AKP សៀមរាប ថ្ងៃទី១៦ ខែមិថុនា ឆ្នាំ២០២៥--

ព្រឹត្តិការណ៍ទេសចរណ៍បរិស្ថានប្រចាំឆ្នាំ២០២៥ ដើម្បីអបអរបុណ្យសមុទ្រទឹកសាបកម្ពុជា ដឹងគុណទន្លេសាប បានប្រព្រឹត្តិទៅអស់រយៈពេល ២ ថ្ងៃ ២យប់ ចាប់ពីថ្ងៃទី ១៤ និង ១៥ ខែមិថុនា ឆ្នាំ ២០២៥ នៅសហគមន៍ទេសចរណ៍កំពង់ភ្លុក ក្រោមប្រធានបទ "ទស្សនារដូវកាលបៃតងនៅកម្ពុជា"។

ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍បានមានប្រសាសន៍ថា  ព្រឹត្តិការណ៍ដែលបានរៀបចំឡើងនេះ ដើម្បីរំលឹកដល់គុណនៃបឹងទន្លេសាប ដែលបានផ្តល់គុណប្រយោជន៍យ៉ាងច្រើនសម្បូរបែបមនុស្សសត្វនិងរុក្ខជាតិយ៉ាងច្រើនឥតគណនា។ មួយវិញទៀតដើម្បីលើកកម្ពស់វិស័យទេសចរណ៍នៅកម្ពុជា ជាពិសេសទេសចរណ៍នារដូវកាលបៃតង ដោយផ្តោតការផ្សារភ្ជាប់រវាងបរិស្ថាននិងទេសចរណ៍ ដូចពាក្យស្លោកថា«ទីក្រុងស្អាត រមណីយដ្ឋានស្អាត និងសេវាកម្មល្អ»។ 

ឯកឧត្តមបានបន្តថា បើយើងក្រឡេងមើលរដូវកាលបៃតង ដោយគិតចាប់ពីខែឧសភា រហូតដល់ខែតុលា មានទេសភាពបៃតងស្រស់ស្អាតគ្រប់ទីកន្លែង មានអំណោយផលល្អ មានភាពសុខដុមរមនា អាចទាក់ទាញទេសចរជាតិនិងអន្តរជាតិ ឱ្យចូលមកទស្សនាកម្សាន្តយ៉ាងសប្បាយរីករាយ ជាក់ស្តែងដូចនៅសហគមន៍ទេសចរណ៍កំពង់ភ្លុកជាដើម ខណៈកន្លងមកបានខិតខំប្រឹងប្រែងសម្អាតបរិស្ថាន ដើម្បីឱ្យទីនោះជាគោលដៅទេសចរណ៍ដ៏ទាក់ទាញ។ 

ឯកឧត្តមបានថ្លែងអំណរគុណ ចំពោះភាគីពាក់ព័ន្ធគ្រប់លំដាប់ថ្នាក់ រួមទាំងវិស័យឯកជនផង ដែលបានរួមគ្នាបង្កើតជាព្រឹត្តិការណ៍កម្សាន្តសប្បាយ រួមទាំងឈ្វេងងអំពីកិច្ចការបរិស្ថានផង ក្រោមម្លប់នៃសុខសន្តិភាព ដែលកម្ពុជាកំពុងទទួលបានដូចសព្វថ្ងៃនេះ។

លោក ឌី រ៉ាដូ អភិបាលរងខេត្តសៀមរាប បានថ្លែងថា ព្រឹត្តិការណ៍ទេសចរណ៍បរិស្ថានឆ្នាំ២០២៥បង្កើតឡើងស្របគ្នានិងយុទ្ធនាការសម្អាតបរិស្ថាន និងប្រមូលប្លាស្ទិកក្នុងរដូវទឹកឡើង ដើម្បីអបអរសាទរទិវាបរិស្ថានជាតិ និងបរិស្ថានពិភពលោក។ បន្ថែមពីនេះ ពិធីបុណ្យសមុទ្រទឹកសាបកម្ពុជា ដឹងគុណបឹងទន្លេសាប គឺជាពិធីបុណ្យមួយដែលបងប្អូនប្រជាពលរដ្ឋរស់នៅក្នុងសហគមន៍នេះ តែងរួមគ្នាប្រារព្ធធ្វើជាបន្តបន្ទាប់ ដើម្បីរំលឹកគុណបឹងទន្លេសាប ដែលបានផ្តល់នូវផលប្រយោជន៍ជាច្រើនសម្រាប់ពួគគាត់ពឹងអាស្រ័យ។

សូមជម្រាបថា នេះជាឆ្នាំទី៣ហើយ ដែលរដ្ឋបាលស្រុកប្រាសាទបាគង រដ្ឋបាលកំពង់ភ្លុក សហការជាមួយអង្គរការមូលនិធិទំពាំងស្នងឬស្សី (NGO2) ដោយមានការគាំទ្រពីសមាគមទេសចរណ៍កម្ពុជា (CATA) រដ្ឋបាលខេត្តសៀមរាប ក្រសួងទេសចរណ៍ ក្រសួងបរិស្ថាន ដើម្បីផ្សព្វផ្សាយដល់ប្រជាពលរដ្ឋ បានយល់ដឹងពីផលប៉ះពាល់បរិស្ថាន និងចេះទុកដាក់សំរាម ញែកសំរាមសំដៅធ្វើយ៉ាងណាឱ្យឃុំមានបរិស្ថានស្អាតល្អ មានភាពបៃតងស្អាត ដើម្បីទាក់ទាញភ្ញៀវទេសចរមកកម្សាន្តឱ្យបានច្រើន៕
ដោយ៖ ឃុត សៅ