AKP ភ្នំពេញ ថ្ងៃទី១២ ខែមិថុនា ឆ្នាំ២០២៥ -- សម័យកាលបច្ចេកវិទ្យាកាន់តែទំនើប ការចែកចាយព័ត៌មានក្លែងក្លាយ កាន់តែមានសន្ទុះលឿន តាមរយៈបណ្ដាញទំនាក់ទំនងសង្គមគ្រប់ប្រភេទ។ ព័ត៌មានក្លែងក្លាយមានឥទ្ធិពលប៉ះពាល់ដល់សង្គមខ្លាំងណាស់ បើមិនមានការទប់ស្កាត់ឱ្យបានទាន់ពេលវេលា និងអ្នកប្រើប្រាស់បណ្ដាញទំនាក់ទំនងសង្គមចេះតែចែ​ក​រំលែកដោយមិនបានផ្ទៀងផ្ទាត់ឱ្យបានត្រឹមត្រូវទេនោះ។

ដោយមើលឃើញពីផលអវិជ្ជមាននៃព័ត៌មានក្លែងក្លាយ ឆ្នាំ២០២៥នេះ ក្រសួងព័ត៌មាន បានរៀបចំយុទ្ធនាការ «និយាយថាទេចំពោះព័ត៌មានក្លែងក្លាយ- Say No to Fake News» សំដៅធានាឱ្យបាននូវសុវត្ថិភាពព័ត៌មានសម្រាប់អ្នកប្រើប្រាស់ និងធានាសន្តិសុខព័ត៌មាន។

សង្គមជាតិរឹងមាំត្រូវការការផ្ដល់ព័ត៌មានពិត ផ្ដល់សេចក្ដីទុកចិត្តរឹតតែខ្លាំងដើម្បីរឹតចំណងសាមគ្គីជាតិជាធ្លុងមួយឆ្ពោះទៅរកវឌ្ឍនភាពជឿនលឿន ជៀសវាងការបែកបាក់ដោយការញុះញង់ភូតភរកុហកបោកប្រាស់ដោយមធ្យោបាយទុច្ចរិត អុចអាលបញ្ឆេះកំហឹងពីក្រុមមួយទៅក្រុមមួយឱ្យឈ្លោះគ្នាជាហេតុនាំឱ្យវិនាសអន្តរាយ។ ព័ត៌មានក្លែងក្លាយ ក៏ផ្ដល់ភាពមន្ទិលសង្ស័យគ្នាជាដើមចមឈានដល់ការបែកបាក់គ្នាក្នុងគ្រួសារ សហគមន៍ ប្រទេសជាតិ រហូតដល់ប្រទេសនិងប្រទេសក៏មាន។

សម្រាប់ចំណាត់ការរបស់ជាតិ ដើម្បីប្រយុទ្ធប្រឆាំងព័ត៌មានក្លែងក្លាយ រាជរដ្ឋាភិបាលដែលមានក្រសួងព័ត៌មានជាសេនាធិការ បានជំរុញយុទ្ធនាការនិយាយថាទេចំពោះព័ត៌មានក្លែងក្លាយ ធ្វើដំណើរទៅកាន់គ្រប់ទិសទី ដើម្បីជួយការពារប្រជាពលរដ្ឋពីគ្រោះថ្នាក់ និងហានិភ័យនានាដែលអាចបង្កឡើងដោយការបង្កើត ឬចែកចាយព័ត៌​មា​ន​​ក្លែងក្លាយ ហើយផ្តល់ជូនពលរដ្ឋវិញនូវសុវត្ថិភាពក្នុងការទទួលព័ត៌មានពិត មានគុណភាពសម្រាប់ការសម្រេ​ចចិត្ត និងការរស់នៅប្រចាំថ្ងៃ។

ឯកឧត្ដម នេត្រ ភក្រ្ដា រដ្ឋមន្រ្ដីក្រសួងព័ត៌បានឱ្យដឹងថា សារនៃយុទ្ធនាការ«និយាយថាទេចំពោះព័ត៌មានក្លែងក្លា​យ​» កំពុងត្រូវបានដាក់បង្ហាញ ផ្សព្វផ្សាយតាមផ្ទាំងប៉ាណូធំៗ ក្នុងរាជធានីភ្នំពេញ ទីតាំងនានាក្នុងទីរួមខេត្តសៀ​ម​រាប នៅរង្វង់មូលគ្រួសារដំរី រមណីយដ្ឋានបឹងកន្សែង ក្រុងបានលុង ខេត្តរតនគិរី និងនៅតាមទីសាធារណផ្សេង​ៗទៀតតាមបណ្តាខេត្ត ក្នុងគោលបំណងផ្សព្វផ្សាយជូនប្រជាពលរដ្ឋឱ្យបានដឹង ហើយចូលរួមក្នុងយុទ្ធនាកា​រនេះទាំងអស់គ្នា ដើម្បីកម្ពុជាគ្មានព័ត៌មានក្លែងក្លាយ។

ថ្មីៗនេះ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានគូសបញ្ជាក់ថា គ្រប់ប្រភេទនៃព័ត៌មានក្លែងក្លាយ សុទ្ធតែមានឥទ្ធិពលអវិជ្ជមានមកលើផ្នែកសន្តិសុខ សណ្តាប់ធ្នាប់សង្គម សេដ្ឋកិច្ច និងនយោបាយ ពោលគឺព័ត៌មានក្លែងក្លាយអាចបង្កអស្ថិរភាព បង្កើតអំពើហិង្សា ដែលបណ្តាលឱ្យកើតមានអរិភាពសង្គម ប្រជាពលរដ្ឋបាត់ទំនុកចិត្តលើការដឹកនាំ នាំឱ្យមានការបែកបាក់សាមគ្គីភាពក្នុងសង្គម ព្រមទាំងអាចបង្កព្យសនកម្ម និងមហន្តរាយដែលមិនអាចនឹកស្មានដល់។

ឯកឧត្ដម ទេព អស្នារិទ្ធ បានបង្ហាញការយល់ឃើញថា នៅពេលប្រើប្រាស់បណ្តាញសង្គម ប្រជាពលរដ្ឋត្រូវប្រ​កា​ន់ខ្ជាប់ទម្លាប់ល្អ៤យ៉ាង ដែលអាចឱ្យខ្លួនចៀសផុតពីការរងគ្រោះដោយសារការចែកចាយព័ត៌មានប្រ​កបដោ​យ​គ្រោះថ្នាក់ដោយមិនដឹងខ្លួន។ ឯកឧត្ដមអ្នកនាំពាក្យរូបនេះបានលើកឡើងថា ទម្លាប់ល្អទាំង៤នោះគឺ៖ ទី១. បោះបង់ចោលការចែកចាយព័ត៌មានបន្តលឿនពេក មុននឹងចែកចាយបន្តទៀតត្រូវផ្តល់វេលាបន្តិចសិនដើម្បីអា​ន​ព័​ត៌មាននោះឱ្យស្រួលបួល ហើយត្រូវផ្ទៀងផ្ទាត់ព័ត៌មាននោះប្រសិនបើខ្លឹមសារមិនសមហេតុផល ឬសង្ស័យថា​អាចជាព័ត៌មានក្លែងក្លាយ។ ទី២. កុំទាន់ជឿលើប្រភពព័ត៌មានពីបណ្តាញទំនាក់ទំនងសង្គមទាំងស្រុងតែមួ​យ​មុខ ពោលគឺត្រូវស្វែងរកការបញ្ជាក់ភាពសុក្រឹត ពីប្រភពយ៉ាងហោចពីរផ្សេងទៀត ដោយអាន និងផ្ទៀងផ្ទាត់ជាមួយប្រភពព័ត៌មានផ្លូវការរដ្ឋឬឯកជន តាមគេហទំព័រ ទូរទស្សន៍ វិទ្យុ និងបណ្តាញផ្សាយឌីជីថលផ្លូវការរបស់ប្រព័ន្ធផ្សព្វផ្សាយផ្លូវការទាំងនេះ ដើម្បីធានាថាវាជាព័ត៌មានពិត មានភាពសុក្រឹត ត្រឹមត្រូវទុកចិត្តបានមុននឹងចែ​ក​ចាយបន្ត។ ទន្ទឹមនេះ ប្រភពផ្សាយព័ត៌មានបែបអាជីពដែលគោរពក្រមសីលធម៌វិជ្ជាជីវៈ ឬប្រភពព័ត៌មានផ្លូវការផ្សេងទៀ​ត។ ទី៣. ចាប់យកប្រព័ន្ធផ្សព្វផ្សាយព័ត៌មានផ្លូវការរដ្ឋ និងឯកជន ទាំងប្រពៃណីនិងទំនើប និងភ្នាក់ងារផ្ស​ព្វ​ផ្សាយព័ត៌មានអាជីពដែលមានក្រមសីលធម៌វិជ្ជាជីវៈត្រឹមត្រូវ ជាប្រភពអាទិភាព សម្រាប់ការទទួលព័ត៌មានប្រ​ចាំ​ថ្ងៃ ហើយត្រូវលើកទឹកចិត្តដល់អ្នកដទៃទៀតឱ្យធ្វើដូច្នេះដែរ។ និងទី៤. ចែករំលែក ផ្សព្វផ្សាយតែព័ត៌មានពិត វិ​ជ្ជមាន មានប្រភពច្បាស់លាស់ សម្រាប់ជាប្រយោជន៍ដល់គ្រួសារ អ្នកនៅជុំវិញខ្លួននិងខ្លួនឯងផ្ទាល់ និងផ្តល់ព័​ត៌​មានដែលមានប្រយោជន៍ដល់ការរួមចំណែកក្នុងការថែរក្សាសុវត្ថិភាព សណ្តាប់ធ្នាប់និងសន្តិសុខក្នុងសង្គម។

គ្រាន់តែនិយាយពីព័ត៌មានក្លែងក្លាយភ្លាម ឯកឧត្តម​ឧកញ៉ា សមូហកបណ្ឌិត ឡី សុ​ភាព ប្រធានសមា​គមស​ហព័​ន្ធយុ​វជ​នសេ​ដ្ឋ​កិ​​​​ច្ចក​ម្ពុ​ជា​ និងជា​ប្រធាន​សម្ព័ន្ធភាពអ​ង្គ​កា​រ​ស​មា​​​គ​ម​ និងវិស័យឯកជននៅកម្ពុជា បង្ហាញអារម្មណ៍ពេញចិត្តចំពោះក្រសួងស្ថាប័នរបស់រាជរដ្ឋាភិបាលនិងបានកោតសរសើរក្រសួងព័ត៌មានដែលមានចំណាត់ការច្បាស់លាស់មិនឱ្យរឿងមិនពិតក្លាយជាកាតាលីករបំពុលសង្គមធ្វើឱ្យប្រជាពលរដ្ឋរងគ្រោះបានទាន់ពេលវេលា។

រាងស្ដើងតូចច្រឡឹងតែសំឡេងឮខ្លាំង ឯកឧត្តម​ឧកញ៉ា សមូហកបណ្ឌិត បានអះអាងថា ព័ត៌មានក្លែងក្លាយមានឥទ្ធិពលណាស់ចំពោះប្រជាពលរដ្ឋ។ មិនតែប៉ុណ្ណោះ សូម្បីតែអ្នកសារព័ត៌មានក៏រងផលអវិជ្ជមានពីព័​ត៌មា​ន​ក្លែងក្លាយដែរ ព្រោះអាចធ្វើឱ្យអាន អ្នកស្ដាប់ អ្នកទស្សនា លែងទុកចិត្តលើប្រពន្ធផ្សព្វផ្សាយ។

ចំពោះវិស័យសេដ្ឋកិច្ចវិញ ក៏រងព្យុះភ្លៀងពីព័ត៌មានក្លែងក្លាយ ព្រោះវាធ្វើឱ្យអ្នកវិនិយោគមិនហ៊ានមកបណ្ដាក់ទុនរកស៊ីនៅស្រុកយើងដោយសារជនមួយចំនួនផលិតមាតិកាព័ត៌មានដែលបង្ហាញខ្លឹមសារខុសពីការពិត បន្តុះបង្អាប់ ញុះញង់អុ​ច​អា​​លធ្វើឱ្យគេមើលឃើញសង្គមកម្ពុជាហាក់ដូចជាខ្មៅងងឹតមានភាពចលាចល អស្ថិរភាពនយោបាយ អសន្តិ​សុ​ខក្នុងការរស់នៅ នាំឱ្យវិនិយោគិនបរទេសដូរចិត្តទៅធ្វើពាណិជ្ជកម្មក្នុងប្រទេសដទៃវិញ។

ឯកឧត្តម​ឧកញ៉ា សមូហកបណ្ឌិត ឡី សុ​ភាព  បានមានប្រសាសន៍សង្កត់ធ្ងន់ថា៖ «ព័ត៌មានក្លែងក្លាយនេះក៏អាចប៉ះពាល់ដល់សន្តិសុខជាតិ នាំឱ្យអង្គការជាតិ និងអន្តរជាតិវាយតម្លៃថាសង្គមយើងមិនល្អ។ អ៊ីចឹងហើយបានគ្រប់ប្រទេសទាំងអស់លើពិភពលោក គេខិតខំទប់ស្កាត់ណាស់ព័ត៌មានក្លែងក្លាយ ព័ត៌មានមិនពិត ព្រោះព័ត៌មានជាអំណាចមួយដ៏ធំ ជាអំណាចសតិអារម្មណ៍»។

ដោយមើលឃើញពីផលប៉ះពាល់នៃព័ត៌មានក្លែងក្លាយចំពោះសង្គមនិងព្រះពុទ្ធសាសនាខ្លាំងពេក ព្រះគ្រូហេមសីលាចារ្យ ហៀង ពេក ជីវសុទ្ធោ គង់នៅវត្តបទុមវតី រាជធានីភ្នំពេញ បានជំរុញឱ្យប្រជាពលរដ្ឋវៀរចាកនូវ វចីទុច្ចរិត៤ គឺ៖ការមិននិយាយកុហក ញុះញង់ ទ្រគោះបោះបោក និងរោយរាយឥតប្រយោជន៍ ច្រើនពេក។ ព្រះគ្រូហេមសីលាចារ្យ មានថេរដីកាថា៖ «ហេតុដែលកើតឡើងក្នុងសង្គម មកពីយើងទាំងអស់គ្នាមិនគោរពច្បាប់ វិន័យ និងវិជ្ជាជីវៈរបស់ខ្លួន»។ ដូច្នេះ ដើម្បីទប់ស្កាត់ហេតុដែលកើតឡើងក្នុងសង្គម និងដើម្បីទប់ស្កាត់ព័ត៌មានក្លែងក្លាយ អ្នកបួសក្នុងព្រះពុទ្ធសាសនាត្រូវគោរពវិន័យសម្រាប់ប្រតិបត្តិតាម ហើយប្រជាពលរដ្ឋត្រូវគោរពច្បាប់។ ចំណែកឯ អ្នកធ្វើការងារត្រូវអនុវត្តតាមវិជ្ជាជីវៈរបស់ខ្លួន។

សម្រាប់ព័ត៌មានក្លែងក្លាយកំពុងស្ថិតនៅក្នុងចំណោមរឿងរាវមួយដែលទទួលបានការចាប់អារម្មណ៍ និងការតាមដានពីសំ​ណាក់ពលរដ្ឋមិនថាក្នុងប្រទេសកម្ពុជា ឬក្រៅប្រទេសនោះឡើយ។ សម្រាប់ការគ្រោះថ្នាក់ដែលកើតចេញពីព័ត៌មានក្លែងក្លាយកំពុងតែមានទំហំធំធេងគួរឱ្យកត់សម្គាល់ និងកំពុងជះផលអវិជ្ជមានដល់សង្គម ក៏ដូចជាសេដ្ឋកិច្ច។

ក្នុងបណ្តាញទំនាក់ទំនងសង្គមហ្វេសប៊ុក តេឡេក្រាម តិកតុក និងប្រព័ន្ធផ្សព្វផ្សាយទំនើបជាច្រើនទៀតកំពុងត្រូវបានលុកលុយ និងបំពុលដល់អ្នកប្រើប្រាស់។ ដោយសារកត្តាទាំងអស់នេះហើយទើបធ្វើឱ្យពលរដ្ឋ យុវជន សិស្ស និស្សិតកំពុងជួបការលំបាកក្នុងការកំណត់ថាព័ត៌មានណាជាព័ត៌មានពិត និងព័ត៌មានក្លែងក្លាយ។

ជុំវិញបញ្ហានេះ កញ្ញា លី សៀកជូ រស់នៅរាជធានីភ្នំពេញ បានកត់សម្គាល់ឃើញថា កំណើនព័ត៌មានក្លែងក្លាយនេះហាក់មានមានសន្ទុះខ្លាំង នៅក្នុងអំឡុងពេលដែលពិភពលោក ក៏ដូចជា ប្រទេសកម្ពុជា កំពុងប្រើប្រាស់បច្ចេកវិទ្យាទំនើប និងបញ្ញាសិប្បនិម្មិត(AI) ក្នុងការប្រាស្រ័យទាក់ទងគ្នា ដើម្បីផ្តល់ និងទទួលព័ត៌មានតាមរយៈបណ្តាញសង្គមហ្វេសប៊ុក តេឡេក្រាម វើសអាប់ និងតិកតុក ជាដើម។ យុវសិស្សរូបនេះបានលើកឡើងថា៖ «តាមពិតវាពិតជាលំបាកក្នុងការវែកញែកថាព័ត៌មានណាក្លែងក្លាយ ឬព័ត៌មានពិតដែរ បើយើងមិនបានពិនិត្យដិតដល់ទេ។ រៀងរាល់ថ្ងៃគេតែងឃើញមានការចែករំលែកជាច្រើនទាំងលក្ខណៈអត្ថបទ រូបភាព វីដេអូ ឬទម្រង់ផ្សេងៗយ៉ាងច្រើន»។

 តែទោះបីយ៉ាងណាក្តី កញ្ញា លី សៀកជូ បានលើកឡើងថា បើយើងចេះវែកញែក ឬចេះមើលពីអង្គភាពសារព័ត៌មានធំៗដែលបានផ្សព្វផ្សាយដូចជា ក្រសួងព័ត៌មាន ក្រសួង ស្ថាប័នរបស់រាជរដ្ឋាភិបាល ទូរទស្សន៍ជាតិ និងកាសែតធំៗក្នុងប្រទេសវិញឃើញថាព័ត៌មានទាំងនោះជាព័ត៌មានពិត ហើយកម្រនឹងផ្សាយពីព័ត៌មានមិនពិតណាស់ ។ ផ្ទុយមកវិញ បើជាព័ត៌មានចែករំលែកគ្មានប្រភពច្បាស់លាស់ ឬជាមាតិកាផលិតព័ត៌មានដើម្បីទាក់ទាញ ដែលច្រើនតែជាព័ត៌មានក្លែងក្លាយ ភាគច្រើនគេបង្ហោះដើម្បីបានអ្នកចូលមើលច្រើន ឬទទួលការចាប់អារម្មណ៍តែប៉ុណ្ណោះ។

ដោយឡែកលោក ប៊ុន វិត រស់នៅឃុំអមលាំង ស្រុកថ្ពង ខេត្តកំពង់ស្ពឺបានប្រាប់ឱ្យដឹងថា លោកពុំបានចាប់អារម្មណ៍ថាព័ត៌មានណាក្លែងក្លាយ ឬព័ត៌មានពិតនោះទេ តែមួយរយៈចុងក្រោយនេះក្រោយក្រសួងព័ត៌មានផ្សព្វផ្សាយទើបដឹងថា ព័ត៌មានក្នុងបណ្ដាញសង្គមមួយចំនួនយើងគួរប្រុងប្រយ័ត្ន ហើយបើពុំបានប្រុងប្រយ័ត្នទេវាបង្កផលអាក្រក់ខ្លាំងណាស់។ លោកលើកឡើងថា ព័ត៌មានក្លែងក្លាយនេះមិនត្រឹមតែផ្នែកនយោបាយទេសូម្បីតែសង្គម សុខភាព ឬអ្វីផ្សេងៗទៀតក៏ក្រុមមនុស្សមួយចំនួនបង្កើតឡើងដើម្បីកេង ចំណេញផលប្រយោជន៍ក្រុម ឬបុគ្គលផ្ទាល់ខ្លួនរបស់គេដែរ។ លោក ប៊ុន វិត បានសង្កត់ធ្ងន់ថា៖ «ក្រុមមនុស្សដែលបង្កើតព័ត៌មានក្លែងក្លាយមិនក្រៅពីអ្វីដែលពួកគេត្រូវការផលប្រយោជន៍ផ្ទាល់ខ្លួន ឬសេដ្ឋកិច្ចផ្ទាល់ខ្លួន ឬក្រុមខ្លួនទេ។ ព័ត៌មានទាំងនេះវាជះផលអាក្រក់ទាំងសង្គមជាតិ សង្គមគ្រួសារ ដែលយើងគួរប្រុងប្រយ័ត្នជានិច្ច»។

ទាក់នឹងព័ត៌មានក្លែងក្លាយនេះដែរ លោក លោក ផាន់ ផុន រស់នៅ ឃុំ ខ្នងភ្នំ ស្រុកស្វាយលើ ខេត្តសៀមរាបបានប្រាប់ឱ្យដឹងដែរថា បច្ចុប្បន្ននេះបើមើលលើបណ្តាញសង្គមហ្វេសប៊ុក គឺមានព័ត៌មានច្រើនរាប់មិនអស់ តែក្នុងចំណោមនេះព័ត៌មានក្លែងក្លាយក៏មានច្រើនដែរ។ លោកនិយាយថា បញ្ហាព័ត៌មានក្លែងក្លាយនេះ មិនថាកម្ពុជាទេ នៅគ្រប់ប្រទេសលើពិភពលោកគឺដូចគ្នា ម្ល៉ោះហើយវាជាផលលំបាកបើយើងមិនបានប្រុងប្រយ័ត្នពីវាទេ។

បុរសវ័យជាង៥០ឆ្នាំរូបនេះបានប្រាប់ឱ្យដឹងថា៖ «ខ្ញុំគិតថាមុនជឿ ឬចែករំលែកបន្តយើងគួរមានការប្រុងប្រយ័ត្ន។ រឿងរាវខ្លះមិនត្រឹមគ្រោះថ្នាក់ដោយត្រូវចំណាយប្រាក់កាសទេ តែវាឈានដល់គ្រោះថ្នាក់ដល់សង្គម ឬប្រទេសជាតិថែមទៀត។ អ្វីដែលសំខាន់យើងត្រូវចេះផ្ទៀងផ្ទាត់ និងពិនិត្យប្រភពច្បាស់លាស់ទើបចៀសផុតនូវព័ត៌មានក្លែងក្លាយទាំងនេះ។»

សូមជម្រាបជូនថា យុទ្ធនាការ «និយាយថាទេចំពោះព័ត៌មានក្លែងក្លាយ» ដឹកនាំដោយក្រសួងព័ត៌មាន មានគោលដៅធានា និងការពារសិទ្ធិ និងសុវត្ថិភាពក្នុងការទទួលព័ត៌មានរបស់ប្រជាពលរដ្ឋ រួមចំណែកដល់ការពង្រឹងសន្តិសុខ និងស្ថិរភាពសង្គម។ ជាមួយគ្នានេះដែរ សម្រាប់ពលរដ្ឋ អ្នកប្រើប្រាស់ អ្នកបង្កើតមាតិកាលើបណ្តាញសង្គម និងអ្នកចែកចាយព័ត៌មានបែបឌីជីថលទាំងអស់ ចូលរួមទប់ស្កាត់ និងឈានទៅបញ្ចប់ ចរាចរ ព័ត៌មានក្លែងក្លាយក្នុងសង្គម ដើម្បីការពារខ្លួនយើង គ្រួសារ និងសង្គមជាតិ។

ជាមួយនឹងយុទ្ធនាការ «និយាយថាទេចំពោះព័ត៌មានក្លែងក្លាយ – Say No to Fake News» ចាប់ផ្ដើមអនុវត្តន៍ពីថ្ងៃទី០១ ខែមេសា ឆ្នាំ២០២៥ នៅទីស្តីការក្រសួងព័ត៌មាន ដែលមានការអញ្ជើញចូលរួមបើកយុទ្ធនាការនេះដោយឯកឧត្តម នេត្រ ភក្ត្រា រដ្ឋមន្រ្ដីក្រសួងព័ត៌មាន។ ក្នុងរយៈពេល ៥ខែ ឆ្នាំ២០២៥នេះ គណៈកម្មការប្រឆាំងព័ត៌មានក្លែងក្លាយនៃក្រសួងព័ត៌មាន បានកត់ត្រាទុកព័ត៌មានក្លែងក្លាយចំនួន ១ ៣៩៩ ករណី៕

ដោយ៖ គង់ សិរីរ័ត្ន, មករា និង រិទ្ធី