AKP ខេត្តព្រះសីហនុខែមិថុនា ឆ្នាំ២០២៥--

ឯកឧត្តម ម៉ាង ស៊ីណេត  អញ្ជើញចុះសួរសុខទុក្ខ និងប្រគល់អំណោយជូនមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀនដោយស្ម័គ្រ្មចិត្ត និងផ្អែកលើ សហគមន៍ នៅភូមិឬទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ នារសៀលថ្ងៃអាទិត្យទី១៥ ខែមិថុនា ឆ្នាំ២០២៥ ។

លោក កែវ វាសនា ប្រធានមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍ បានជម្រាបជូនរបាយការណ៍ ស្តីពីវឌ្ឍនភាពការងាររបស់មជ្ឈមណ្ឌលមានផ្ទៃដីចំនួន ២០ហិចតា មានអគារចំនួន២៣ មានបន្ទប់ស្នាក់នៅជនរងគ្រោះសរុប ៧៧បន្ទប់។ ឆ្នាំ២០២៥ មជ្ឈមណ្ឌលទទួលជនរងគ្រោះសរុបចំនួន ១ ១៧៨នាក់ ស្រី ៧០នាក់ បានធ្វើសមាហរណកម្មទៅគ្រួសារ និងសហគមន៍វិញមានចំនួន ១ ១៣៩នាក់ ស្រី៣១នាក់ ។ បច្ចុប្បន្ន មជ្ឈមណ្ឌលមានជនរងគ្រោះកំពុងស្នាក់នៅទទួលសេវាចំនួន ១,៧០២នាក់ ស្រី ១០៣នាក់ ។

លោក ប្រធានបានឪ្យដឹងបន្តថា មជ្ឈមណ្ឌលបានធ្វើការបណ្តុះបណ្តាលជំនាញមានដូចជា ១.ផ្នែកតបណ្តាញអគ្គីសនី ១៨០នាក់ ២.ផ្នែកជួសជុលបរិក្ខារត្រជាក់ ១២០នាក់ ៣.ផ្នែកជាងកាត់សក់ ៣០នាក់ ៤.ផ្នែកផ្សាអគ្គីសនី ៩០នាក់  ៥.ផ្នែកជាងជួសជុលម៉ូតូ ៦០នាក់ ៦.ផ្នែកជាងកំបោរ១២០នាក់  ៧.ផ្នែកសម្អាងកាយ ៣០នាក់ ៨.ផ្នែកកាត់ដេរ ៣៥នាក់ សរុបរួម ៦៦៥នាក់ ។ លោកបានថ្លែងអំណរគុណ ឯកឧត្តម អភិបាលខេត្តព្រះសីហនុ និងគណៈប្រតិភូដែលបានអញ្ជើញចុះសួរសុខទុក្ខ និងប្រគល់អំណោយសប្បុរសធម៌ជាគ្រឿងឧបភោគ បរិភោគ និងថវិកាជូនមជ្ឈមណ្ឌល ដើម្បីផ្គត់ផ្គង់របប ហូបចុករបស់ជនរងគ្រោះដោយសារការប្រើប្រាស់គ្រឿងញៀនដែលកំពុងទទួលសេវាព្យាបាល ស្តារនីតិសម្បទា និងស្នាក់នៅក្នុងមជ្ឈមណ្ឌលជាលើកទី៦ ។

ឯកឧត្តម ម៉ាង ស៊ីណេត អភិបាលខេត្តព្រះសីហនុ បានធ្វើការសំណេះសំណាលជាមួយក្មួយៗកំពុងស្នាក់នៅស្តារនីតិសប្បទាអ្នកញៀនគ្រឿងញៀនដោយស្ម័គ្រចិត្តផ្អែក លើសហគមន៍ នៅឃុំកែវផុសដោយគូសបញ្ជាក់ថា រាជរដ្ឋាភិបាលមានចក្ខុវិស័យវែងឆ្ងាយ និងដាក់ចេញនូវយុទ្ធសាស្ត្រដោយផ្តោតលើ មនុស្ស ផ្លូវ ទឹក ភ្លើង និងបច្ចេកវិទ្យា ដូច្នេះយុវជនយើងត្រូវមានចំណេះដឹង ចំណេះធ្វើ ជំនាញ និងបំណិនជីវិតប្រកបដោយគុណធម៌ ចរិយាធម៌ ទន្ទឹមនោះរាជរដ្ឋាភិបាលបានបង្កើតសាលារៀននៅតាមភូមិ ឃុំ សង្កាត់ ដើម្បីរុញសាលារៀនឪ្យនៅជិតនឹងកូនចៅរបស់ប្រជាពលរដ្ឋ ទន្ទឹមនឹងមានសាលារៀន រាជរដ្ឋាភិបាលក៏បានគិតគូរអំពីជីវភាពរស់នៅរបស់ប្រជាពលរដ្ឋ ជាពិសេសយុវជនរបស់យើងដែលជាទំពាំងស្នងឬស្សី ក្នុងការចូលរួមចំណែកកសាង និងអភិវឌ្ឍប្រទេសជាតិឪ្យមានការអភិវឌ្ឍរីកចម្រើន ទន្ទឹមនឹងបង្កើតការងារជូនប្រជាពលរដ្ឋ រដ្ឋាភិបាលក៏បានគិតគូរអំពីសុខមាលភាពរបស់ប្រជាពលរដ្ឋដោយបង្កើតឪ្យមានបណ្ណ ប.ស.ស បណ្ណសមធម៌ សម្រាប់មន្ត្រីរាជការ កម្មករ និយោជិតដែលបំរើការងារនៅតាមរោងចក្រ សហគ្រាស ហើយអ្វីទាំងអស់នេះ គឺបានមកពីកត្តាសុខសន្តិភាព និងស្ថេរភាពនយោបាយ ម្យ៉ាងទៀតការសាងសង់ហេដ្ឋារចនាសម្ព័ន្ធដែលជាសសៃឈាមក្នុងការដឹកជញ្ជូនឆ្លងកាត់នៅទូទាំងប្រទេស ព្រោះបើយើងមានផ្លូវ គឺយើងមានសង្ឃឹម ក្នុងការដឹកជញ្ជូនផលិតផលរបស់យើងទៅកាន់ទីផ្សារបានទាន់ពេលវេលា ។

ក្នុងឪកាសនោះ ឯកឧត្តម អភិបាលខេត្តព្រះសីហនុ ក៏បានធ្វើការណែនាំដល់ក្មួយដែលបានចូលមកក្នុងមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍នាពេលនេះ ត្រូវតែបេជ្ញាផ្តាច់គ្រឿងញៀនឪ្យបានទាំងអស់គ្នា ហើយសង្ឃឹមថា ក្មួយនឹងខិតខំកែប្រែខ្លួនជាកូនល្អ ពលរដ្ឋល្អក្នុងការចូលរួមលើក កម្ពស់សង្គមជាតិ និងខិតខំបណ្តុះបណ្តាលនូវជំនាញបច្ចេកទេសមួយ ដើម្បីចិញ្ចឹមជីវិតបង្កើនសេដ្ឋកិច្ចគ្រួសារ ។

ក្នុងឪកាសនោះ ឯកឧត្តម ម៉ាង ស៊ីណេត ក៏បាននាំយកអំណោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ឧបត្ថម្ភជូនមជ្ឈមណ្ឌលជាតិព្យាបាល មានដូចជា អង្ករ ២៩តោន ទឹកត្រី ១៩០យួរ ទឹកស៊ីអ៊ីវ ១៩០យួរ មី ១៩០កេស ត្រសក់ចាវ ១០០ គីឡូក្រាម ឆៃប៉ូវ ១០០គីឡូក្រាម សាច់ជ្រូក ២៥០គីឡូ និងថវិកា ១០លានរៀល ។ដោយ ឡែកមណ្ឌលសំចតបណ្តោះអាសន្ន អង្ករ ១តោន ទឹកស៊ីអ៊ីវ ១០យួរ ទឹកត្រី ១០យួរ មី ១០កេសតូច ៕

ដោយ៖ងូ សុមុនី