AKP កំពង់ធំ ថ្ងៃទី១៣ ខែមិថុនា ឆ្នាំ២០២៥-- លោក អ៊ុន បុត្ត អភិបាលរងខេត្តកំពង់ធំ បានជំរុញឱ្យអាជ្ញាធរ យុវជន និងភាគីពាក់ព័ន្ធ ចូលរួមផ្សព្វផ្សាយដល់ប្រជាពលរដ្ឋពីសារៈសំខាន់នៃការបោះឆ្នោត និងការចុះឈ្មោះបោះឆ្នោត ក្នុងកម្មវិធីបើកវគ្គអប់រំផ្សព្វផ្សាយ និងបញ្រ្ជាបការយល់ដឹងស្ដីពី “សារៈសំខាន់នៃការបោះឆ្នោតនៅកម្ពុជា” ជូនដល់តំណាងគណបក្សនយោបាយ សមាគម អង្គការមិនមែនរដ្ឋាភិបាល និងភាគីពាក់ព័ន្ធតាមក្រុង ស្រុកក្នុងខេត្តកំពង់ធំ នៅសាលប្រជុំសាលាខេត្តកំពង់ធំ កាលពីថ្ងៃទី១២ ខែមិថុនា ឆ្នាំ២០២៥ ដោយមានការចូលរួមពីលោក ឌី ភីរុណ ជំនួយការ គ.ជ.ប និងជាប្រធាននាយកដ្ឋានប្រតិបត្តិការ លោក ជា ពុំ ប្រធានលេខាធិការដ្ឋានរៀបចំការបោះឆ្នោតខេត្តកំពង់ធំ តំណាងកងកម្លាំងទាំង៣ មន្ទីរព័ត៌មាន មន្ទីរអប់រំ យុវជន និងកីឡា ប្រធានក្រុមប្រឹក្សាក្រុង-ស្រុក អភិបាលរងក្រុង-ស្រុក ប្រធានក្រុមប្រឹក្សាសង្កាត់ និងមេភូមិទូទាំង៨សង្កាត់នៃក្រុងស្ទឹងសែន តំណាងគណបក្សនយោបាយ សមាគម អង្គការមិនមែនរដ្ឋាភិបាល និងគរុសិស្សសរុបប្រមាណជាង១៣០នាក់។

ក្នុងឱកាសនោះ លោក អ៊ុន បុត្ត បានកោតសរសើរ និងវាយតម្លៃខ្ពស់ចំពោះលេខាធិការដ្ឋានរៀបចំការបោះឆ្នោតខេត្តកំពង់ធំ ដែលតែងតែយកចិត្តទុកដាក់លើការងារចុះអប់រំ ផ្សព្វផ្សាយដល់សាធារណៈជន ជាពិសេសសិស្សានុសិស្សអំពីសារៈសំខាន់នៃការបោះឆ្នោត។ លេខាធិការដ្ឋានខេត្តរៀបចំការបោះឆ្នោតក៏មានមជ្ឈមណ្ឌលអប់រំ និងព័ត៌មានអ្នកបោះឆ្នោត សម្រាប់ផ្សព្វផ្សាយនូវចំណេះដឹងអំពីការងារបោះឆ្នោត ជូនដល់អ្នកសិក្សាស្រាវជ្រាវ មហាជនទូទៅ ដែលជាភាគីពាក់ព័ន្ធ ព្រមទាំងផ្តល់ជូនប្រជាពលរដ្ឋនូវព័ត៌មានពិតត្រឹមត្រូវ កាត់បន្ថយកំហុសឆ្គង និងការយល់ច្រឡំ ដែលនាំឱ្យមានជម្លោះ ឬការសង្ស័យនានាទៅលើការអនុវត្តច្បាប់បោះឆ្នោត និងបទបញ្ជា នីតិវិធិនៃការបោះឆ្នោត។

វគ្គអប់រំផ្សព្វផ្សាយ និងបញ្រ្ជាបការយល់ដឹងស្ដីពី “សារៈសំខាន់នៃការបោះឆ្នោតនៅកម្ពុជា” ជូនដល់តំណាងគណបក្សនយោបាយ សមាគម អង្គការមិនមែនរដ្ឋាភិបាល និងភាគីពាក់ព័ន្ធ ជាពិសេសក្មួយៗ គរុសិស្ស ដែលជាទំពាំងស្នងឫស្សី និងជាកម្លាំងចលករដ៏សំខាន់ក្នុងការអភិវឌ្ឍប្រទេសនិងការជំរុញលទ្ធិប្រជាធិបតេយ្យនៅកម្ពុជាឱ្យមានភាពរឹងមាំ។ ប្រទេសមួយអាចរីកចម្រើនបាន និងអាចរក្សានូវនិរន្តរភាពនៃការរីកចម្រើនបានគឺពិតជាមិនអាចខ្វះបាននូវការចូលរួមពីយុវជន ដែលជាអ្នកបន្តវេន ដើម្បីចូលរួមអភិវឌ្ឍប្រទេសជាតិ។

លោក អ៊ុន បុត្ត បានសំណូមពរដល់តំណាងគណបក្សនយោបាយ សមាគម អង្គការមិនមែនរដ្ឋាភិបាល និងភាគីពាក់ព័ន្ធតាមក្រុង-ស្រុកទាំងអស់ ជាពិសេសក្មួយៗគរុសិស្ស ត្រូវចូលរួមឱ្យបានសកម្ម និងផ្សព្វផ្សាយបន្តពីសកម្មភាពនៃដំណើរការបោះឆ្នោតឱ្យបានទូលំទូលាយបន្ថែមទៀត៕

ដោយ ស៊ុម វណ្ណា