AKP ភ្នំពេញ ថ្ងៃទី១២ ខែមិថុនា ឆ្នាំ២០២៥ -- សម្តេចកិត្តិសង្គហបណ្ឌិតម៉ែន សំអន ឧត្ដមប្រឹក្សាផ្ទាល់ព្រះមហាក្សត្រ និងជាប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍមាតុភូមិកម្ពុជា បាននាំយកអំណោយ ជាគ្រឿងឧបភោគ បរិភោគ និងថវិកា ចែកជូនកងទ័ពឈរជើងតាមបណ្ដោយព្រំដែនកម្ពុជា-ថៃ ក្នុងខេត្តព្រះវិហារ។

ក្នុងពិធីសំណេះសំណាល សួរសុខទុក្ខ ដល់នាយទាហាន នាយទាហានរង ពលទាហាន ក៏មានការចូលរួមពីឯកឧត្តមវង សូត អនុប្រធានទី២រដ្ឋសភានិងជាអនុប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍមាតុភូមិកម្ពុជានិងលោកជំទាវ នៅថ្ងៃព្រហស្បតិ៏ទី១២ ខែមិថុនា ឆ្នាំ២០២៥ ។ 

ក្នុងឱកាសនេះដែរ ឯកឧត្តម នាយឧត្តមសេនីយ៍ ឥត សារ៉ាត់ មេបញ្ជាការប្រចាំទិសភូមិភាគទី៤ ក៏បានអរគុណដល់ ប្រមុខរាជរដ្ឋាភិបាលកម្ពុជា ដែលតែងតែគិតគូរសុខទុក្ខ ឧបត្ថម្ភគាំទ្រជានិច្ច ជាពិសេសវត្តមាន សម្ដេចកិត្តិសង្គហបណ្ឌិត ម៉ែន សំអន និងឯកឧត្តមវង សូត ដែលបានចុះមកសំណេះសំណាលនាពេលនេះ គឺជាការគាំទ្រនិងលើកទឹក ចិត្តដល់កងទ័ព ក្នុងការការពារអធិបតេយ្យ និងបូរណភាព ទឹកដី ដ៏បវរនៃយើង។ 

សម្ដេចកិត្តិសង្គហបណ្ឌិត ម៉ែន សំអន ក៏បានផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដោយសម្តែងនូវការកោតសរ សើរស្មោះអស់ពីដួងចិត្ត ចំពោះការលះបង់គ្រប់បែបយ៉ាងរបស់កងទ័ពដើម្បីការពារ ជាតិ សាសនា ព្រះមហា្សត្រ ។  

សម្ដេចកិត្តិសង្គហបណ្ឌិត បានបញ្ជាក់ថា ការចុះសួរសុខទុក្ខនាពេលនេះ គឺដើម្បីគាំទ្រ និងលើកទឹកចិត្តកងទ័ពនៅជួរមុខ ដែលថែរក្សាអធិបតេយ្យជាតិ និងព្រំដែនជាតិនៅតាមព្រំដែនកម្ពុជា-ថៃ។ សម្តេចកិត្តិសង្គហបណ្ឌិតម៉ែន សំអន ក៏បានសម្តែងនូវការកោតសរសើរចំពោះស្មារតីតស៊ូដ៏អង់អាចក្លាហាន ប្រកបដោយវីរភាពរបស់នាយទា ហាន នាយទាហានរង និងពលទាហាន ដែលបានយកអស់កម្លាំងកាយចិត្តក្នុងបុព្វហេតុការពារបូរណភាពទឹកដី ដែនអធិបតេយ្យជាតិ និងជាតិមាតុភូមិកម្ពុជាដ៏បវរនៃយើងផងដែរ។ 

សម្ដេចកិត្តិសង្គហបណ្ឌិត ម៉ែន សំអន បាននាំយកនូវអំណោយជាថវិកា និងគ្រឿងឧបភោគ បរិភោគ មួយចំនួន ជូននាយឧត្ដមសេនីយ៍ កិត្តិសង្គហបណ្ឌិត ហ៉ីង ប៊ុនហៀង អគ្គមេបញ្ជាការ រង នៃ កងយោធពលខេមរភូមិន្ទ និងជាមេបញ្ជាការ នៃបញ្ជាការ ដ្ឋាន កងអង្គរក្ស ជាថវិកាចំនួន២០៨ លានរៀល និង៥០០០ដុល្លារ និងផ្តលជូនគ្រឿងបរិភោគ និងថវិកាចំនួន៣០លានរៀល ដល់កងពលលេខ៤២ ដែលឈរជើងនៅខេត្តព្រះវិហារ ជាការអរគុណចំពោះការលះបង់កម្លាំងកាយ និងញើសឈាម ដើម្បីការពារជាតិមាតុភូមិ និងលេីកទឹកចិត្តឱ្យបន្តនូវកិច្ចការងារនេះតទៅមុខទៀត ជាខឿនការពារជាតិ សម្រាប់កូន ក្មួយ ចៅ ជំនាន់ក្រោយៗយក តម្រាប់តាម ៕

ដោយ សួស សំរិត