AKP ភ្នំពេញ ថ្ងៃទី១៧ ខែមិថុនា ឆ្នាំ២០២៥ -- ក្នុងឱកាសប្រកាសដាក់ឱ្យដំណើរការគម្រោង កិច្ចសហប្រតិបត្តិការមេគង្គ-ឡានឆាង ក្នុងសកម្មភាពមីន នាថ្ងៃទី១៧ ខែមិថុនា ឆ្នាំ២០២៥ នៅទីស្នាក់ការអាជ្ញាធរមីន ឯកឧត្តមទេសរដ្ឋមន្រ្តី លី ធុជ បានបញ្ជាក់ថា ភាពជាដៃគូ មិនមែនត្រឹមតែជាផ្តល់ការគាំទ្រ និងផ្តល់កិច្ចសហប្រតិបត្តិការប៉ុណ្ណោះទេ វាថែមទាំងជាការប្តេជ្ញាចិត្ត ក្នុងការសម្រេចឱ្យបាននូវជោគវាសនារួមគ្នា ការគាំទ្ររបស់ប្រទេសចិន គឺមិនត្រឹមតែវិសាលភាពនៃជំនួយទេ តែជាចក្ខុវិស័យ និងការប្តេជ្ញាចិត្តប្រកបដោយយុទ្ធសាស្ត្រ។ ទន្ទឹមនឹងនោះ កិច្ចសហប្រតិបត្តិការកម្ពុជា-ចិន ក្នុងសកម្មភាពមីន គឺមិនត្រឹមតែជាការបោសសម្អាតមីន និងគាំទ្រការងារមនុស្សធម៌ នោះទេ តែជាការត្រួសត្រាយផ្លូវសម្រាប់អនាគតនៃវិបុលភាពរួមគ្នា សន្តិភាព និងមិត្តភាពយូរអង្វែងរវាងកម្ពុជានិងចិន។

ឯកឧត្តមទេសរដ្ឋមន្រ្តី លី ធុជ  បានថ្លែងថា គម្រោង «កិច្ចសហប្រតិបត្តិការមេគង្គ-ឡានឆាងក្នុងសកម្មភាពមីន»  គឺជាដំណើរដ៏អស្ចារ្យក្រោមមិត្តភាពកម្ពុជា-ចិន ជាមិត្តភាពបានចូលរួមប្រែក្លាយកម្ពុជាចេញពីផេះនៃសង្គ្រាម ឆ្ពោះទៅរកពន្លឺនៃក្តីសង្ឃឹម និងវិបុលភាព ឈានដល់ការកសាងជោគវាសនារួមគ្នា។ គម្រោងនេះ នឹងត្រូវអនុវត្តក្នុងគោលបំណងសំខាន់ៗចំនួន២គឺ ប្រែក្លាយដីរងគ្រោះដោយសារយុទ្ធភណ្ឌគ្រឿងផ្ទុះ ទៅជាដីមានសុវត្ថិភាពដើម្បីចូលរួមចំណែកដល់ការអភិវឌ្ឍ និងផ្លាស់ប្តូរជំនាញ ចំណេះដឹង និងបច្ចេកទេស រវាងប្រទេសនានារងគ្រោះដោយសារយុទ្ធភណ្ឌគ្រឿងផ្ទុះ ជាពិសេសប្រទេសក្នុងតំបន់មេគង្គ-ឡានឆាង។

តំណាងឱ្យសម្តេចធិបតី ហ៊ុន ម៉ាណែត នាយករដ្ឋមន្ត្រី និងជាប្រធានអាជ្ញាធរមីន ឯកឧត្តមទេសរដ្ឋមន្ត្រី លី ធុជ បានអរគុណចំពោះសាធារណរដ្ឋប្រជាមានិតចិន ដែលបានគាំទ្រដល់ការអនុវត្តគម្រោង «កិច្ចសហប្រតិបត្តិការមេគង្គ-ឡានឆាង ក្នុងសកម្មភាពមីន» ដែលគម្រោងនេះនឹងចូលរួមចំណែកយ៉ាងសំខាន់ក្នុងបេសកកម្មរបស់កម្ពុជា ដើម្បីប្រែក្លាយដីរងគ្រោះដោយសារយុទ្ធភណ្ឌគ្រឿងផ្ទុះទៅជាដីមានសុវត្ថិភាព សម្រាប់ការអភិវឌ្ឍ និងបានជួយសង្គ្រោះដល់អាយុជិវិតប្រជាជនកម្ពុជា។ តាមរយៈគម្រោងនេះ នឹងផ្តល់អត្ថប្រយោជន៍ដល់គ្រួសារចំនួន ៧២៣ តាមរយៈរំដោះផ្ទៃដីមានយុទ្ធភណ្ឌគ្រឿងផ្ទុះ និងគ្រួសារចំនួន ៥៥ ១១១ នៅក្នុងស្រុកគោលដៅ តាមរយៈការផ្តល់សុវត្ថិភាព និងឱកាសអភិវឌ្ឍ ហើយនៅពីក្រោយតួរលេខនិងសមិទ្ធផលទាំងនេះ ប្រទេសចិន បានផ្តល់នូវអនាគតថ្មីដល់ប្រជាជនកម្ពុជា តាមរយៈការបោសសម្អាតនិងកម្ទេចគ្រាប់មីន និងសំណល់ជាតិផ្ទុះពីសង្រ្គាម។

ឯកឧត្តមបានបន្ដថា ក្រៅពីវិស័យមីន ការវិវត្ត និងរីកចម្រើននៅកម្ពុជា ប្រទេសចិនបានឈរនៅជាមួយកម្ពុជាគ្រប់កាលៈទេសៈ ទាំងពេលឆ្លងកាត់គ្រប់បញ្ហា ពេលទទួលបានជោគជ័យ និងគ្រប់ជំហាននៃដំណើរការអភិវឌ្ឍន៍ជាតិរបស់កម្ពុជា ដែលទាំងនេះ បានកំណត់និយមន័យថ្មីនៃភាពជាដៃគូ និងកិច្ចសហប្រតិបត្តិការ សម្រាប់ភាពជោគជ័យដែលផ្តល់ដោយមិត្តភាព ពោលគឺ «ភាពជាដៃគូ មិនមែនត្រឹមតែជាផ្តល់ការគាំទ្រ និងផ្តល់កិច្ចសហប្រតិបត្តិការ ប៉ុណ្ណោះទេ វាថែមទាំងជាការប្តេជ្ញាចិត្ត ក្នុងការសម្រេចឱ្យបាននូវជោគវាសនារួមគ្នា»។ ការគាំទ្ររបស់ប្រទេសចិន គឺមិនមែនត្រឹមតែវិសាលភាពនៃជំនួយទេ តែជាចក្ខុវិស័យ និងការប្តេជ្ញាចិត្តប្រកបដោយយុទ្ធសាស្ត្រ។

សូមបញ្ជាក់ថា គម្រោង «កិច្ចសហប្រតិបត្តិការមេគង្គ-ឡានឆាង ក្នុងសកម្មភាពមីន» ទទួលបានការគាំទ្រពីមូលនិធិពិសេស សម្រាប់កិច្ចសហប្រតិបត្តិការមេគង្គ-ឡានឆាងនៃសាធារណរដ្ឋប្រជាមានិតចិន និងក្រោមការសម្របសម្រួលដោយផ្ទាល់ពីក្រសួងការបរទេសនិងសហប្រតិបត្តិការអន្តរជាតិកម្ពុជា និងត្រូវបានប្រកាសក្រោមអធិបតីភាព ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន តំណាង សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន និងលោក ឈិន ឆុង អគ្គទីប្រឹក្សានៃស្ថានទូតចិន តំណាង ឯកឧត្តម Wang Wenbin ឯកអគ្គរដ្ឋទូតចិនប្រចាំកម្ពុជា។ ពិធីប្រកាសនេះក៏មានការចូលរួមផងដែរ ពីតំណាងក្រសួងការបរទេស និងសហប្រតិបត្តិការកម្ពុជា ទីស្តីការគណៈរដ្ឋមន្រ្តី តំណាងក្រសួងការបរទេសចិន និងថ្នាក់ដឹកនាំអាជ្ញាធរមីន៕

ដោយ សួស សំរិត