AKP តាកែវ ថ្ងៃទី១៧ ខែមិថុនា ឆ្នាំ២០២៥-- នៅវត្តជម្ព ហៅវត្តក្រាំងធំ ស្ថិតនៅភូមិក្រាំងធំ ឃុំធ្លក ស្រុកទ្រាំង ខេត្តតាកែវ បានរៀបចំពិធីសម្ពោធសមិទ្ធផលនានា ដូចជា ព្រះវិហារ កុដិ សាលាឆាន់ ក្លោងទ្វារ និងរបងវត្ត កាលពីព្រឹកថ្ងៃចន្ទ ទី១៦ ខែមិថុនា ឆ្នាំ២០២៥ ដោយមានការចូលរួមពីលោក ញ៉ែម ស្រស់ អភិបាលរងនៃគណៈអភិបាលខេត្តតាកែវ ប្រធានអនុប្រធានមន្ទីរអង្គភាពជុំវិញខេត្ត អភិបាលអភិបាលរងស្រុកទ្រាំង ព្រះសង្ឃ មន្ត្រីរាជការ កងកម្លាំងប្រដាប់អាវុធ តាជីយាយជី ពុទ្ធបរិស័ទ ប្រជាពលរដ្ឋ លោកគ្រូអ្នកគ្រូ សិស្សានុសិស្ស ចូលរួមយ៉ាងច្រើនកុះករ។

មានប្រសាសន៍សំណេះសំណាលក្នុងពិធីនោះ លោក ញ៉ែម ស្រស់ បានលើកឡើងពីតម្លៃសុខសន្ដិភាពដែលមិនអាចខ្វះបានក្រោមការលះបង់សាច់ស្រស់ឈាមស្រស់របស់សម្ដេចតេជោ ហ៊ុន សែន អតីតនាយករដ្ឋមន្រ្តីនៃព្រះរាជាណាចក្រកម្ពុជា ដែលបានធ្វើឱ្យវិស័យអាណាចក្រ និងវិស័យពុទ្ធចក្រ ដើរទន្ទឹមគ្នាមានការរីកចម្រើនឥតឈប់ឈរគួរជាទីមោទនៈ។ ដោយសារប្រទេសជាតិមានសុខសន្ដិភាពពេញលេញ មានការការអភិវឌ្ឍរីកចម្រើនលើគ្រប់វិស័យ ដែលនាំឱ្យបងប្អូនប្រជាពលរដ្ឋកាន់តែមានជីវភាពធូរធារ មន្រ្តីរាជការ កងកម្លាំងប្រដាប់អាវុធ កម្មករកម្មការិនី ត្រូវបានរាជរដ្ឋាភិបាលយកចិត្តទុកដាក់ តាមរយៈដំឡើងប្រាក់បៀវត្ស។ នៅពេលដែលវិស័យអាណាចក្រមានការរីកចម្រើន វិស័យពុទ្ធចក្រក៏មានការរីកចម្រើនទៅតាមហ្នឹងដែរ គឺតាមរយៈការចូលរួមធ្វើបុណ្យដាក់ទានរបស់បងប្អូនប្រជាពលរដ្ឋ។

លោកអភិបាលរងខេត្តបានមានប្រសាសន៍បន្ថែមថា បច្ចុប្បន្ននៅក្នុងប្រទេសរបស់យើងមានវត្តអារាមប្រមាណជាង៥ពាន់វត្ត ហើយនៅតាមបណ្ដាវត្តអារាមនានានៅទូទាំងប្រទេសកម្ពុជា យើងឃើញមានការសាងសង់សំណង់ជាព្រះវិហារ កុដិ សាលាឆាន់ព្រោងព្រាត សម្រាប់ទុកជាទីសក្ការៈបូជា និងសម្រាប់ព្រះសង្ឃគង់នៅ។ ប្រសិនបើប្រទេសជាតិមិនមានសុខសន្ដិភាព គ្មានការអភិវឌ្ឍរីកចម្រើន ប្រជាពលរដ្ឋមិនមានជីវភាពធូរធា ការកសាងនៅតាមវត្តអារ៉ាមក៏នឹងមិនមានការកើតឡើងនោះទេ ហើយពុទ្ធបរិស័ទក៏នឹងមិននាំគ្នាទៅចូលរួមពិធីបុណ្យទានផ្សេងៗនៅតាមវត្តអារាមនោះដែរ។

នាឱកាសនោះ លោក ញ៉ែម ស្រស់ ក៏បាននាំយកថវិការបស់រដ្ឋបាលខេត្តចំនួន២លានរៀល ប្រគេនដល់ព្រះចៅអធិការវត្តជម្ពហៅវត្តក្រាំងធំ និងបាននាំយកថវិកា និងសម្ភារ ចែកជូនដល់អាជ្ញាធរឃុំធ្លក គ្រូពេទ្យ គ្រូបង្រៀន សិស្សានុសិស្ស យុវជន តាជី យាយជី មួយចំនួនទៀតផងដែរ៕

ដោយ អ៊ុច សៀង