AKP សៀមរាប ថ្ងៃទី១៥ ខែមិថុនា ឆ្នាំ២០២៥--

តាមរយៈកិច្ចសហការរវាងអង្គការសម្ព័ន្ធសត្វព្រៃ ជាមួយអ្នកជំនាញបសុពេទ្យអន្តរជាតិ ដេអេលេហ្វង់អង្គរខេត្តសៀមរាប (KROM DES ÉLEPHANTS D’ANGKOR) បានជួយសង្គ្រោះជីវិត “ជីក្លប់” ដែលជាដំរីស្រុកញីចូលនិវត្តន៍មួយក្បាល កំពុងរស់នៅជំរំដំរីព្រៃគូលែន ស្ថិតក្នុងឃុំខ្នារពោធិ៍ ស្រុកសូទ្រនិគម ខេត្តសៀមរាប ដោយធ្វើការវះកាត់យកកម្ទេចចែ ដែលជាប់នឹងសាច់ដ៏កម្រមួយ និងជោគជ័យ នៅថ្ងៃទី១៥ ខែមិថុនា ឆ្នាំ២០២៥នេះ។

តាមការលើកឡើងរបស់ លោកវេជ្ជបណ្ឌិត ណាវ៉ាន នីថា រូប៉ាង (Navaneetha Roopan) ប្រធានក្រុមផែនការ និងវះកាត់ ការវះកាត់នេះពិតជាប្រថុយណាស់ នៅក្នុងតំបន់ព្រៃដាច់ស្រយាលដែលជាបញ្ហាប្រឈមផ្នែកបច្ចេកទេស និងដឹកជញ្ជូន ប៉ុន្តែក្រុមការងារសម្ព័ន្ធសត្វព្រៃ និងក្រុមការងារជំរំដំរីព្រៃគូលែន សហការគ្នាជាមួយក្រុមបសុពេទ្យអន្តរជាតិ បានវះយកបំណែកចែ ដែលបាក់ជាប់ក្នុងសាច់ដំរីចេញ ដោយជោគជ័យ។

ក្នុងនាមស្ថាបនិក នៃជំរំដំរីព្រៃគូលែន លោក ពីយ៉ូត ដាវីដហ្សាយ៉ា បង្ហាញថា នេះជាប្រវត្តិសាស្ត្រមួយ នៃការថែទាំសត្វដំរីនៅក្នុងប្រទេសកម្ពុជា។ រូបលោក មានមោទនភាពខ្លាំងបំផុត ដែលបានធ្វើការជាមួយ ក្រុមសម្ព័ន្ធសត្វព្រៃ និងអ្នកឯកទេសបសុពេទ្យអន្តរជាតិ ដើម្បីជួយសង្គ្រោះសត្វដំរីញីមួយក្បាលនេះ។ លោក សូមថ្លែងអំណរអរគុណដល់ក្រុមការងារ និងស្ថាប័នពាក់ព័ន្ធទាំងអស់ដែលបានចូលរួមគាំទ្រ ដល់ជំរំដំរីព្រៃគូលែន ដែលជាជម្រកធម្មជាតិ មានសុវត្ថិភាព និងជាកន្លែងផ្ដល់បទពិសោធន៍ និងការអប់រំអំពីសត្វដំរីនៅកម្ពុជា។

គួរជម្រាបថា ការវះកាត់ និងព្យាបាលដល់ដំរីញី ឈ្មោះ “ជីក្លប់” គឺជាការវះកាត់លើដំបូង ដែលមានការចូលរួមពីក្រុមគ្រូពេទ្យអន្តរជាតិ មានឯកទេសបសុពេទ្យ មកពីប្រទេសអាហ្វ្រិកខាងត្បូង ឥណ្ឌា សិង្ហបុរី និងប្រទេសថៃ៕
ដោយ៖ឃុត សៅ