AKP ភ្នំពេញ ថ្ងៃទី១២ ខែមិថុនា ឆ្នាំ២០២៥ -- ប្រតិភូធនាគារអភិវឌ្ឍន៍អាស៊ីមួយក្រុម ព្រឹកថ្ងៃទី១២ ខែមិថុនា ឆ្នាំ២០២៥ បានធ្វើទស្សនកិច្ចពិនិត្យឡើងវិញចុងក្រោយរបស់គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិទី២ នៅវិទ្យាល័យ ហ៊ុន សែន កំពង់ពពិល ខេត្តព្រៃវែង ដោយបានពិនិត្យមើលឡើងវិញនូវការរីកចម្រើនរបស់សាលារៀន និង បានជួបពិភាក្សាជាមួយអ្នកពាក់ព័ន្ធអំពីចំណុចដែលត្រូវកែលម្អមួយចំនួន។

ក្នុងដំណើរទស្សនកិច្ចនេះ ប្រតិភូបានពិនិត្យមើលនៅបន្ទប់ពិសោធន៍មុខវិជ្ជាជីវវិទ្យា និងគីមីវិទ្យា ព្រមទាំងបានពិភាក្សាអំពីសមិទ្ធផលដែលសាលារៀនទទួលបានរួមាន សកម្មភាពបង្រៀន និងរៀន ការអនុវត្តកម្មវិធីបង្រៀនថ្មីៗ ការបង្រៀនបែបស្ទែម ការបង្រៀន ICT ក្លឹបសិក្សា កម្មវិធី CGC ជំនាញបន្ថែមផ្នែកស្ទែម ការអនុវត្តតេស្តស្តង់ដា ការអនុវត្តស្តង់ដាសាលារៀនគំរូ ការបង្កើតគណៈកម្មការគ្រប់គ្រងសាលារៀន និងការចូលរួមរបស់មាតាបិតាសិស្សក្នុងការអភិវឌ្ឍសាលារៀន ការចូលរួមរបស់យុវជន និងលទ្ធផលសិក្សារបស់សិស្ស ព្រមទាំងពិភាក្សាអំពីការរក្សានិរន្តរភាពនូវរាល់សកម្មភាពទាំងអស់បន្ទាប់ពីការបញ្ចប់ការគាំទ្ររបស់គម្រោង។

ប្រតិភូបានកោតសរសើរដល់ភាពជាអ្នកដឹកនាំ និងកិច្ចខិតខំប្រឹងប្រែងរបស់គណៈគ្រប់គ្រងសាលារៀន លោកគ្រូ អ្នកគ្រូ និងអ្នកពាក់ព័ន្ធទាំងអស់ក្នុងការកែលម្អ និងអភិវឌ្ឍន៍សាលារៀនរហូតទទួលបានជ័យលាភីសាលារៀនគំរូលេខរៀងទី៤ និងលិខិតសរសើរសាលារៀនស្អាតក្នុងឆ្នាំ២០២៥នេះ និងមានភាគរយសិស្សប្រឡងជាប់មធ្យមសិក្សាទុតិយភូមិប្រមាណ ៩៧ភាគរយ។
គួរបញ្ជាក់ផងដែរថា គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិទី២ ត្រូវបានអនុវត្តចប់សព្វគ្រប់ដោយប្រើរយៈពេល៦ឆ្នាំកន្លះ ដោយផ្ដោតលើការអភិវឌ្ឍទាំងផ្នែករឹង និងទន់នៅវិទ្យាស្ថានជាតិអប់រំ និងសាលារៀនគោលដៅចំនួន១៣៧ រួមានសាលាធនធានចំនួន៥០ និងសាលាបណ្ដាញចំនួន៨៧ ឆ្លើយតបនឹងកំណែទម្រង់គ្រូបង្រៀន គុណភាពនៃការសិក្សា និងការអភិវឌ្ឍសមត្ថភាពស្ថាប័ន៕

ដោយ៖ ចាន់ សុភឿន (ប្រភព៖ ក្រសួងអប់រំ)