោលចំនួន៤៣រួចទៅហើយ ក្នុងចំណោមបង្គោលសរុប៧៤បង្គោល។ សម្ដេចធិបតីបានបញ្ជាក់ឱ្យដឹងផងដែរថា ភាគីទាំងពីរបានឯកភាពគ្នាចំនួន៤៣បង្គោល ហើយបើយើងបកក្រោយយកទាំងអស់១កញ្ចប់ទៅដាក់បានន័យថា យើងផ្អាកចំណុចផ្សេងៗទៀត និងការដោះមួយចំណុចៗត្រូវប្រើពេលរាប់ឆ្នាំ ដោយគ្រាន់តែប្រទេសម៉ាឡេស៊ី និងសិង្ហបុរី យកជម្លោះដែនទឹកដែលបានឯកភាពគ្នាទៅតុលាការ ទម្រាំតែចេញលទ្ធផលគឺមានរយៈពេល១៥ឆ្នាំ។ 

ក្នុងឱកាសនោះ សម្ដេចធិបតីនាយករដ្ឋមន្រ្ដីបានសង្កត់ធ្ងន់ថា៖ «ការងារដែលត្រូវធ្វើ គឺយន្ដការដោះស្រាយទ្វេភាគីនេះ គឺកន្លែងណាដែលយើងអាចដោះស្រាយទេ្វភាគីបានបន្ដធ្វើទៅដោយការទទួលខុសត្រូវរៀងៗខ្លួន យន្ដការដែលបានឯកភាពគ្នាហើយ JBC កន្លែងអត់មានវិវាទធ្វើទៀត ហើយសល់កន្លែងមិនឯកភាពគ្នាយើងខិតខំចរចា និងបើដោះមិនចេញយើងទៅប្ដឹងយន្ដការទី៣គឺតុលាការ»៕

ដោយ៖ រិទ្ធី