AKP សៀមរាប ថ្ងៃទី១៣ ខែមិថុនា ឆ្នាំ២០២៥-- ក្រុមអ្នកជំនាញការអាដហុកនៃគណៈកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ និងសំបូរព្រៃគុក ដែលហៅកាត់ថាអាយស៊ីស៊ី-អង្គរ/សំបូរព្រៃគុក បានចុះត្រួតពិនិត្យតាមការដ្ឋានជួសជុលប្រាសាទក្នុងតំបន់ រមណីយដ្ឋានអង្គរ ក្នុងគោលបំណងសិក្សានិងពិនិត្យការងារ ដែលអនុលោមតាមអនុសាសន៍ដែលអ្នកជំនាញការបានផ្តល់អនុសាសន៍នាពេលកន្លងមក។

លោក ឡុង កុសល អគ្គនាយករងអាជ្ញាធរជាតិអប្សរា បានឱ្យដឹងថា ការងារចុះតាមការដ្ឋានជួសជុលប្រាសាទនៅពេលនេះ មានរយៈពេលប្រមាណមួយសប្ដាហ៍ ពោលគឺបានចាប់ផ្តើមតាំងពីថ្ងៃទី០៩ រហូតដល់ថ្ងៃទី១៧ ខែមិថុនាឆ្នាំ២០២៥នេះ។ ហើយក្រុមអ្នកជំនាញការអន្ដរជាតិដែលចុះត្រួតពិនិត្យនោះ មានគ្នាសរុប៦រូប ដែលអមដំណើរដោយ ឯកឧត្តមបណ្ឌិត ហង់ ពៅ អគ្គនាយកអាជ្ញាធរជាតិអប្សរា ព្រមទាំងសហការីដែលជាអ្នកជំនាញដើម្បីធ្វើការពន្យល់ដល់ក្រុមចុះត្រួតពិនិត្យទាំងអស់នោះ។

លោកអគ្គនាយករងបានឱ្យដឹងទៀតថា ការដ្ឋានជួសជុលដែលគេនឹងត្រូវចុះត្រួតពិនិត្យនោះរួមមាន គម្រោងជួសជុលប្រាសាទអង្គរវត្ត ប្រាសាទតាព្រហ្ម ប្រាសាទភិមានអាកាស ប្រាសាទតាសោម ប្រាសាទតានៃ និងប្រាសាទបន្ទាយសំរ៉ែជាដើម ដែលនៅទីនោះអ្នកជំនាញការបានស្ដាប់ការធ្វើបទបង្ហាញពីក្រុមការងារជួសជុល ក៏ដូចជាការផ្តល់អនុសាសន៍បន្ថែមដល់ការងារទាំងនោះឱ្យកាន់តែល្អប្រសើរ។ល។

គួរបញ្ជាក់ថា ការងារចុះតាមការដ្ឋានជួសជុលប្រាសាទនៅពេលនេះ ជាការងារដែលក្រុមអ្នកជំនាញការអាដហុក តែងធ្វើមុននឹងមានកិច្ចប្រជុំធំរបស់គណៈកម្មាធិការអន្ដរជាតិអាយស៊ីស៊ី-អង្គរ/សំបូរព្រៃគុក ដែលធ្វើឡើងរយៈពេលពីរដងក្នុងមួយឆ្នាំ។ ហើយកិច្ចប្រជុំបច្ចេកទេសលើកទី៤០ របស់គណៈកម្មាធិការនេះ គ្រោងនឹងធ្វើនៅថ្ងៃទី១៩និងទី២០ ខែមិថុនា ខាងមុខឆាប់ៗនេះ នៅក្នុងសណ្ឋាគារសូហ្វីតែលអង្គរ ភូគីត្រា៕

ដោយ ហង្ស សៀក