AKP កំពង់ធំ ថ្ងៃទី១២ ខែមិថុនា ឆ្នាំ២០២៥ -- ខេត្តកំពង់ធំបានប្រារព្ធទិវាបរិស្ថានជាតិ និងបរិស្ថានពិភពលោក០៥ មិថុនាក្រោមប្រធានបទ"ប្រយុទ្ធប្រឆាំងការបំពុលដោយប្លាស្ទិក" នៅបរិវេណសាលាវិទ្យាល័យកំពង់ធំ ក្រោមអធិបតីភាពលោក ជា វ៉ាន់ចាន់ អភិបាលរងខេត្តតំណាងឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ ដោយមានការអញ្ជើញចូលរួមពីលោក លោកស្រីជាប្រធាន អនុប្រធានមន្ទីរនានាជុំវិញខេត្ត មន្ត្រីមន្ទីរបរិស្ថាន លោកគ្រូអ្នកគ្រូ ប្រជាពលរដ្ឋ និងសិស្សានុសិស្សយ៉ាងច្រើនកុះករ។

លោក អោង ប៊ុនធឿន ប្រធានមន្ទីរបរិស្ថាន បានមានប្រសាសន៍ថា ការប្រារព្ធពិធីនេះមានគោលបំណងផ្សព្វផ្សាយជាផ្លូវការនូវចលនាទូលំទូលាយរួមគ្នាកាត់បន្ថយសំណល់ប្លាស្ទិកនៅកម្ពុជា តាមគោលការណ៍ស្ម័គ្រចិត្តស្របតាមអនុក្រឹត្យរបស់រាជរដ្ឋាភិបាល ស្តីពីការគ្រប់គ្រងថង់ប្លាស្ទិក។លោកក៏បានបញ្ជាក់ផងដែរនេះជាការជំរុញនិងលើកទឹកចិត្តដល់អាជីវករឱ្យបញ្ឈប់ជាអចិន្ត្រៃយ៍នូវការផ្តល់ថង់ប្លាស្ទិកដោយមិនគិតថ្លៃដល់អតិថិជន។ មន្ទីរទទួលផែនការបណ្តុះកូនឈើ១០ម៉ឺនដើមក្នុងមួយឆ្នាំៗ។ ឆ្នាំនេះ មន្ទីរបណ្តុះបានចំនួន១០១០០០ដើម ដែលមានកូនឈើព្រៃឈើហូបផ្លែ ឈើលម្អ និងត្នោត។ ចាប់ពីឆ្នាំ២០២៣មក ក្រសួងបរិស្ថានបានដាក់ចេញយុទ្ធនាការចំនួន៣គឺ៖ ទី១. យុទ្ធនាការកាត់បន្ថយការប្រើប្រាស់ថង់ប្លាស្ទិក" ថ្ងៃនេះខ្ញុំមិនប្រើថង់ប្លាស្ទិកទេ" ទី២. "កម្ពុជាស្អាតខ្មែរធ្វើបាន" និងទី៣. "ផ្លូវជាតិស្អាត គ្មានសំរាមប្លាស្ទិក"។ ការងារនេះឃើញថា បានរួមគ្នាគ្រប់កន្លែង គ្រប់ទីតាំង គ្រប់ឃុំ គ្រប់ស្រុក និងក្រុង ធ្វើបាន លទ្ធផលគួរជាទីមោទនៈ។

លោក ជា វ៉ាន់ចាន់ មានប្រសាសន៍ថា ទិវាបរិស្ថានជាតិ និងបរិស្ថានពិភពលោក ០៥ មិថុនា ក្រោមប្រធានបទ "ប្រយុទ្ធប្រឆាំងការបំពុលដោយសំណល់ប្លាស្ទិក" ត្រូវបានចាត់ទុកថាជា "ជនបង្គោល" និង"យុវសិស្សបង្គោល" ដែលនឹងត្រូវដើរតួនាទីសំខាន់ក្នុងការជួយផ្សព្វផ្សាយបន្តទៅក្រុមគ្រួសារ មិត្តភក្តិ និងអ្នករស់នៅភូមិផងរបងជាមួយគ្នា និងដឹកនាំការអនុវត្តផ្ទាល់នូវសកម្មភាពទុកដាក់ សំណល់ប្លាស្ទិកឱ្យបានសមស្របតាមលក្ខណៈបច្ចេកទេស ការប្រើប្រាស់ឡើងវិញនូវសម្ភារដែលធ្វើពីប្លាស្ទិក និងការប្រើប្រាស់វត្ថុដែលមិនមែនផលិតពីប្លាស្ទិកជំនួស ដូចជា ថង់ក្រណាត់ កន្ត្រករពាក់/ឫស្សី ដបទឹកសុទ្ធធ្វើពីអ៊ីណុក។

ដើម្បីសម្រេចភាពស្អាត ភាពគ្មានសំរាម នៅក្នុងខេត្តកំពង់ធំ ក៏ដូចជានៅទូទាំងប្រទេសកម្ពុជា កត្តាជោគជ័យក្នុងការងារនេះគឺគ្មានអ្វីក្រៅពីកិច្ចសហការ ការខិតខំប្រឹងប្រែងនិងការចូល រួមចំណែកពីយើងទាំងអស់គ្នា រួមមាន ស្ថាប័ន និងអង្គភាពរាជរដ្ឋាភិបាល អង្គការក្រៅរដ្ឋាភិបាលសង្គមស៊ីវិល សិស្សានុសិស្ស សហគមន៍ និងព្រះសង្ឃ ដោយមិនត្រូវមើលបំណាំគ្នាហើយធ្វើការសម្អាតតាមទីតាំងរៀងៗខ្លួន។

លោក ជា វ៉ាន់ចាន់ បានបញ្ជាក់ថា ទិវាបរិស្ថានជាតិ និងបរិស្ថានពិភពលោកនាពេលនេះ គឺបានឆ្លុះបញ្ចាំងពីឆន្ទៈរួមគ្នាក្នុង កិច្ចគាំពារបរិស្ថាន បង្ហាញពីការយកចិត្តទុកដាក់របស់ប្រជាជនកម្ពុជា រួមជាមួយប្រជាជាតិលើសកលលោក ដើម្បីបុព្វហេតុរួមចំណែកការពារនិងថែរក្សាគុណភាពបរិស្ថានភពផែនដី ឱ្យឈានឆ្ពោះទៅកាន់ការរស់នៅប្រកបដោយចីរភាព សម្រាប់មនុស្សជាតិបច្ចុប្បន្ន និងជំនាន់ក្រោយៗទៀត ព្រមទាំងថែរក្សាការពារបាននូវធនធានធម្មជាតិ និងប្រព័ន្ធអេកូឡូស៊ីជាពិសេសតំបន់បឹងទន្លេសាប និងតំបន់ការពារធម្មជាតិផ្សេងទៀត៕

ដោយ ស៊ុម វណ្ណា