AKP ភ្នំពេញ ថ្ងៃទី១២ ខែមិថុនា ឆ្នាំ២០២៥ -- ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញបន្តដឹកនាំកិច្ចប្រជុំពិនិត្យ និងពិភាក្សាពិគ្រោះយោបល់លើសេចក្តីព្រាងគោលនយោបាយអភិវឌ្ឍន៍ជនបទ ២០២៥-២០៣៥ របស់ក្រសួងអភិវឌ្ឍន៍ជនបទ នាថ្ងៃទី១២ ខែមិថុនា ឆ្នាំ២០២៥នេះ នៅទីស្ដីការក្រសួង ដោយមានការចូលរួមពីថ្នាក់ដឹកនាំ មន្រ្ដីបច្ចេកទេស ព្រមទាំងមន្ត្រីក្រោមឱវាទក្រសួងអភិវឌ្ឍន៍ជនបទផងដែរ។

លោក ទូច ស៊ីផាត អគ្គនាយករងរដ្ឋបាល និងហិរញ្ញវត្ថុ បានធ្វើបទបង្ហាញស្ដីពីសេចក្ដីព្រាងគោលនយោបាយអភិវឌ្ឍន៍ជនបទ ឆ្នាំ២០២៥-២០៣៥ ជូនដល់អង្គប្រជុំដោយ ផ្ដោតលើចក្ខុវិស័យ គោលបំណង គោលដៅ យុទ្ធសាស្ដ្រ កម្មវិធី និងវិធីសាស្ដ្រ ទាក់ទិនទៅនឹងការអភិវឌ្ឍន៍ជនបទលើគ្រប់វិស័យ។ កិច្ចប្រជុំបានធ្វើការពិភាក្សា ផ្ដល់យោបល់យ៉ាងផុលផុស លើសេចក្ដីព្រាងគោលនយោបាយអភិវឌ្ឍន៍ជនបទ ព្រមទាំងបានចូលរួមផ្ដល់មតិយោបល់ និងសំណូមពរនានា ដែលជាធាតុចូលដ៏សំខាន់បន្ថែមទៀត ធ្វើឱ្យសេចក្ដីព្រាងគោលនយោបាននេះកាន់តែមានប្រសិទ្ធភាពគ្រប់ជ្រុងជ្រោយ។

ក្នុងឱកាសនោះ ឯកឧត្ដមរដ្ឋមន្រ្ដីបានថ្លែងអំណរគុណដល់ក្រុមការងារតាក់តែងគោលនយោបាយអភិវឌ្ឍន៍ជនបទ ដែលបានខិតខំរៀបចំនាពេលកន្លងមក ដល់ថ្នាក់ដឹកនាំក្រសួង ជាពិសេសឯកឧត្តម ច័ន្ទ សុផល នាយកមជ្ឈមណ្ឌលសិក្សគោលនយោបាយ  ដែលបានចូលរួមរៀបចំ និងផ្ដល់ជាធាតុចូលសំខាន់ៗលើគោលនយោបាយនាពេលកន្លងមក។ កន្លងមកក្រសួងក៏ធ្លាប់បានប្រជុំពិគ្រោះយោបល់ជាមួយក្រសួងស្ថាប័ន រដ្ឋបាលថ្នាក់ក្រោមជាតិ អង្គការដៃគូ លើសេចក្តីព្រាងគោលនយោបាយអភិវឌ្ឍន៍ជនបទនេះផងដែរ ដើម្បីបន្ថែមនូវធាតុចូលឱ្យកាន់តែពេញលេញ គ្រប់ជ្រុងជ្រោយដើម្បីឱ្យសេចក្តីព្រាងគោលនយោបាយអភិវឌ្ឍន៍ជនបទ ២០២៥-២០៣៥ របស់ក្រសួងអភិវឌ្ឍន៍ជនបទ កាន់តែមានប្រសិទ្ធភាពឆ្លើយតបទៅនឹងចក្ខុវិស័យវែងឆ្ងាយរបស់រាជរដ្ឋាភិបាល។

ទន្ទឹមនឹងនេះ ឯកឧត្តមរដ្ឋមន្ត្រីបានផ្ដល់ជាអនុសាសន៍បន្ថែម ដើម្បីឱ្យក្រមការងារបញ្ចូលធាតុចូលល្អៗដែលបានពិភាក្សានាពេលនេះ ចូលទៅក្នុងគោលនយោបាយ និងពិនិត្យឱ្យបានគ្រប់ជ្រុងជ្រោយ ដើម្បីឱ្យគោលនយោបាយអភិវឌ្ឍន៍ជនបទឆ្នាំ២០២៥-២០២៣៥ របស់ក្រសួងអភិវឌ្ឍន៍ជនបទឈានទៅបញ្ចប់នៅក្នុងខែមិថុនា ឆ្នាំ២០២៥ និងរៀបចំដាក់ឆ្លងជូនទៅទីស្ដីការគណៈរដ្ឋមន្រ្ដី៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)