AKP ភ្នំពេញ ថ្ងៃទី១៧ ខែមិថុនា ឆ្នាំ២០២៥ -- សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា មានមនុស្សភាគច្រើនភ្ញាក់ផ្អើលនៅពេលកម្ពុជា មានលទ្ធភាពផ្គត់ផ្គង់អគ្គិសនី និងអ៊ិនធឺណេត ដោយកម្ពុជាមានភាពម្ចាស់ការខ្លួនឯង។

នៅថ្ងៃទី១២ ខែមិថុនា ឆ្នាំ២០២៥ ក្រុមហ៊ុនបណ្ដាញខ្សែកាបអុបទិក ឬប្រតិបត្តិករអ៊ីនធឺណេតទាំងអស់នៅកម្ពុជា បានបញ្ចប់ការទិញអ៊ីនធឺណេត (Internet Bandwidth) ពីប្រទេសថៃ ដោយសារកម្ពុជាមានលទ្ធភាពផ្គត់ផ្គង់សេវាអ៊ីនធឺណេតគ្រប់គ្រាន់ដោយខ្លួនឯង។

នាឱកាស អញ្ជើញជាអធិបតីបិទមហាសន្និបាតវិសាមញ្ញកាយរឹទ្ធិជាតិកម្ពុជា នារសៀលថ្ងៃទី១៧ ខែមិថុនា ឆ្នាំ២០២៥ សម្ដេចធិបតី ហ៊ុន ម៉ាណែត បានថ្លែងថា មានសាធារណជនទាំងក្នុង និងក្រៅប្រទេស មានការភ្ញាក់ផ្អើលជាខ្លាំងចំពោះសមត្ថភាពរបស់កម្ពុជា នៅក្នុងការធានាផ្គត់ផ្គង់អគ្គិសនី និងប្រព័ន្ធអ៊ីនធឺណេតដោយខ្លួនឯង។

សម្ដេចបវរធិបតី ហ៊ុន ម៉ាណែត មានប្រសាសន៍ថា «នាពេលថ្មីៗនេះ បងប្អូនជាច្រើនបានភ្ញាក់ មិនមែនអ្នកនៅក្រៅប្រទេសទេ អ្នកនៅក្នុងប្រទេសបានភ្ញាក់ នៅពេលកម្ពុជាសម្រេចម្ចាស់ការខ្លួនឯង ក្នុងការធានាផ្គត់ផ្គួង់អគ្គិសនី និងអ៊ីនធឺណេតខ្លួនឯង ដោយមិនចាំបាច់ទិញមកពីថៃ មនុស្សច្រើនភ្ញាក់»។
សម្ដេចធិបតី បន្ដថា ការសម្រេចចិត្តបញ្ហារឿងភ្លើងអគ្គិសនី និងអ៊ីនធឺណេត គឺជាការចាំបាច់ មិនមែនបានន័យថា «ផ្ដាច់ទំនាក់ទំនងរវាង កម្ពុជា-ថៃ នោះទេ»។ ទំនាក់ទំនងជាមួយប្រទេសជិតខាង គឺចាំបាច់ត្រូវធ្វើជាបន្ដបន្ទាប់ ប៉ុន្ដែការងារខ្លះ កម្ពុជាអាចម្ចាស់ការខ្លួនឯងបាន គឺដល់ពេលត្រូវធ្វើហើយ។

សម្ដេចធិបតីនាយករដ្ឋមន្ដ្រី បានរម្លឹកថា ក្រោយពេលទទួលព័ត៌មានថា មានក្រុមជ្រុលនិយមថៃមួយចំនួនតូចស្នើដល់រដ្ឋាភិបាលថៃ ឱ្យកាត់ផ្ដាច់ប្រព័ន្ធអគ្គិសនី និងអ៊ីនធឺណេត ឈប់ផ្គត់ផ្គង់ឱ្យកម្ពុជា សម្ដេចធិបតី បានបញ្ជាឱ្យកាត់ផ្ដាច់ប្រព័ន្ធអ៊ីនធឺណេត និងអគ្គិសនីដែលផ្គត់ផ្គង់ដោយថៃ ហើយដាក់ឱ្យដំណើរការប្រភពថាមពលអគ្គិសនី និងអ៊ីធឺណេតរបស់កម្ពុជាវិញ៕

ដោយ៖ គង់ សិរីរ័ត្ន, រូបថត៖ គល់ រ៉េននី