AKP បន្ទាយមានជ័យ ទី១៥ ខែមិថុនា ឆ្នាំ២០២៥--

រដ្ឋបាលខេត្តបន្ទាយមានជ័យបានប្រារព្ធទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) លើកទី៨ ឆ្នាំ២០២៥ យ៉ាងអធិកអធម ក្រោមប្រធានបទដ៏មានអត្ថន័យថា "TVET បង្កើតឱកាសការងារ សាងក្តីសង្ឃឹមដល់យុវជន” និងពាក្យស្លោកថា “រៀនឱ្យចប់ ឱ្យចេះ ឱ្យមានការងារ” នៅបរិវេណវិទ្យាស្ថានពហុបច្ចេកទេសខេត្តបន្ទាយមានជ័យ នាព្រឹកថ្ងៃអាទិត្យ ទី១៥ ខែមិថុនា ឆ្នាំ២០២៥ ដោយមានការនិមន្ត និងអញ្ជើញចូលរួមពីមន្ត្រីរាជការតាមមន្ទីរអង្គភាពពាក់ព័ន្ធជុំវិញខេត្ត អាជ្ញាធរមូលដ្ឋាន ព្រះសង្ឃ ប្រជាពលរដ្ឋ និងសិស្សានុសិស្សសរុបប្រមាណជាង ១០០០ អង្គ/នាក់។

ក្នុងឱកាសដ៏សំខាន់នេះ លោក លី សុវណ្ណារិទ្ធ អភិបាលរងខេត្ត តំណាងឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញជាអធិបតី និងបានគូសបញ្ជាក់ពីសារៈសំខាន់នៃការអប់រំបណ្ដុះបណ្ដាលបច្ចេកទេស និងវិជ្ជាជីវៈ នាពេលបច្ចុប្បន្ន ដោយបានគូសបញ្ជាក់ថា «ការអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) គឺជាគន្លឹះដ៏សំខាន់ក្នុងការកសាងធនធានមនុស្សដែលមានជំនាញច្បាស់លាស់ ដើម្បីឆ្លើយតបទៅនឹងតម្រូវការទីផ្សារការងារដែលកំពុងរីកចម្រើនយ៉ាងឆាប់រហ័ស។ រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងយកចិត្តទុកដាក់ខ្ពស់ចំពោះការអភិវឌ្ឍវិស័យ TVET នេះ ដើម្បីធានាថាយុវជនរបស់យើងមានចំណេះដឹង និងជំនាញគ្រប់គ្រាន់ ក្នុងការរួមចំណែកអភិវឌ្ឍសេដ្ឋកិច្ចជាតិ និងលើកកម្ពស់ជីវភាពរស់នៅរបស់ពួកគាត់ឱ្យកាន់តែប្រសើរឡើង»។

លោកអភិបាលរងខេត្តក៏បានលើកទឹកចិត្តដល់យុវជន សិស្សានុសិស្ស ឱ្យងាកមកចាប់យកការសិក្សាជំនាញបច្ចេកទេស និងវិជ្ជាជីវៈ ដោយបានសង្កត់ធ្ងន់ថា «ការរៀនជំនាញបច្ចេកទេសមិនត្រឹមតែផ្ដល់ឱកាសការងារច្រើនប៉ុណ្ណោះទេ ថែមទាំងអាចឱ្យប្អូនៗក្លាយជាសហគ្រិន រួមចំណែកបង្កើតការងារសម្រាប់ខ្លួនឯង និងអ្នកដទៃទៀតផង»។ លោកក៏បានបន្ថែមថា «យើងទាំងអស់គ្នាត្រូវរួមគ្នាជំរុញ និងផ្សព្វផ្សាយឱ្យកាន់តែទូលំទូលាយអំពីអត្ថប្រយោជន៍នៃ TVET ដើម្បីឱ្យយុវជនគ្រប់រូបយល់ច្បាស់ពីផ្លូវទៅកាន់ភាពជោគជ័យ តាមរយៈជំនាញវិជ្ជាជីវៈជាក់លាក់»។

ប្រធានបទ "TVET បង្កើតឱកាសការងារសាងក្តីសង្ឃឹមដល់យុវជន” គឺពិតជាឆ្លុះបញ្ចាំងពីទិសដៅច្បាស់លាស់នៃការអប់រំវិជ្ជាជីវៈនៅកម្ពុជា។ តាមរយៈការផ្ដល់ជំនាញដែលទីផ្សារត្រូវការ ការអប់រំ TVET កំពុងរួមចំណែកយ៉ាងសកម្មក្នុងការកាត់បន្ថយភាពអត់ការងារធ្វើក្នុងចំណោមយុវជន និងបង្កើនលទ្ធភាពក្នុងការស្វែងរកការងារសមរម្យ។ ជាមួយគ្នានេះ ពាក្យស្លោក “រៀនឱ្យចប់ ឱ្យចេះ ឱ្យមានការងារ” ក៏បានជំរុញទឹកចិត្តដល់សិស្សានុសិស្សឱ្យមានការតាំងចិត្តខ្ពស់ក្នុងការសិក្សា និងខិតខំរៀនសូត្រឱ្យទទួលបានចំណេះដឹង និងជំនាញពិតប្រាកដ ដើម្បីធានាបាននូវការងារនាពេលអនាគត។

លោកអភិបាលរងខេត្តបានបញ្ជាក់ថា អាជ្ញាធរខេត្តបន្ទាយមានជ័យបានប្តេជ្ញាចិត្តបន្តសហការជាមួយក្រសួងស្ថាប័នពាក់ព័ន្ធ និងដៃគូអភិវឌ្ឍន៍នានា ដើម្បីពង្រឹងគុណភាពអប់រំ TVET ឱ្យកាន់តែប្រសើរឡើង ទាំងផ្នែកសម្ភារ បរិក្ខារ បរិស្ថានសិក្សា និងសមត្ថភាពរបស់គ្រូបង្រៀន។ គោលដៅសំខាន់គឺធ្វើយ៉ាងណាឱ្យវិទ្យាស្ថានបណ្តុះបណ្តាលបច្ចេកទេសក្នុងខេត្ត មានសមត្ថភាពគ្រប់គ្រាន់ក្នុងការផលិតធនធានមនុស្សដែលមានគុណភាពខ្ពស់ ស្របតាមស្តង់ដារតំបន់ និងអន្តរជាតិ។

សូមជម្រាបថា ទិវាជាតិ TVET លើកទី៨ នៅខេត្តបន្ទាយមានជ័យ បានបញ្ចប់ដោយជោគជ័យ និងបានបន្សល់ទុកនូវសារដ៏មានតម្លៃមួយថា ការវិនិយោគលើការអប់រំបណ្ដុះបណ្ដាលបច្ចេកទេស និងវិជ្ជាជីវៈ គឺជាការវិនិយោគដ៏ឈ្លាសវៃសម្រាប់អនាគតយុវជន និងការអភិវឌ្ឍប្រទេសជាតិទាំងមូល៕

ដោយ ឈុន សារ៉ាត